Исай 3 - Коми Библия 2023

Гудыр кад Ерусалимын

¹ Со, Ыджыдыс, Господь Саваоф мырддяс Ерусалимлысь да Иудалысь ставсӧ, мый вылӧ найӧ лача кутӧны: став чукӧртӧм няньсӧ да заптӧм васӧ,

² тышкайӧзсӧ да налысь вына веськӧдлысьяссӧ, ёрдысьяссӧ да пророкъяссӧ, тунасьысьяссӧ да юрнуӧдысьяссӧ,

³ тышкакотырӧн веськӧдлысьяссӧ, юралысьяссӧ да туйдӧдысьяссӧ, тшыкӧдчысьяссӧ да керысьяссӧ.

⁴ Сійӧ пуктас том зонъясӧс веськӧдлыны наӧн, челядь кутасны ыджыдавны на вылын.

⁵ Йӧзыс кутасны дзескӧдны ӧта-мӧднысӧ, быдӧн – ассьыс матыссасӧ. Том зон кутас омӧльтны пӧрысь мортӧс, некытчӧ туйтӧм кутас лёкӧдны пыдди пуктанаӧс.

⁶ Сэки морт матыстчас аслас матыссаыс дінӧ, шуас аслас вокыслы: «Тэнад эм на мый пасьтавнытӧ, ло миян юралысьӧн, веськӧдлы тайӧ пузувтӧм мунас».

⁷ Но сійӧ воча шуас: «Ме ог вермы бурдӧдны тіянӧс! Менам керкаын абу няньыс ни паськӧмыс, мыйла войтырлы татшӧм юралысьыс?»

⁸ Киссис Ерусалим, усис Иуда, ӧд налӧн сёрниныс да уджъясныс – Господьлы паныд, найӧ паныд кыпӧдчӧны дзирдлуна Господьлы.

⁹ Налӧн чужӧмас гижӧма, мый найӧ – лёк вӧчысьяс. Содомын олысьяс моз найӧ восьсӧн да яндысьтӧг ошйысьӧны асланыс мыжъясӧн. Курыд шог налы! Найӧ асьныс ӧшлӧны ас выланыс лёксӧ.

¹⁰ Висьталӧй веськыда олысьлы, мый сылы бур лоӧ, ӧд сійӧ кутас нимкодясьны аслас уджъяслӧн вотӧснас.

¹¹ Но курыд шог лёк вӧчысьлы! Сылы лоӧ мынтысьӧма уджъясыс серти.

¹² Челядь дзескӧдӧны менсьым войтырӧс, аньяс ыджыдалӧны сы вылын. Вескӧдлысьяс кежӧдӧны сійӧс ылӧг туй вылӧ, нуӧдӧны чукля туйӧд.

Господь мыждӧ

¹³ Господь сувтіс, медым ёрд вылын шуны веськыд кыв, Сійӧ чеччис, медым мыждыны войтыръясӧс.

¹⁴ Господь кутас мыждыны Аслас войтырлысь юрнуӧдысьясӧс да веськӧдлысьясӧс: – Ті куштінныд виноград йӧр, гӧльяслысь мырддялӧм эмбурнас тыртінныд керкаяснытӧ.

¹⁵ Кыдзи ті лысьтанныд дзескӧдны Менсьым войтырӧс? Ті нартитанныд гӧльясӧс, – висьталӧ Ыджыдыс, Господь Саваоф.

Мый виччысьӧ сионса нывъясӧс?

¹⁶ Господь шуис: сионса нывъяс тшапӧсь, ветлӧдлӧны юрнысӧ чатӧртӧмӧн, ыштӧдӧны видзӧдласнаныс, восьлалӧны дзирнясьӧмӧн, зёльгӧны кокнысӧ мичмӧдан чепъясӧн.

¹⁷ Таысь Господь кушӧдз шырас сионса нывъяслысь юрнысӧ, Сійӧ янӧдас найӧс.

¹⁸ Сійӧ лунӧ Господь нетшыштас на вылысь став мичмӧдчанторсӧ: кок мичмӧдан чепъяс, кодзув да тӧлысь сяма вӧчӧмторъяс,

¹⁹ исергаяс, сикӧтшъяс, вевттьӧдъяс, юрвевттьӧдъяс, сойкытшъяс, вӧньяс, чӧскыд ӧвтанторъяс, амулетъяс,

²⁰ чунькытшъяс да ныркытшъяс,

²¹ мича вылыс и улыс паськӧм, чышъянъяс, сьӧм турыш,

²² югъялысь вӧсни паськӧм, юрвевттьӧдъяс да чужӧмвевттьӧдъяс.

²³ Чӧскыд дук пыдди на дорысь кутас ӧвтны лёк дукӧн, вӧнь пыдди налы лоӧ гез, читкыля юрси пыдди – куш плеш, мича паськӧм пыдди – шогалан паськӧм, мичлун пыдди – юръяндзим.

²⁴ Сион, тэнад айуловыд куласны шыпуртысь, тэнад тышкайӧзыд усясны тышын.

²⁵ Сионлӧн дзиръяясыс кутасны шогсьыны-бӧрдны, Сион кар кутас пукавны му вылын эновтӧм ань моз.