Исай 19 - Коми Библия 2023

Египетӧс мыждӧм

¹ Египет йылысь водзвыв висьталӧм. Господь пуксис кокньыд кымӧр вылӧ. Сійӧ локтас Египетӧ, Сы водзын кутасны тіравны египетса идолъяс, повзьӧмнысла египетсалӧн сьӧлӧмныс дугдас тіпкынысӧ.

² Ме кыпӧда египетсаясӧс ӧта-мӧдныслы паныд: вокыс уськӧдчас вокыс вылӧ, орччӧн олысьыс – орччаыс вылӧ, ӧти карын олысьяс – мӧд карын олысьяс вылӧ, тайӧ муас олысьяс – мӧд муын олысьяс вылӧ.

³ Египетсалӧн ловныс жебмас. Ме торка налысь мӧвпыштӧмасӧ, и найӧ шыасясны туйдӧдӧмла идолъяс да тшыкӧдчысьяс дінӧ, кулӧмаӧс корысьяс да туналысьяс дінӧ.

⁴ Ме сета египетсаясӧс чорыд сьӧлӧма юралысь киӧ, скӧр ӧксы кутас ыджыдавны на вылын, – висьталӧ Ыджыдыс, Господь Саваоф.

⁵ Саридзын ваыс ямас, юын ваыс чинас да косьмас.

⁶ Египетса юяс дуксясны, висъяс ляпкаласны да косьмасны, эжӧр да юсьпӧлян нярмасны.

⁷ Юдорса быдмӧгъяс косьмасны, ю пӧлӧн быдмысь кӧдзас косьмас. Тӧлыс разӧдас найӧс, и найӧ бырасны.

⁸ Чери кыйысьяс кутасны бӧрдны, Нил ю дорын вуграсьысьяс – синва кисьтны, тывйӧн чери кыйысьяс шогӧ усясны.

⁹ Шабді няръялысьяс яналасны, дӧра быгӧдысьяс шӧйӧвошасны.

¹⁰ Печкысьяс шогӧ усясны, медалӧм уджалысьяс нюкыртчасны.

¹¹ Цоанса веськӧдлысьяс дзик мывкыдтӧмӧсь, фараонлӧн сюсь вежӧра туйдӧдысьяслӧн вӧзйӧмъясыс ковтӧмӧсь. Ті ӧмӧй верманныд шуны фараонлы: «Ме – мывкыда йӧзлӧн пи, ме – важся ӧксысянь чужысь».

¹² Кӧнӧсь найӧ? Кӧнӧсь тэнад мывкыда йӧзыд? Ӧні мед найӧ висьталасны тэныд, ӧні мед тӧдмаласны Господь Саваофлысь водзвыв шуӧмсӧ, мый лоӧ Египеткӧд.

¹³ Цоанса веськӧдлысьяс дзикӧдз вежӧртӧммисны, мемфисса ыджыдалысьяс пӧрйӧдлӧны асьнысӧ, чужанкотыръяслӧн юралысьяс кежӧдісны Египетӧс бур туй вывсьыс.

¹⁴ Найӧ дзикӧдз кежӧдісны Египетӧс туй вывсьыс. Господь шӧйӧвоштіс Египетӧс, сійӧ лои код морт кодь, коді ветлӧдлӧ аслас вос вывті.

¹⁵ Египетын некод оз вермы нинӧм вӧчны, ни юр, ни бӧж, ни пальма, ни эжӧр.

¹⁶ Сійӧ лунӧ египетсаяс лоӧны аньяс кодьӧсь. Повзьӧмнысла найӧ пондасны тіравны Господь Саваофысь, кор Сійӧ кисӧ лэптас на вылӧ.

¹⁷ Египетсаяслы Иуда му лоӧ повзьӧдчанторйӧн. Коді Египетын кылас Иуда йылысь, повзяс, ӧд сылы тӧд вылас усяс, мый Господь Саваоф водзвыв шуліс Египет йылысь.

Господь бурсиӧ Египет, Ассур да Израиль муяс

¹⁸ Сійӧ лунӧ Египетын лоӧ вит кар, кӧні олысьясыс кутасны сёрнитны ханаан кыв вылын да кыв сетӧмӧн кӧсйысясны кесъявны Господь Саваофлы. Тайӧ каръясысь ӧтиыс кутас шусьыны Шонді карӧн.

¹⁹ Сійӧ лунӧ Египет шӧрын кутас сулавны Господьлы висьпуктанін, а му вежтасас – Господьлӧн вежа из.

²⁰ Тайӧ изйыс лоӧ египетсаяслы пасӧн, сійӧ кутас висьтавны Господь Саваоф йылысь. Кор найӧс кутасны дзескӧдны, найӧ шыасясны Господь дінӧ, и Сійӧ мӧдӧдас налы мездысьӧс. Сійӧ доръяс да мездас найӧс.

²¹ Господь восьтас Асьсӧ египетсалы. Сійӧ лунӧ найӧ тӧдмаласны Господьӧс, ваясны Сылы начкан висьяс да нянь висьяс и вӧчасны, мый кыв сетӧмӧн кӧсйысясны Сылы.

²² Господь дойдас Египетӧс. Сійӧ дойдас и бурдӧдас найӧс. Кор найӧ шыасясны Господь дінӧ, Сійӧ кылас налысь кевмӧмсӧ да бурдӧдас найӧс.

²³ Сійӧ лунӧ Египетсянь Ассурӧ воссяс ыджыд туй. Ассурса кутасны волывлыны Египетӧ, а египетса – Ассурӧ. Найӧ ӧтвыв кутасны кесъявны Господьлы.

²⁴ Сійӧ лунӧ Израиль мусӧ позяс ӧткодявны Египеткӧд да Ассуркӧд. Найӧ лоӧны бурсиӧмӧн став муюгыдыслы.

²⁵ Господь Саваоф бурсиас найӧс тадзи: «Бурсиа Ассьым Египет войтырӧс, бурсиа Аслам киӧн вӧчӧм Ассур войтырӧс да Ассьым бӧрйӧм Израиль войтырӧс».