Исай 43 - Коми Библия 2023

Енмыс чукӧртӧ Ассьыс войтырсӧ

¹ Господь, коді вӧчис тэнӧ, Яков, коді вӧчис тэнӧ, Израиль, ӧні тадзи висьталӧ: – Эн пов, Ме ньӧби тэнӧ, чукӧсті тэнӧ нимнад, тэ – Менам.

² Кор тэ кутан вуджны ыджыд ва вомӧн, Ме лоа тэкӧд, кор кутан вуджны ю вомӧн, сійӧ оз пӧдты тэнӧ, кор мунан би пыр, сійӧ оз сот и оз чишкав тэнӧ.

³ Ме – Господь, тэнад Енмыд, Израильлӧн вежа Ен, тэнӧ Мездысь. Ме ньӧби тэнӧ, сеті тэ пыдди Египет, Эфиопия да Сева муяс.

⁴ Тэ ёна дона Менам син водзын, Ме радейта тэнӧ, та вӧсна сета тэ пыдди мукӧд йӧзӧс, сета мукӧд войтырӧс, медым мездыны тэнӧ.

⁵ Эн пов, Ме тэкӧд! Асыввывсянь Ме вайӧда тэсянь чужысьясӧс, рытыввывсянь чукӧрта тэнсьыд войтыртӧ.

⁶ Войвывлы Ме тшӧкта: «Сет найӧс!» Лунвывлы Ме шуа: «Эн кут найӧс!» Ылі муясысь вайӧдӧй Менсьым пиянӧс, му помысь – Менсьым нывъясӧс,

⁷ вайӧдӧй быдӧнӧс, кодӧс Ме чукӧсті, кодӧс Ме вӧчи Ачымӧс нимӧдӧм могысь.

Господь – ӧти Ен

⁸ Петкӧд синтӧм войтырӧс, налӧн эм синъяс, но оз аддзыны, петкӧд пельтӧмъясӧс, налӧн эм пельяс, но оз кывны.

⁹ Став войтыръясыс мед чукӧртчасны ӧтлаӧ. Коді на пӧвстысь водзвыв юӧртіс, мый ӧні лоӧ, коді водзвыв висьталіс сійӧ, мый вӧлі нин? Мед найӧ вайӧдасны аддзылысьясӧс висьтавны, мый налӧн водзвыв юӧртӧмыс веськыд, медым кывзысьяс шуасны: «Тайӧ збыль!»

¹⁰ Ті ӧд тӧданныд, мый Ме – Енмыс, – висьталӧ Господь. – Тэ, Израиль, Менам кесйӧгӧй, Ме бӧрйи тэнӧ, медым ті тӧдінныд Менӧ да эскинныд Меным, медым ті гӧгӧрвоинныд, коді Ме. Меӧдз эз вӧв енмыс, и Ме бӧрти оз ло.

¹¹ Ме – Господь, Ме кындзи мӧд мездысьыс абу.

¹² Ме водзвыв висьталі да мезді, юӧрті тіянлы, мый лоас. Тіян пӧвстын эз вӧв мукӧд енмыс. Ті тӧданныд, – висьталӧ Господь, – мый Ме – Енмыс,

¹³ водзысяньыс Ме – Сійӧ жӧ. Некод оз мезды Менам киысь, некод оз вермы вежны сійӧ, мый Ме вӧча.

Енмыс петкӧдӧ Ассьыс войтырсӧ Вавилонысь

¹⁴ Господь, тіянӧс Мездысь, Израильлӧн вежа Ен, тадзи висьталӧ: – Тіян вӧсна Ме мӧдӧда Вавилонӧ тышкайӧзӧс, медым жугӧдны сэні став игансӧ. Калдея войтыр пышъясны корабльяс вылын, кӧні водзынджык гажӧдчисны.

¹⁵ Ме, Господь, тіян вежа Енныд, Израильӧс Вӧчысь, тіян Ӧксыныд!

^16-17 Господь восьтіс саридз пыр мунан туй, джуджыд ва пыр мунан туй, петкӧдіс тарантасъяс, вӧвъясӧс да вына тышкайӧзӧс – найӧ ставныс усисны, эз чеччыны, найӧ сись моз кусісны-сылісны. Господь тадзи висьталӧ:

¹⁸ – Важсӧ энӧ казьтывлӧй, кольӧмаыс йылысь энӧ мӧвпалӧй.

¹⁹ Со, Ме вӧча выльӧс, ӧні сійӧ тыдовтчас – онӧ ӧмӧй тайӧс казялӧй? Ме лӧсьӧда овтӧминын туй, кушинын юяс.

²⁰ Шакалъяс да страусъяс пондасны ошкыны Менӧ, ӧд овтӧминын Ме сета ва, кушинын лӧсьӧда юяс, медым юктӧдны Ассьым бӧрйӧм войтырӧс.

²¹ Тайӧ войтырсӧ Ме Аслым вӧчи, сійӧ кутас кыпӧдны Меным ошкӧмсӧ.

²² Но тэ, Яков, эн шыасьлы Ме дінӧ, эн кесъявлы Меным, Израиль.

²³ Тэ эн вайлы Меным сотан вись пыдди ыжъясӧс, вись вайӧмӧн эн пыдди пукты Менӧ. Ме эг сьӧктӧдлы тэнӧ, эг тшӧкты вайны Меным нянь, эг тшӧкты вайны чӧскыд ӧвтанторъяс.

²⁴ Тэ эн ньӧблы Меным чӧскыд дука турунъяс, эн пӧткӧдлы Менӧ пемӧсъяслӧн госӧн. Но тэ сьӧктӧдлін Менӧ аслад мыжъясӧн, мудзтӧдлін Менӧ аслад лёк вӧчӧмъясӧн.

²⁵ Ас ради Ме Ачым чышкышта тэнсьыд лёк вӧчӧмъястӧ, тэнсьыд мыжъястӧ ог нин казьтывлы.

²⁶ Сувтам ёрд водзӧ. Тэ мыжав Менӧ! Петкӧдлы, мый тэ абу мыжа.

²⁷ Тэнад батьыд мыж вӧчис, тэнад веськӧдлысьясыд Меным паныд кыпӧдчисны.

²⁸ Та вӧсна Ме янӧді крамын кесъялысьясӧс, лэдзи бырӧдны Яковӧс, лёкӧдны Израильӧс.