Исай 38 - Коми Библия 2023

Господь кылӧ Езекейлысь кевмысьӧмсӧ

¹ Сійӧ кадас Езекей чорыда висьмис да вӧлі куланвыйын. Сы дінӧ локтіс Исай пророк, Амослӧн пиыс, да шуис: «Господь тадзи висьталӧ: ”Висьтав гортсаыдлы ассьыд бӧръя кӧсйӧмтӧ, ӧд тэ он бурд, но кулан”».

² Сэки Езекей бергӧдчис стенланьыс да кевмысис Господьлы:

³ «Господьӧй, казьтышт, мый ме олі Тэ водзын веськыда, став сьӧлӧмсянь кесъялі Тэныд да вӧчи Тэ водзын шогманасӧ». Сэсся Езекей ёна бӧрддзис.

⁴ Исайлы вӧлі Господьсянь кыв:

⁵ «Мун да висьтав Езекейлы, мый Господь, Давид пӧльыдлӧн Ен, тадзи висьталӧ: ”Ме кылі тэнсьыд кевмӧмтӧ да аддзи тэнсьыд синватӧ. Ме сета тэныд овны нӧшта дас вит во.

⁶ Ме мезда тэнӧ да тайӧ карсӧ ассурса ӧксылӧн киысь. Ме видза тайӧ карсӧ”.

⁷ Со, Господьсянь тэныд пас, мый Сійӧ вӧчас Аслас кӧсйысьӧм серти:

⁸ ”Ахазлӧн пос вылӧ шондісянь усьӧм вуджӧрсӧ Ме бӧр бергӧда дас тшупӧдӧн бӧрлань”». И шондісянь усьӧм вуджӧрыс бӧр бергӧдчис дас тшупӧдӧн бӧрлань.

Езекейлӧн кевмысьӧм

⁹ Со кыдзи кевмысис иудаса Езекей ӧксы, кор сійӧ висис, а сэсся бурдіс.

¹⁰ Ме мӧвпышті: ме олі сӧмын джын нэмӧс на, но меным ковмас мунны пыдӧстӧминлӧн дзиръя пыр, менам эз нин кольны олан лунъясӧй.

¹¹ Ме мӧвпышті: ме ог нин аддзы Господьӧс, ог аддзы Сійӧс ловъяяслӧн му вылын. Ме ог нин вермы видзӧдны йӧзыс вылӧ тайӧ му вылас олысьяскӧд ӧтвыв.

¹² Ыж видзысьлысь чомсӧ моз менсьым оланінӧс разьӧма, ылыстӧма ме дінысь. Ме гартышті ассьым олӧмӧс, кыдзи дӧра кыысь гартыштӧ кыӧм дӧрасӧ, ӧні Господь вундас менӧ кысян стан бердысь. Лун и вой ме виччыси, мый Тэ мӧдӧдан меным олӧм пом.

¹³ Ме виччыси асылӧдз, а Сійӧ лев моз жуглӧ менсьым лыясӧс. Лун и вой ме виччыси, мый Тэ мӧдӧдан меным олӧм пом.

¹⁴ Ме курликті тури моз, чивзі чикыш моз, гажтӧмтчи гулю моз, син мудзтӧдз видзӧді енэжас. Господьӧй, ме сьӧкыдала, отсав меным!

¹⁵ Мый меным шунысӧ? Господь мый шуис меным, сійӧс и вӧчис. Курыда шогсьӧмӧн ме колляла ассьым олан воясӧс.

¹⁶ Господьӧй, йӧзыс тадзи олӧны, татшӧм жӧ менам олӧмӧй. Но Тэ бурдӧдін менӧ, видзин менсьым олӧмӧс.

¹⁷ Курыд шогыс бергӧдчис меным бур вылӧ, Тэ мездін менӧ кулӧмысь, став менсьым мыжъясӧс Тэ шыбитін Аслад мышку сайӧ.

¹⁸ Оз пыдӧстӧминыс аттьӧав Тэнӧ, оз кулӧмыс ошкы Тэнӧ, оз гортйын куйлысьяс лача кутны Тэнад эсканлуныд вылӧ.

¹⁹ Но сӧмын ловъяяс ошкӧны Тэнӧ, кыдзи ме ӧні ошка. Батьыс висьталас челядьыслы Тэнад эсканлуныд йылысь.

²⁰ Господь мездас менӧ! Ми кутам сьывны-ворсны Господьлӧн крамын став олӧм чӧж.

²¹ Исай тшӧктіс вайны косьтӧм инжир да пуктыны Езекейлы орзьӧминас, медым сійӧ бурдіс.

²² А Езекей юаліс: «Мый серти ме тӧдмала, мый ме бара верма мунны Господьлӧн крамӧ?»