Исай 18 - Коми Библия 2023

Эфиопия йылысь водзвыв висьталӧм

¹ Курыд шог дзизгысь гут-гаглӧн мулы, эфиопияса юяс мӧдлапӧлын куйлысь мулы.

² Сійӧ мӧдӧдӧ йӧзсӧ саридз вывті, юсьпӧлянысь вӧчӧм пыжъясӧн ваяс вывті. Тэрыб кокаяс, нуӧй юӧр, мунӧй ён вына войтыр дінӧ, ыджыд тушаа йӧз дінӧ, кодъяслысь юрсисӧ да тошсӧ шырӧма. Тайӧ войтырсьыс быдлаын полӧны, найӧ ставнысӧ нартитӧны. Налысь мусӧ вожӧдӧны юяс.

³ Ті, муюгыдын олысьяс, ті, му вылас олысьяс, ставныд видзӧдӧй, кор керӧсъяс вылӧ кыптас дӧрапас, сюся кывзӧй, кор кылас буксанлӧн гора шыыс.

⁴ Господь меным тадзи висьталіс: Аслам оланінсянь Ме лӧня видзӧда луншӧркадся гож моз, вундан кадӧ шонді пӧжигӧн кыптысь ру моз.

⁵ Но виноград вотӧдз на, сылӧн дзоридзалӧм бӧрти, кор розйыс заводитас кисьмыны, Господь пуртӧн вундалас вожъяссӧ, Сійӧ кералас да шыбитас выль вожъяссӧ.

⁶ Найӧс шыбитасны керӧсвывса кырныш-варышлы да мувывса пемӧсъяслы. Гожӧмнас наӧн кутасны пӧткӧдчыны кырныш-варыш, а тӧвнас – мувывса пемӧсъяс.

⁷ Сэки Господь Саваофлы ваясны козинъяс ён вына да збой войтырсянь, ыджыд тушаа йӧзсянь, кодъясысь быдлаын полӧны, кодъяс ставнысӧ нартитӧны, кодъяслысь мусӧ вожӧдӧны юяс. Козинъяссӧ ваясны Сион керӧс вылӧ, Господь Саваофлӧн оланінӧ.