Исай 2 - Коми Библия 2023

Лӧнь кад воӧм йылысь

¹ Амослӧн Исай пилы вӧлі Иуда да Ерусалим йылысь восьтӧм.

² Тадзи лоӧ бӧръя кадӧ: сійӧ керӧсыс, кӧні сулалӧ Господьлӧн крамыс, лоӧ став керӧссьыс на джуджыдджык, став мыльксьыс на вылынджык. Сэтчӧ дугдывтӧг кутасны локны войтыръяс.

³ Найӧ чукӧртчасны да шуасны ӧта-мӧдныслы: «Локтӧй, каямӧй Господьлӧн керӧс вылӧ, Яков Енлӧн крамӧ! Господь индас миянлы Ассьыс туйсӧ, медым ми ветлім Сылӧн туйясӧд». Сионсянь воас Индӧдыс, Ерусалимсянь – Господьлӧн кывйыс.

⁴ Господь отсалас воны ӧти кывйӧ войтыръяслы, кутас веськыда мыждыны чужанкотыръясӧс. Сэки йӧзыс дорасны шыпуртъясысь гӧръяс, шыясысь – чарлаяс. Войтыръяс ӧта-мӧдныслы паныд оз нин лэптыны шыпуртсӧ, водзӧ оз кутны велӧдчыны тышкасьны.

⁵ Яковсянь чужысьяс, локтӧй, кутам овны Господьлӧн югыдас!

Матыстчӧ Господьлӧн луныс

⁶ Господьӧй, Тэ эновтін Ассьыд войтыртӧ, колин Яковсянь чужысьясӧс. Ӧд найӧ унаторйӧ велӧдчисны асыввыв олысьяссянь, филистимсаяс моз найӧ кимӧститчӧны, волысьӧны локтысь йӧзкӧд.

⁷ Тэнад войтырлӧн муыс озыр эзысьӧн да зарниӧн, озырлуныс помтӧм-дортӧм. Налӧн эм уна вӧв, тарантасъяслӧн лыдыс лыдтӧм-тшӧттӧм.

⁸ Налӧн муыс тырӧма идолъясӧн, найӧ копрасьӧны асланыс киӧн вӧчӧмторъяслы.

⁹ Йӧзыс нюкыртчисны, лэдзисны юрнысӧ. Тэ он прӧстит найӧс.

¹⁰ Пышйӧй изкыртаӧ, дзебсьӧй му пытшкас ӧд тіянӧс полӧм топӧдас Господьлӧн вынысь, Сылӧн дзирдлунысь тіянӧс полӧм босьтас.

¹¹ Вылӧ кыпӧдчысьяс лэдзасны юрнысӧ, ышнясьысьяс улӧдз копыртчасны, сійӧ лунӧ сӧмын Господь лоӧ медся вылын.

¹² Господь Саваофлӧн дасьтӧма лун, кор Сійӧ кутас мыждыны вылӧ кыпӧдчысьясӧс, ышнясьысьясӧс да вывтіасьысьясӧс, и найӧс лоӧ улӧ лэдзӧма.

¹³ Сійӧ кутас мыждыны васанса тупуяс, ливанса сус пуяс, джуджыд да вылӧ кыпӧдчысь пуяс,

¹⁴ джуджыд керӧсъяс да вылӧ кыпӧдчысь мылькъяс.

¹⁵ Кутас мыждыны джуджыд башняяс да зумыда сулалысь карса стенъяс,

¹⁶ фарсисса корабльяс да став налысь дона эмбурсӧ.

¹⁷ Вылӧ кыпӧдчысьясӧс лоӧ улӧ лэдзӧма, ышнясьысьяс улӧдз копыртчасны, сійӧ лунӧ сӧмын Господь лоӧ медся вылын,

¹⁸ идолъяс дзикӧдз бырасны.

¹⁹ Йӧзыс пышъясны изкыртаясӧ, дзебсясны му горсъясӧ, ӧд найӧс полӧм топӧдас Господьлӧн вынысь, Сылӧн дзирдлунысь найӧс полӧм босьтас. Господь кыпӧдчас, и йӧзсӧ полӧм босьтас!

²⁰ Сійӧ лунӧ мортыс босьтас зарниысь да эзысьысь вӧчӧм идолъясӧс, кодъясӧс сійӧ вӧчис копрасьӧм вылӧ, да шыбитас найӧс вурдысьяслы да борда шыръяслы.

²¹ Сійӧ пышъяс изкыртаӧ, дзебсяс керӧс потасӧ, ӧд сійӧс полӧм топӧдас Господьлӧн вынысь, Господьлӧн дзирдлунысь сійӧс полӧм босьтас. Господь кыпӧдчас, и йӧзсӧ полӧм босьтас!

²² Дугдӧй лача кутны морт вылӧ, кодлӧн олӧмыс лолыштӧм кодь. Мый вермас вӧчны сійӧ?