Исай 40 - Коми Библия 2023

Ен войтырлы ышӧдана кыв

¹ Бурӧдӧй, бурӧдӧй Менсьым войтырӧс, – тшӧктӧ тіян Енныд. –

² Меліа висьталӧй Ерусалимлы, юӧртӧй сылы, мый сылӧн сьӧкыдалан кадлы воис пом, мый сылысь мыжъяссӧ прӧститӧма. Господь мынтысис сылы кык пӧвстӧн став сылӧн мыжъясысь.

³ Кылӧ горзысьлӧн шы: – Овтӧминын лӧсьӧдӧй туй Господьлы, увтасінын вӧчӧй веськыд туй миян Енлы!

⁴ Быд ковтыс мед тырас, быд керӧс да мыльк мед ляпкалас, чукыльяс мед веськаласны, гуранъяс мед шыляласны!

⁵ Сэки тыдовтчас Господьлӧн дзирдлуныс, и ставӧн аддзасны, мый Господь висьталіс.

⁶ Ме кылі гӧлӧс шы: – Юӧрт! Ме юалі: – Мый меным юӧртнысӧ? – Мортыс – турун кодь, сылӧн мичлуныс – дзоридз кодь.

⁷ Господьлӧн пӧльыштӧмысь турун косьмӧ, дзоридз нярмӧ. Збыльысь, йӧзыс турун кодьӧсь.

⁸ Турун косьмӧ, дзоридз нярмӧ, а миян Енлӧн кывйыс помтӧг олӧ.

⁹ Сион, бур юӧр вайысь, кыпӧдчы джуджыд керӧс вылӧ! Ерусалим, бур юӧр вайысь, висьтавлы гора шыӧн! Эн пов, висьтавлы иудаса каръяслы: «Со, тіян Енныд!»

¹⁰ Со, ыджыд вынӧн локтӧ Господь Ыджыдыс, Сійӧ веськӧдлӧ вына кинас. Сыкӧд ставыс, мый Сійӧ шедӧдіс, Сылӧн син водзын ставыс, мый Сійӧ Аслыс босьтіс.

¹¹ Ыж видзысь моз Сійӧ видзӧ Ассьыс чукӧрсӧ, баляясӧс босьтӧ ки вылас да новлӧдлӧ Аслас морӧс бердын, вайсьӧм ыжъясӧс нуӧдӧ тӧждысьӧмӧн.

¹² Коді мурталіс васӧ аслас соддзӧн, коді мурталіс енэжсӧ кинас, коді веситіс мувывса буссӧ, вескиӧн тӧдмаліс керӧсъяслысь сьӧктасӧ?

¹³ Коді веськӧдліс Господьлӧн лолӧн, туйдӧдіс-велӧдіс Сійӧс?

¹⁴ Кодлысь Сійӧ юасис, коді вежӧрсьӧдіс Сійӧс, велӧдіс ветлыны веськыд туйӧд, коді сетіс Сылы тӧдӧмлун, индіс Сылы мывкыдлуныслысь туйсӧ?

¹⁵ Войтыръяс – пельсаын ва войтъяс кодьӧсь, вески вылын бус чиръяс кодьӧсь. Лыа чиръясӧс моз Господь кыпӧдӧ діяс.

¹⁶ Ливанса пуяс да пемӧсъяс абу тырманаӧсь, медым пестыны би да вись вайны Господьлы.

¹⁷ Сы водзын мувывса войтыръяс нинӧм кодьӧсь, Сылы найӧ абутӧмысь этшаджык на.

¹⁸ Кодкӧд ті ӧткодяланныд Енсӧ, аддзанныд-ӧ нӧшта Сы коддьӧмсӧ?

¹⁹ Серпасалысь сывдӧ бӧлбанӧс, вӧчасьысь эжӧ сійӧс зарниӧн, вӧчӧ сылы эзысь чепторъяс.

²⁰ А гӧль морт, коді оз вермы тадзи вӧчнысӧ, бӧрйӧ сісьмытӧм пу, корсьӧ аслыс кужысь вӧчасьысьӧс, медым вӧчны зумыда сулалысь бӧлбанӧс.

²¹ Ті ӧмӧй онӧ тӧдӧй, ті ӧмӧй энӧ кывлӧй? Тіянлы ӧмӧй эз висьтавлыны водзысяньыс, ті ӧмӧй му пуксьӧмсяньыс онӧ вежӧртӧй тайӧс?

²² Господь пукалӧ му кытш весьтын, а му вылас олысьясыс Сылы чирк кодьӧсь. Сійӧ шевкнитіс енэжсӧ вонйӧс моз, паськӧдіс сійӧс дӧрачомйӧс моз, медым сэні овны.

²³ Ыджыдалысьясӧс Сійӧ лыддьӧ нинӧмӧн, мувывса юралысьясӧс нинӧмӧ пуктӧ.

²⁴ Найӧс сӧмын на пуктӧма-кӧдзӧма, найӧ муртса на вужъясьӧмаӧсь му пытшкас, но кор Господь пӧльыштас на вылӧ, найӧ косьмасны, и тӧвнырыс нӧбӧдас найӧс идзасӧс моз.

²⁵ Кодкӧд ті ӧткодяланныд Менӧ, эм-ӧ кодкӧ Ме кодьыс, – юалӧ вежа Ен.

²⁶ Лэптӧй синнытӧ вывлань да видзӧдлӧй: коді ставсӧ тайӧс вӧчис? Сійӧ, коді вӧчис енэжвывса югзьӧданторъяс, тӧдӧ налысь лыдсӧ, ставнысӧ шуӧ нимнас. Найӧ ставныс ӧтитӧг мыччысьӧны – татшӧм ыджыд Сылӧн выныс да вынйӧрыс!

²⁷ Яков, мыйла тэ шуан, мыйла, Израиль, тэ висьталан, мый Господь оз аддзы тэнсьыд туйтӧ, мый тэнад Енмыд вунӧдіс тэнсьыд могтӧ?

²⁸ Тэ ӧмӧй он тӧд, тэ ӧмӧй эн кывлы, мый Господь – помтӧг олысь Ен, Сійӧ вӧчис став муюгыдсӧ, Сійӧ оз мудз, оз жебмы. Сылысь мывкыдлунсӧ он туяв.

²⁹ Мудзӧмалы Сійӧ сетӧ вын, жебмӧмаӧс ёнмӧдӧ.

³⁰ Весиг зонъяс мудзлӧны да жебмӧны, том йӧз усьлӧны кок йывсьыныс,

³¹ а Господь вылӧ лача кутысьяс бара на вынсялӧны: кутш моз найӧ шевкнитасны борднаныс, котӧртасны, но оз мудзны, мунасны, но оз жебмыны.