Исай 48 - Коми Библия 2023

Господь ӧлӧдӧ Ассьыс войтырсӧ

¹ – Кывзӧй тайӧс, Яковсянь чужысьяс! Ті шусянныд Израиль нимӧн, ті петінныд Иуда чужанкотырысь, ті кыв сетӧмӧн кӧсйысянныд Господь нимӧн, шуанныд, мый кесъяланныд Израильлӧн Енлы, но вӧчанныд тайӧс онӧ збыльысь да онӧ веськыда.

² Ті шуанныд асьнытӧ вежа карысь петысьясӧн, ті лача кутанныд Израильлӧн Ен вылӧ. Сылӧн нимыс – Господь Саваоф.

³ Ме водзвыв висьталі, мый вӧлі нин, Менам вомысь петіс тайӧ, Ме юӧрті та йылысь, Ме вӧчи тайӧс виччысьтӧг, и ставыс збыльмис.

⁴ Ме тӧді, мый тэ асныра, мый тэнад сьыліыд кӧртысь, плешкыд ыргӧнысь.

⁵ Та вӧсна Ме водзвыв висьтавлі тэныд ставсӧ, Ме водзвыв юӧртлі тэныд, мый лоӧ, медым бӧрыннас эн шу: «Менам идолӧй вӧчис тайӧс, бӧлбанӧй тшӧктіс тадзи лонысӧ».

⁶ Ӧні мӧвпав сы йылысь, мый водзынджык кывлін. Ті ӧмӧй онӧ эскӧй таӧ? Ӧнісянь Ме висьтала тэныд выльтор, висьтала гусятор, мый йылысь тэ эн на тӧдлы.

⁷ Тайӧ инӧ ӧні, а эз коркӧ ин. Та йылысь тэ эн кывлы, та вӧсна он вермы шуны, мый тэ тӧдан нин.

⁸ Тэ эн кывлы, эн тӧдлы та йылысь, тэнад пельыд важысянь тупкыса. Ме тӧді, мый тэ ылӧдчысь, мам кынӧмсяньыд нин тэнӧ шуӧны паныд кыпӧдчысьӧн.

⁹ Аслам нимӧй вӧсна Ме ог кисьт Ассьым скӧрлунӧс, Аслам нималӧмӧй вӧсна Ме кута Ачымӧс тэнӧ бырӧдӧмысь.

¹⁰ Ме сывді тэнӧ, но эзысьӧс моз тэнӧ он сӧстӧммӧд, Ме тӧдмалі тэнӧ сьӧкыд нуӧм пыр.

¹¹ Ас вӧсна, дзик Ас вӧсна Ме вӧча тадзи, Ме ог лэдз янӧдны Ассьым нимӧс, Ассьым дзирдлунӧс Ме некодлы ог сет.

Господь тшӧктӧ петны Вавилонысь

¹² Кывзы Менӧ, Яков, кывзы, Израиль. Ме тэнӧ чукӧсті. Тайӧ – Ме. Ме – Медводдзаыс, Ме – Медбӧръяыс.

¹³ Менам киӧй вӧчис мусӧ, Менам веськыд киӧй шевкнитіс енэжсӧ. Ме чукӧста найӧс, и найӧ ӧтвылысь сувтасны Ме водзӧ.

¹⁴ Чукӧртчӧй ставныд да кывзӧй! Коді на пӧвстысь водзвыв висьталіс та йылысь? Господь радейтӧ сійӧ мортсӧ, коді збыльмӧдас Господьлысь кӧсйӧмсӧ Вавилон йылысь, петкӧдлас Сылысь вынсӧ калдея войтыр вылын.

¹⁵ Ме Ачым юӧрті тайӧс да чукӧсті сійӧ мортсӧ, Ме вайӧді сійӧс, и сылӧн став уджыс артмӧ.

¹⁶ Матыстчӧй Ме дінӧ да кывзӧй! Водзысяньыс Ме висьтавлі тіянлы восьсӧн. Сійӧ кадсяньыс, кор ставыс тайӧ заводитчис, Ме вӧлі сэні нин. Ӧні Господь Ыджыдыс сетіс меным Ассьыс ловсӧ да мӧдӧдіс менӧ.

¹⁷ Господь, тэнӧ Мездысь, Израильлӧн вежа Ен, тадзи висьталӧ: – Ме – Господь, тэнад Енмыд, Ме велӧда тэнӧ бурас, нуӧда тэнӧ сійӧ туйӧдыс, кыті тэныд колӧ муннысӧ.

¹⁸ Тэ кӧ олін Менам тшӧктӧмъясӧй серти, сэки эськӧ тэнад лӧньлуныд ю моз визувтіс, веськыдлуныд саридзвыв гыяс кодь вӧлі,

¹⁹ тэнад челядьыд эськӧ вӧлі лыа мында, тэсянь чужысьясыд – лыа чир мында. Налӧн нимныс эськӧ эз вош, найӧ эськӧ эз бырны Менам син водзысь.

²⁰ Петӧй Вавилонысь, пышйӧй Калдеяысь! Гораа нимкодясьӧмӧн юӧртӧй, висьтавлӧй та йылысь, паськӧдӧй тайӧ юӧрсӧ му помӧдзыс. Висьтавлӧй тадзи: Господь мездіс Ассьыс Яков кесйӧгсӧ.

²¹ Кор Господь нуӧдіс найӧс овтӧминӧд, найӧ эз сьӧкыдавны горш косьмӧмысь. Господь сетіс налы изйысь ва, Сійӧ поткӧдіс изсӧ, и сэтысь визувтіс ва.

²² Ентӧг олысьяслӧн лӧньлуныс абу, – висьталӧ Господь.