Исай 47 - Коми Библия 2023

Вавилонӧс мыждӧм

¹ – Вавилон ныв, лэччы да пуксьы му вылас, пукав му вылас, калдея войтырлӧн ныв, ӧд юралан пуклӧсыд тэнад абу нин. Водзӧ оз нин шуны, мый тэ мелі да шань войтыр.

² Кутчысь изкиӧ да пызьӧдз из тусьсӧ. Шыбит вевттьӧдтӧ, кусыньт бӧждортӧ, восьт кокчӧртӧ да вудж ва вомӧн.

³ Мед тыдовтчас тэнад куш яйыд, мед аддзасны тэнсьыд яндзимтӧ. Ме водзӧс перъя, и некодӧс ог жалит.

⁴ Миян Мездысьным – Израильлӧн вежа Ен, Сылӧн нимыс – Господь Саваоф!

⁵ Мун пемыдас, калдея войтырлӧн ныв, да чӧла пукав сэні. Водзӧ тэнӧ оз нин шуны войтыръяс вылын ыджыдалысь ӧксы-аньӧн.

⁶ Аслам войтыр вылӧ Ме скӧрми, Ассьым бӧрйӧм йӧзӧс Ме янӧді да сеті тэнад кипод улӧ. Тэ эн вӧв бур сьӧлӧма на дінӧ, весиг пӧрысь йӧзӧс тэ ёна нартитін.

⁷ Тэ шуалін: «Ме пыр лоа ӧксы-аньӧн», но тэ эн мӧвпыштлы, эн кӧсйы тӧдны, мый лоӧ бӧрыннас.

⁸ Но ӧні кывзы тайӧс, лышкыда да тӧждысьтӧг олысь аньӧй. Тэ шуалан аслыд: «Ме кодь мӧдыс абу, ме некор ог коль дӧваӧн, ог вошты ассьым челядьӧс».

⁹ Но ӧти лунӧ, тӧдлытӧг, суас тэнӧ ӧтиыс и мӧдыс: тэ воштан челядьтӧ и колян дӧваӧн. Ставыс тайӧ воас тэ вылӧ ыджыд шыӧн, кӧть тэ ёна туналан-кимӧститчан.

¹⁰ Лёксӧ вӧчигӧн тэ эн повлы, тэ шуавлін: «Некод оз аддзы менӧ». Тэнад сюсьлуныд да тӧдӧмлуныд кежӧдісны тэнӧ туй вывсьыд. Тэ шуалін аслыд: «Ме кодь мӧдыс абу!»

¹¹ Но тэнӧ суас лёкыс, тэ весиг он тӧдлы, кытысь сійӧ локтас. Тэнӧ кытшалас ыджыд шог, тэ он вермы сійӧс вештыны. Виччысьтӧг тэнӧ суас бырӧдӧм, мый йылысь тэ весиг эн мӧвпыштлы.

¹² Сідзкӧ, водзӧ кимӧститчы, ёнджыка на тшыкӧдчы, ӧд тэ том кадсяньыд нин ноксян тайӧн. Гашкӧ, тайӧ отсалас тэныд, гашкӧ, тайӧ видзас тэнӧ лёксьыс.

¹³ Тэ мудзӧмыд нин помтӧм туйдӧдӧмысь. Сідзкӧ, мед локтасны енэжсӧ туялысь-видзӧдысьяс да кодзув серти туналысьяс, выль тӧлысь серти найӧ мед висьталасны тэныд лоанасӧ. Мед найӧ мездасны тэнӧ сыысь, мый шуӧма лоны тэкӧд.

¹⁴ Но найӧ идзас кодьӧсь, биыс сотас найӧс, найӧ оз вермыны видзны асьнысӧ ыпъялан биысь. Наысь весиг ӧгыр оз коль, медым шонтысьыштны. Наысь он песты бипур, медым сы дорын пукалыштны.

¹⁵ Татшӧмӧсь найӧ, кодъяскӧд тэ уджалін, кодъяскӧд том кадсяньыд тэ вузасин-ньӧбасин. Найӧ быдӧн мунісны асланыс туйӧд, некод оз мезды тэнӧ.