Исай 44 - Коми Библия 2023

Господьысь кындзи мӧд Енмыс абу

¹ – Ӧні кывзы, Яков, Менам кесйӧгӧй, кывзы, Израиль, Меӧн бӧрйӧмаӧй.

² Тэнӧ вӧчысь да тэнӧ артмӧдысь, мам кынӧмсяньыд тэныд отсалысь Господь тадзи висьталӧ: – Яков, Менам кесйӧгӧй, эн пов, Ешурун, [Израиль,] Ме бӧрйи тэнӧ.

³ Потласьӧм му вылӧ Ме кисьта ва, косьмӧм му вылын писькӧда юяс. Тэсянь чужысьяс вылӧ Ме кисьта Ассьым лолӧс, тэнад челядь вылӧ – Ассьым бурсиӧмӧс.

⁴ Найӧ кутасны быдмыны юдорса эжӧр пытшкын быдмысь бадь моз.

⁵ Ӧти шуас: «Ме Господьлӧн», мӧд шуас асьсӧ Яковлӧн нимӧн, а кодкӧ ки вылас гижас: «Ме Господьлӧн», и сійӧ нимтас асьсӧ Израиль нимӧн.

⁶ Господь, Израильлӧн Ӧксы да Мездысь, Господь Саваоф тадзи висьталӧ: – Ме – Медводдзаыс и Медбӧръяыс, Меысь кындзи мӧд Енмыс абу.

⁷ Эм-ӧ кодкӧ Ме кодьыс? Мед сійӧ юӧртас, ставсӧ сьӧрсьӧн-бӧрсьӧн висьталас сійӧ кадсяньыс, кор Ме вӧчи важся войтырӧс. Мед висьталас локтанаыс йылысь, юӧртас, мый водзӧ лоӧ.

⁸ Энӧ полӧй да энӧ майшасьӧй! Ме ӧд важысянь нин тіянлы висьталі, водзысянь юӧрті, мый лоӧ. Ті ӧд тӧданныд, мый Ме – Енмыс. Эм-ӧ Ме кындзи мӧд Енмыс? Мӧд зумыд изйыс абу, мӧдӧс Ме ог тӧд.

⁹ Идолъясӧс вӧчысьяс – нинӧм кодьӧсь, налӧн муса бӧлбанъясыс нинӧм вылӧ оз шогмыны. Налы юрбитысьяс оз аддзыны и оз гӧгӧрвоны, та вӧсна найӧс лоӧ янӧдӧма.

¹⁰ Енъясӧс да бӧлбанъясӧс вӧчысьяс нинӧм бурсӧ оз вайны.

¹¹ Идолъяслы юрбитысьясӧс лоӧ янӧдӧма, ӧд налысь идолъяссӧ вӧчӧма морт. Мед найӧ ставныс чукӧртчасны, сувтасны ёрд водзӧ, сэки найӧс полӧм босьтас, ставнысӧ лоӧ янӧдӧма.

¹² Дорччысь вӧчӧ кӧрт нӧш, кучкалӧ сыӧн биа ӧгыръяс вылын донӧдӧм вӧчӧмторсӧ, артмӧдӧ бӧлбанӧс аслас вына киӧн. Ачыс сійӧ сёйны кӧсйӧ, вынтӧммӧ, сылӧн горшыс косьмӧ, рудзмунӧ.

¹³ Пуысь вӧчасьысь [бӧрйӧм] пусӧ мурталӧ кӧвйӧн, вӧчӧ сэтчӧ серпас, ёсь пуртӧн вундалӧ серпас сертиыс, вӧчӧ пусьыс мича мыгӧра морт кодь идолӧс, пуктӧ сійӧс керка пытшкас.

¹⁴ Морт кералӧ сус пуяс, вӧрын бӧрйӧ пожӧм да тупу, колана кадӧдз кольӧ найӧс быдмыны. Сійӧ пуктӧ пуяс, и зэрыс киськалӧ найӧс.

¹⁵ Ломтас вылӧ сійӧ чукӧртӧ пу, сотӧ пусӧ, медым шонтысьны, пестӧ би да пӧжалӧ сы вылын нянь. Тайӧ жӧ пусьыс морт вӧчӧ енмӧс да юрбитӧ сылы, вӧчӧ бӧлбанӧс да копрасьӧ сылы.

