Исай 32 - Коми Библия 2023

Веськыда юралӧм

¹ Со, ӧксы кутас юравны веськыдлуныс серти, юралысьяс кутасны веськӧдлыны Индӧдыс серти.

² Быдӧн на пиысь лоӧ тӧвнырысь вевттьӧдӧн, бушколысь сайӧдӧн, кос муын ва петанінӧн, пӧжан муын джуджыд керӧслӧн вуджӧрӧн.

³ Видзӧдысьлӧн синмыс оз нин куньсьы, кывзысьлӧн пельыс кутас сюся кывзыны.

⁴ Тэрмасьысь велӧдчас мӧвпавны коланасӧ, пыськыль кывъя морт пондас ясыда сёрнитны.

⁵ Мывкыдтӧм мортӧс оз нин кутны шуны пыдди пуктанаӧн, наян мортӧс оз нин шуны веськыдӧн.

⁶ Ӧд мывкыдтӧм мортлӧн сёрниыс мывкыдтӧм, сійӧ мӧвпалӧ лёк вӧчӧм йылысь, сылӧн оласногыс шогмытӧм, сійӧ омӧльтӧ Господьӧс, няньтӧг кольӧ тшыг мортӧс, горш косьмысьлы оз сет ва.

⁷ Наян морт вӧчӧ наяна, сійӧ мӧвпалӧ лёк вӧчӧм йылысь, ылӧгнас сійӧ бырӧдӧ коньӧр мортӧс, коді збыльсӧ висьталӧ.

⁸ А пыдди пуктана морт мӧвпалӧ бур вӧчӧм йылысь, сійӧ зумыда кутчысьӧ бур вӧчӧмас.

⁹ Тӧждысьтӧм аньяс, чеччӧй, кывзӧй менӧ! Шог тӧдтӧм нывъяс, сюся кывзӧй менсьым кывъясӧс!

¹⁰ Коляс во да некымын лун, и ті дзӧрмӧн повзянныд, шог тӧдтӧмъяс! Ӧд оз нин во виноград чукӧртан кадыс, вотӧс чукӧртан кадыс оз нин ло.

¹¹ Полӧй-тіралӧй, тӧждысьтӧмъяс, дзӧрмӧн тіралӧй, шог тӧдтӧмъяс! Пӧрччӧй паськӧмнытӧ, пасьталӧй шогалан паськӧм!

¹² Шогсьӧй да кучкалӧй асьнытӧ морӧсаныд бур видз-му вӧсна, вотӧса виноград пуяс вӧсна,

¹³ Менам войтырлӧн му вӧсна, ӧд сэні кутас быдмыны йӧн да ёг турун. Шогсьӧй гажӧдчысь керкаяс вӧсна, став гажӧдчысь карыс вӧсна,

¹⁴ ӧд ӧксылысь керкасӧ лоӧ эновтӧма, ыджыд шыа карсӧ лоӧ кольӧма. Керӧс вылын сулалысь изкар пыр кежлӧ лоӧ вӧлявывса осёлъяслы сайӧдчанінӧн, тайӧ керӧс вылын кутасны йирсьыны ыж-мӧс.

¹⁵ Тадзи лоӧ, кытчӧдз вылісянь оз лэччы миян вылӧ Енлӧн лолыс. Сэки овтӧмин лоӧ сад йӧрӧн, а сад йӧрыс лоӧ вӧр кодь ыджыдӧн.

¹⁶ Сэки овтӧминын пондас ыджыдавны веськыда мыждӧм, сад йӧрын лоӧ веськыдлун.

¹⁷ Веськыдлуныс ваяс лӧнь олӧм, лӧньлун да повтӧмлун нэмъяс кежлӧ.

¹⁸ Сэки менам войтырӧй кутас овны лӧнинын, оланінын, кӧні нинӧмысь повнысӧ, шойччанінын, кӧні нинӧм вӧсна майшасьнысӧ.

¹⁹ Вӧрсӧ пӧрӧдас шер, карсӧ лоӧ дзикӧдз кисьтӧма,

²⁰ но ті шудаӧсь, ті понданныд кӧдзны быдлаын, кӧні эм ва, тіян ӧшъясныд да осёлъясныд пондасны йирсьыны сэні.