Исай 26 - Коми Библия 2023

Ошкана сьыланкыв

¹ Сійӧ лунӧ Иуда муын кутасны сьывны татшӧм сьыланкыв: – Миян эм зумыд кар, оз стенъяс да тымӧдъяс видзны сійӧс, а Енмыс видзӧ сійӧс.

² Восьтӧй дзиръяястӧ, мед пырас сэті веськыда олысь войтыр, коді кутчысьӧ эсканлунас.

³ Кодлӧн лолыс зумыд, сійӧс Тэ видзан тырвыйӧ лӧньлунас, ӧд Тэ вылӧ сійӧ лача кутӧ.

⁴ Лачанытӧ пыр кутӧй Господь вылӧ, ӧд Господь Ен – нэмъяс чӧж сулалысь изкырта.

⁵ Сійӧ уськӧдіс вылын олысьясӧс, муас шыбитіс налысь вылын сулалысь карсӧ.

⁶ Ӧні сійӧс талялӧны кокнаныс, гӧльяс ветлӧны сы вывті, коньӧръяс тувччалӧны сэті.

⁷ Веськыда олысьлӧн туйыс шыльыд. Тэ дасьтан сылы веськыд туй.

⁸ Тэнад веськыда мыждан туй вывті мунігӧн ми лача кутам Тэ вылӧ, Господьӧй, ёна кӧсъям шыасьны Тэнад нимӧ, казьтывны Тэ йылысь.

⁹ Войнас менам сьӧлӧмӧй гажтӧмтчӧ Тэысь, асывнас ме пытшкын лолӧй корсьысьӧ Тэнӧ. Кор му вылас ыджыдалӧ Тэнад веськыда мыждӧмыд, сэки му вылас олысьяс велӧдчӧны веськыдлунас.

¹⁰ Лёк вӧчысь дінӧ кӧ бурсьӧлӧмтчасны, сійӧ оз велӧдчы веськыда овны. Веськыда олысьяслӧн му вылын сійӧ водзӧ кутас лёксӧ вӧчны, оз аддзы, мый Господь ыджыдалӧ.

¹¹ Господьӧй, Ассьыд китӧ Тэ лэптӧмыд вылӧ, но лёк вӧчысьяс оз аддзыны сійӧс. А кор аддзасны, лоӧ юръяндзим налы, кодъяс мустӧмтӧны Тэнсьыд войтыртӧ. Тэныд паныд сувтысьясӧс сотас би.

¹² Господьӧй, Тэ сетан миянлы лӧньлун, ӧд Тэсянь ставыс, мый ми вӧчам да шедӧдам.

¹³ Господьӧй, миян Енмӧй, Тэ пыдди миян вылын ыджыдалісны мукӧд ыджыдъяс. Но ӧні ми шыасям сӧмын Тэ дінӧ.

¹⁴ Найӧ кулӧмаӧсь, оз ловзьыны, гортйын куйлӧны, оз нин чеччыны, ӧд Тэ мыждін да бырӧдін найӧс, бырӧдін весиг на йылысь казьтывлӧмсӧ.

¹⁵ Господьӧй, Тэ содтін Аслад войтырлысь лыдсӧ, налысь лыдсӧ содтӧмӧн Тэ нимӧдін Асьтӧ, Тэ паськӧдін Аслад войтырлысь олан мусӧ.

¹⁶ Господьӧй, сьӧкыдсӧ нуигӧн Тэнад войтырыд корсьысисны Тэнӧ. Кор Тэ мыждылін найӧс, найӧ ышлолалӧмӧн кевмысьлісны Тэныд.

¹⁷ Кыдзи нӧбасьысь ань сьӧкыдалӧ кага чужтігас да горзӧ дойяссьыс, татшӧмӧсь ми вӧлім Тэ водзын, Господьӧй.

¹⁸ Нӧбасьысь ань моз ми сьӧкыдалім, но чужтім сӧмын тӧвру. Ми эгӧ вайӧй мездмӧмсӧ муыслы, эгӧ пасьвартӧй муюгыдас олысьясӧс.

¹⁹ Господьӧй, Тэнад кулӧмаясыд ловзясны, шойяс чеччасны дзебанінысь. Садьмӧй да нимкодясьӧй, му пытшкын куйлысьяс! Тэнад югыд лысваыд юкталӧ мусӧ, и муыс бӧр сетас кулӧмаясӧс.

Матыстчӧ мыждан лун

²⁰ Менам войтырӧй, мунӧй асланыд гортӧ да йигнасьӧй! Дзебсьӧй дженьыдик кад кежлӧ, кытчӧдз оз лӧнь Господьлӧн скӧрлуныс.

²¹ Со, Господь петӧ Аслас оланінысь, медым мыждыны мувывса олысьясӧс налӧн мыжъясысь. Сэки муыс восьтас йӧзлысь кисьтӧм вирсӧ, оз нин кут дзеблавны виӧмаясӧс.