Исай 42 - Коми Библия 2023

Господьлӧн Кесъялысь

¹ Со, Менам Кесъялысьӧй, Ме сета Сылы вын, Ме бӧрйи Сійӧс, Менам сьӧлӧмӧй нимкодясьӧ Сыӧн. Ме мӧдӧда Сы вылӧ Ассьым лолӧс. Сійӧ ваяс веськыда мыждӧм быд войтырлы.

² Сійӧ оз горзы, оз кыпӧд Ассьыс гӧлӧс шысӧ, ывлаын Сійӧс он кыв.

³ Чегыштӧм идзас Сійӧ оз чег, дзузган би оз кусӧд. Сійӧ ваяс веськыда мыждӧм.

⁴ Сійӧ оз лигышмун, оз жебмы, Сійӧ вынсьӧдас му вылын веськыда мыждӧм. Сылысь велӧдӧмсӧ виччысьӧны саридз дорын олысьяс.

⁵ Господь Ен вӧчис енэжсӧ да шевкнитіс сійӧс, вӧчис му да ставсӧ, мый сэні быдмӧ. Мувывса войтырлы Сійӧ сетӧ олӧм, мувывса йӧзлы – ловшы. Сійӧ тадзи висьталӧ:

⁶ – Ме, Господь, чукӧсті тэнӧ, медым вайны веськыдлунсӧ. Ме кута тэнӧ киӧдыд, Ме видза тэнӧ. Тэ лоан йитӧдӧн Ме да йӧз костын, лоан югыдӧн став войтыръяслы,

⁷ медым синтӧмъяслысь восьтны синсӧ, дорӧмаясӧс петкӧдны дзескыдінысь, пемыдын пукалысьясӧс – пемыдінысь.

⁸ Ме – Господь, тайӧ Менам нимӧй. Ассьым дзирдлунӧс Ме некодлы ог сет. Ошкӧмсӧ, мый лӧсялӧ Меным, ог сет идолъяслы.

⁹ Сійӧ, мый Ме висьталі, збыльмис, а ӧні Ме юӧрта локтанаыс йылысь, висьтала тіянлы, мый эз на ло.

Выль сьыланкыв

¹⁰ Сьылӧй Господьлы выль сьыланкыв, ошкӧй Сійӧс быд му пельӧсын! Ошкӧй Сійӧс, саридз вывті кывтысьяс и саридзын олысьяс. Ошкӧй Сійӧс, саридздорса муяс и саридз дорын олысьяс.

¹¹ Мед гораа ошкасны кушинын да сыбердса каръясын олысьяс, сиктъясын олысь Кедарлӧн рӧдыс. Мед гораа нимкодясясны керӧсвывса олысьяс, налӧн гӧлӧс шыныс мед юргас керӧс вывсянь.

¹² Мед кыпӧдасны ошкӧм Господьлы, мед Сійӧс ошкасны саридз дорын олысьяс!

¹³ Господь петас тышкаморт моз, шыпурта моз Сійӧ тырас скӧрлунӧн, Сійӧ гораа горӧдас, чукӧстас тыш вылӧ, Сійӧ петкӧдлас Ассьыс вынсӧ паныд сувтысьяслы.

¹⁴ – Ме дыр чӧв олі, кутчыси, весиг кыв эг шу, но ӧні понда горзыны кага вайысь ань моз, понда апавны сынӧдсӧ.

¹⁵ Ме кушта керӧсъяс да мылькъяс, чишкала сэтысь став быдмӧгсӧ, юяс вӧча діясӧн, тыяс косьта.

¹⁶ Ме нуӧда синтӧмъясӧс сійӧ туйӧдыс, кыті найӧ эз на ветлыны, нуӧда найӧс тӧдтӧм туйӧд. Пемыдсӧ на водзвылын Ме вӧча югыдӧн, чукля туйяссӧ – веськыдӧн. Тадзи Ме вӧча налы, ог эновт найӧс.

¹⁷ Сэки пышъясны, яналасны идол вылӧ лача кутысьяс, кодъяс шуалӧны бӧлбанъяслы: «Ті – миян енъяс!»

Израиль войтыр синтӧм-пельтӧмӧсь

¹⁸ Кывзӧй, пельтӧмъяс! Видзӧдӧй да аддзӧй, синтӧмъяс!

¹⁹ Коді Менам кесйӧг кодь синтӧм, коді Меӧн мӧдӧдӧм юӧртысь кодь пельтӧм, коді Меӧн бӧрйӧма кодь синтӧм, коді Господьлӧн кесйӧг кодь синтӧм?

²⁰ Тэ унатор аддзылін, но нинӧм эн казяв, тэнад пельыд вӧлі восьса, но тэ эн кыв.

²¹ Аслас веськыдлуныс вӧсна Господь нимӧдіс-ыдждӧдліс Ассьыс Индӧдсӧ.

²² Но тайӧ войтырсӧ куштӧма, налысь ставсӧ мырддьӧма. Найӧс ставнысӧ кӧрталӧма да шыбитӧма пемыд гуӧ, йӧртӧма дзескыдінӧ. Найӧ лоины тышын шедӧдӧмторйӧн, некод оз мезды найӧс, некод оз тшӧкты бӧр вайӧдны найӧс.

²³ Коді тіян пӧвстысь кутас кывзыны тайӧс? Водзӧвылӧ коді кутас сюся кывзыны?

²⁴ Коді лэдзис куштыны Яковӧс, коді сетіс мырддялысьяслы Израильӧс? Эз-ӧ Господь, кодлы паныд ми мыжсӧ вӧчим? Найӧ эз кӧсйыны ветлыны Сылӧн туйясӧд, эз овны Сылӧн Индӧдыс серти.

²⁵ Та вӧсна Господь кисьтіс на вылӧ Ассьыс скӧрлунсӧ да ярлунсӧ – пансис чорыд тыш. Тайӧ биыс чишкаліс найӧс быд боксянь, но найӧ эз гӧгӧрвоны тайӧс, биыс сотіс найӧс, но найӧ нинӧмӧ эз велавны.