¹⁶ Пу джынсӧ морт сотӧ биын, дасьтӧ сы вылын яй да пӧттӧдзыс сёйӧ. Шоналӧм бӧрас сійӧ шуӧ: «Бур, ӧні ме шоналі, и биыс югдӧдӧ меным».

¹⁷ Мӧд джынсьыс сійӧ вӧчӧ енмӧс, вӧчӧ аслыс бӧлбанӧс да юрбитӧ сылы, копрасьӧ сылы да кевмысьӧ: «Мезды менӧ, ӧд тэ – менам ен».

¹⁸ Идолъясӧс вӧчысьяс нинӧм оз тӧдны да оз гӧгӧрвоны, налысь синнысӧ да вежӧрнысӧ тупкӧма, найӧ оз аддзыны да оз гӧгӧрвоны.

¹⁹ Мортыс весиг оз мӧвпыштлы, сылӧн оз тырмы вежӧрыс, оз тырмы мывкыдлуныс, медым шуны: «Пу джынсӧ ме соті биын, биа ӧгыръяс вылын ме пӧжалі нянь, дасьті яй да сёйи сійӧс. А пуыслӧн колясысь ӧмӧй ме вӧча зывӧктор? Ме ӧмӧй понда юрбитны путорлы?»

²⁰ Татшӧм мортыс быттьӧ бус бӧрся вӧтлысьӧ, сылӧн вежӧрыс пемдӧма, и сійӧ шедӧма ылӧгас. Сійӧ оз вермы мездыны асьсӧ да шуны: «Менам киӧн вӧчӧмторйыс – ылӧг».

²¹ Эн вунӧд, Яков, эн вунӧд, Израиль, мый тэ – Менам кесйӧг, Ме вӧчи тэнӧ. Тэ – Менам кесйӧг, Израиль, эн вунӧд Менӧ.

²² Руӧс моз Ме разӧда тэнсьыд лёк вӧчӧмъястӧ, кымӧрӧс моз вешта тэнсьыд мыжъястӧ. Бергӧдчы Ме дінӧ, Ме мезда тэнӧ!

²³ Нимкодясьӧй, енэжъяс, ӧд Господь вӧчис тайӧс. Гораа горӧдӧй, му пыдӧсъяс, гораа нимкодясьӧй, керӧсъяс, нимкодясьӧй, вӧр да вӧрса пуяс, ӧд Господь ньӧбис Яковӧс, Господьӧс лоӧ нимӧдӧма Израильӧс мездӧм пыр.

²⁴ Господь, коді ньӧбис тэнӧ, вӧчис тэнӧ мамыдлӧн кынӧмас, тадзи висьталӧ: – Ме – Господь, Ме вӧчи ставсӧ, ӧтнамӧн шевкниті енэжсӧ, Аслам вына киӧн Ме вольсалі мусӧ.

²⁵ Ме нинӧмӧ бергӧда ылӧгпророкъяслысь индысьпасъяссӧ, эрдӧда туналысьяслысь йӧйталӧмсӧ, шӧйӧвошта тӧдысьясӧс, налысь тӧдӧмлунсӧ вӧча нинӧмӧн.

²⁶ Ме збыльмӧда сійӧ, мый юӧртіс Менам кесйӧгӧй, вӧча сійӧ, мый висьталісны Меӧн мӧдӧдӧмаяс. Ме висьтала, мый Ерусалимӧс бара лоӧ овмӧдӧма, Иуда каръясӧс выльысь лоӧ лэптӧма. Ме выльысь кыпӧда бырӧдӧм каръяс.

²⁷ Джуджыд саридзлы Ме тшӧкта косьмыны, Ме косьта сылысь юяссӧ.

²⁸ Кирлы Ме шуа, мый сійӧ – Менсьым войтырӧс видзысь, сійӧ ставсӧ вӧчас Менам кӧсйӧм серти. Сійӧ шуас Ерусалимлы, тэнӧ пӧ выльысь лоӧ лэптӧма, а крамлы шуас, тэнсьыд подувтӧ пӧ выльысь лоӧ пуктӧма.