Исай 25 - Коми Библия 2023

Енмӧс ошкана сьыланкыв

¹ Господьӧй, Тэ – менам Енмӧй! Ме ыдждӧдла Тэнӧ, ошка Тэнсьыд нимтӧ. Тэ вӧчин шензьӧданаторъяс, важысянь мӧвпыштӧмторъяс, Тэнад вӧчӧмторъясыд збыльӧсь да эсканаӧсь.

² Карсӧ Тэ кисьтін, сійӧ лои из чукӧрӧн, изкарыс лои лӧп чукӧрӧн. Нартитысьяслысь керкаяссӧ жуглӧма, найӧс некор нин бӧрсӧ оз лэптыны.

³ Та вӧсна вына войтыр нимӧдӧ Тэнӧ, скӧр войтырлӧн каръясын полӧны Тэысь.

⁴ Тэ дорйин гӧльясӧс, видзин коньӧръясӧс налӧн сьӧкыд кадӧ. Тэ вӧлін сайӧдчанінӧн ыджыд тӧвнырысь, вуджӧрӧн – шонді пӧжӧмысь. Ӧд дзескӧдысьяслӧн ловшыныс стенлы паныд пӧльтысь тӧвныр кодь.

⁵ Кыдзи Тэ дугӧдан шонді пӧжӧмсӧ овтӧминын, тадзи Тэ ланьтӧдан паныд сувтысьяслысь шызьӧмсӧ. Кыдзи кымӧрлӧн вуджӧрыс тупкӧ пӧжысь шондіӧс, тадзи Тэ тупкан дзескӧдысьяслысь гажӧдчӧмсӧ.

Сион керӧс вылын гажӧдчӧм

⁶ Тайӧ керӧс вылас Господь Саваоф дасьтас став войтыръяслы пызан, кӧні лоӧ чӧскыд сёян да медбур вина, пӧтӧса яя вӧлӧга да чӧскыд вина.

⁷ Тайӧ керӧс вылас Сійӧ кульыштас став войтыръяс вылысь вевттьӧдсӧ, быд чужанкотыр вылысь тупкӧдсӧ.

⁸ Кулӧмсӧ лоӧ бырӧдӧма пыр кежлӧ! Господь Ыджыдыс чышкалас синвасӧ быд мортлӧн чужӧмбанысь, став му пасьтала Аслас войтыр вылысь вештас янӧдӧмсӧ. Тадзи висьталӧ Господь.

⁹ Сійӧ лунӧ шуасны: «Сійӧ – миян Ен! Ми лача кутім Сы вылӧ, и Сійӧ мездіс миянӧс. Сійӧ – Господь, Сы вылӧ ми лача кутім! Кутам нимкодясьны да гажӧдчыны, ӧд Сійӧ мездіс миянӧс».

¹⁰ Аслас киӧн Господь видзӧ тайӧ керӧссӧ. Но Моавӧс лоӧ талялӧма аслас оланінын, кыдзи идзас талялӧны куйӧдын.

¹¹ Сэні сійӧ вартчысь моз кутас шенасьны кинас. Но Енмыс улӧ лэдзас сылысь вылӧ кыпӧдчӧмсӧ да сылысь наяна вӧчӧмсӧ.

¹² Тэнсьыд джуджыд да зумыд стенъястӧ Сійӧ жугӧдас, пӧрӧдас-пасьвартас муас.