Исай 17 - Коми Библия 2023

Арамӧс да Израильӧс мыждӧм

¹ Дамаск йылысь водзвыв висьталӧм. Дамаск кар бырас, сійӧ лоӧ киссьӧм карӧн.

² Ароэр каръясӧс лоӧ эновтӧма, найӧ вичмасны ыж-мӧслы, ыж-мӧс кутасны шойччыны сэні, и некод оз повзьӧд найӧс.

³ Ефремын оз нин лоны изкаръяс, Дамаскын оз нин лоны ӧксыяс, арамейяслӧн коляс войтырыс бырас. Накӧд лоӧ сійӧ жӧ, мый лои Израиль войтырлӧн нималӧмкӧд, – висьталӧ Господь Саваоф.

⁴ Сійӧ лунӧ Яков рӧдлысь нималӧмсӧ лоӧ нинӧмӧ пуктӧма, налӧн тшӧгӧм вир-яйыс вӧснялас.

⁵ Израилькӧд лоӧ сійӧ жӧ, кыдзи овлӧ нянь вундігӧн. Рефаим ковтысса видз-му вылысь моз ставсӧ лоӧ ӧктӧма-чукӧртӧма,

⁶ и шептыс этша кольӧ. Израилькӧд лоӧ сійӧ жӧ, – висьталӧ Господь, Израильлӧн Ен, – кыдзи овлӧ олив чукӧртӧм бӧрын: пу йылас кольӧ сӧмын кык-куим, вож вылас – нёль-ӧ-вит олив.

⁷ Сійӧ лунӧ мортыс видзӧдлас сійӧс Вӧчысьыс вылӧ, кыпӧдас синсӧ Израильлӧн вежа Енлань.

⁸ Сійӧ оз нин видзӧд аслас киӧн вӧчӧм висьпуктанінъяс вылӧ, оз нин кыпӧд синсӧ аслас киӧн вӧчӧм юрбитан пуяс да тшынӧдчан висьпуктанінъяс вылӧ.

⁹ Сійӧ лунӧ Израильлӧн зумыд каръяскӧд лоӧ сідзи жӧ, кыдзи вӧлі сэки, кор мукӧд войтыръяс эновтісны ассьыныс каръяссӧ Израиль войтырлӧн локтігӧн. Израильлӧн зумыд каръясыс лоӧны вӧр кодьӧсь, кӧні некод оз ов. Гӧгӧр лоӧ куш.

¹⁰ Ӧд тэ вунӧдін Ентӧ, ассьыд Мездысьтӧ, он казьтыв тэнӧ сайӧдысь Изкырта йылысь. Тэ пуктін мича быдмӧгъяс аслад идолъяслы, вужйӧдін йӧз виноград вожъяс.

¹¹ Найӧс пуктан лунӧ тэ тӧждысин, медым бура быдмисны, медым водз дзоридзалісны. Но вотӧс чукӧртан кадӧ вотӧсыс оз ло, а дой да висьӧм лоӧ.

Войтыръяс шызьӧны

¹² Курыд шог! Войтыръяслӧн шызьӧм кылӧ, найӧ шызьӧны саридз моз. Войтыръяслӧн горзӧм кылӧ, найӧ ызгӧны бузгысь ва моз.

¹³ Войтыръяс горзӧны, быттьӧ пыдӧстӧм ваяс бузгӧны. Но Господь чирыштас найӧс, и найӧ ылӧдз пышъясны. Найӧ тӧвзясны керӧсъяс вывті тӧвнырӧн нӧбӧдан кыд моз, ыджыд тӧвнырӧн нӧбӧдан бус моз.

¹⁴ Рытнас лоӧ ыджыд полӧм, а асъядорыс сійӧ оз нин ло. Татшӧмтор виччысьӧ миянлысь эмбур мырддялысьясӧс, татшӧм лоӧ миянлысь гусялысьяслӧн пайыс.