Исай 31 - Коми Библия 2023

Ерусалимӧс дорйӧ Господь, а оз Египет

¹ Курыд шог налы, кодъяс мунӧны Египетӧ отсӧгла! Найӧ лача кутӧны вӧвъяс вылӧ, тарантасъяслӧн уна лыдыс вылӧ да верзьӧмаяслӧн выныс вылӧ, а Израильлӧн вежа Ен вылӧ оз видзӧдны, Господь дінӧ отсӧгла оз шыасьны.

² Но Господьлӧн мывкыдлуныс ыджыд. Сійӧ мӧдӧдас сьӧкыдлун, Ассьыс кывсӧ оз веж. Сійӧ сувтас лёк вӧчысьяслы паныд да налы паныд, кодъяс отсалӧны мыж вӧчысьяслы.

³ Египетсаяс – йӧз, абу Ен, налӧн вӧвъясыс – вир-яй, абу лов. Господь лэптас Ассьыс кисӧ, и отсӧг сетысьяс крукасясны, а кодлы отсалісны, найӧ тшӧтш усясны – ставныс ӧтвылысь куласны.

⁴ Господь меным тадзи висьталіс: – Кыдзи лев, том лев, равзӧ аслас кыйдӧс весьтын да оз пов ыж видзысьясысь, налӧн уна лыдысь да горзӧмысь, тадзи Господь Саваоф лэччас Сион керӧс вылӧ, медым вермасьны тайӧ керӧсыс вӧсна.

⁵ Аслас поз весьтын шевкъялысь лэбач моз Господь Саваоф вевттяс Ерусалим, доръяс и видзас сійӧс, бурсьӧлӧмтчас и мездас сійӧс.

⁶ Израиль войтыр, бергӧдчӧй Сы дінӧ, код дінысь ті ёна ылыстчинныд!

⁷ Сійӧ лунӧ ті ставныд шыбитанныд ассьыныд эзысь да зарни идолъяснытӧ, мыжа киӧн вӧчӧмторъяснытӧ.

⁸ Ассур войтыр шыпуртысь кулас, но оз мортлӧн шыпуртысь. Шыпурт бырӧдас найӧс, но оз мортлӧн шыпуртыс. Найӧ пышъясны шыпуртысь, но налысь зонъяссӧ уджӧдасны вот мынтӧм могысь.

⁹ Ёна повзьӧмнысла вошас налӧн зумыд лачаныс, налӧн юралысьясыс повзясны дӧрапасысь да пышъясны, – висьталӧ Господь, кодлӧн биыс ӧзйӧ Сионын, донӧдӧм пачыс – Ерусалимын.