Исай 21 - Коми Библия 2023

Вавилон йылысь водзвыв висьталӧм

¹ Саридздорса овтӧмин йылысь водзвыв висьталӧм. Кыдзи Негев муын пӧльтӧ ыджыд тӧвныр, сідзи овтӧминысь, повзьӧдана муысь,

² сувтіс менам син водзӧ Енсянь повзьӧдана петкӧдчылӧм: ылӧдчысь ылӧдлӧ, бырӧдысь бырӧдӧ. Элам, уськӧдчы на вылӧ! Мидия, кытшав найӧс! Ӧні став ойзӧмыслы Ме пукта пом.

³ Тайӧс аддзылӧмысь менам пытшкӧсӧй кутіс дзӧрны, сьӧкыд дойяс топӧдісны менӧ кага чужтысьӧс моз. Ме шӧйӧвоши сыысь, мый кывлі, менӧ полӧм босьтіс сыысь, мый аддзывлі.

⁴ Менам сьӧлӧмӧй тіралӧ, менӧ дзӧрӧм босьтіс. Водзынджык ме нимкодьпырысь виччыси рытсӧ, ӧні сійӧ повзьӧдлӧ менӧ.

⁵ Пызан дасьтӧма, джодждӧраяс вольсалӧма, юралысьяс сёйӧны-юӧны. Чеччӧй, юралысьяс, мавтӧй ассьыныд сайӧднытӧ!

⁶ Господь меным тадзи висьталіс: – Мун да сувтӧд кар видзысьӧс, медым сійӧ юӧртас, мый аддзӧ.

⁷ Сійӧ аддзис, мый верзьӧмаяс кыкӧн-кыкӧн локтӧны вӧвъяс вылын, осёлъяс да верблюдъяс вылын. Сійӧ кывзіс, сюся кывзіс,

⁸ сэсся лев моз гораа горӧдіс: «Господьӧй! Лунысь-лун ме сулалі да видзӧді, войбыд эг вешйывлы аслам места вылысь.

⁹ Со, верзьӧмаяс кыкӧн-кыкӧн локтӧны вӧвъяс вылын». Сэсся кар видзысь юӧртіс: «Киссис, киссис Вавилон. Сылысь бӧлбанъяссӧ жуглӧма, найӧ куйлӧны му вылын».

¹⁰ Менам войтырӧй, тэнӧ вартӧма-изӧма гумла вылын. Мый ме кывлі Господь Саваофсянь, Израильлӧн Енсянь, сійӧс ӧні висьтала тіянлы.

Эдом да Аравия йылысь водзвыв висьталӧм

¹¹ Думай йылысь водзвыв висьталӧм. Сеир керӧсвыв мусянь меным горзӧны: «Кар видзысь, дыр-ӧ на асылӧдзыс? Кар видзысь, оз-ӧ на войыс помась?»

¹² Кар видзысь вочавидзӧ налы: «Асылыс матыстчӧ нин, но войыс эз на помась. Кӧсъянныд кӧ нӧшта юавны – бара на волӧй да юалӧй».

¹³ Аравия йылысь водзвыв висьталӧм. Деданса караванъяс, войсӧ коллялӧй аравияса пуяс улын.

¹⁴ Тема муын олысьяс, юны кӧсйысьяслы сетӧй васӧ, пышйысьясӧс вочаалӧй няньӧн,

¹⁵ ӧд найӧ пышйӧны шыпуртысь, пуртӧсысь перйӧм шыпуртысь, пышйӧны зэвтӧм ньӧввужйысь да чорыд тышысь.

¹⁶ Господь меным тадзи висьталіс: «Коляс нӧшта ӧти во – лыддьыны кӧ сідзи, кыдзи медалӧм морт лыддьӧ ассьыс уджалан восӧ – и бырас ставыс, мыйӧн Кедар ошйысьӧ.

¹⁷ Кедарса тышкасьысьяслӧн, ньӧввужйысь лыйсьысьяслӧн лыдыс кольӧ зэв этша». Тадзи висьталӧ Господь, Израильлӧн Ен.