Исай 15 - Коми Библия 2023

Моавӧс бырӧдӧм

¹ Моав йылысь водзвыв висьталӧм. Войнас лоӧ куштӧма-бырӧдӧма Ар-Моавӧс. Войнас лоӧ куштӧма-бырӧдӧма Кир-Моавӧс.

² Сэні олысьяс мунӧны Баитӧ да Дивонӧ, найӧ кайӧны бӧрдны вись ваян мыльк вылӧ. Моавсаяс бӧрдӧны Нево да Медева вӧсна, налысь ставныслысь шырӧма юрсинысӧ да тошнысӧ.

³ Найӧ ветлӧны туй вывті шогалан паськӧмӧн, пукалӧны керка вевт вылын да бӧрдӧны, пукалӧны изэрд вылын да бӧрдӧны, бӧрдӧны кыз синваӧн.

⁴ Ырзӧмӧн бӧрдӧны Хешбон да Эляле, налӧн бӧрдӧмыс кылӧ Яхацӧдз. Таысь полӧмнысла горзӧны моавса тышкайӧз, налӧн сьӧлӧмныс тіралӧ.

⁵ Менам сьӧлӧмӧй бӧрдӧ Моав вӧсна. Моавсаяс пышйӧны Цоарӧ, мунӧны Эглат-Шелишияӧдз, найӧ бӧрдӧмӧн кайӧны Лухит керӧсӧ, Хоронаимӧ мунан туй вылын ойзӧны бырӧдӧм вӧсна.

⁶ Нимримысь ваыс бырӧма, видзьясыс косьмӧмаӧсь, туруныс сотчӧма, оз тыдав веж быдмӧгыс.

⁷ Моавсаяс нуӧны эмбурнысӧ, мый коркӧя чукӧртлӧмысь налӧн колис, вуджӧдӧны сійӧс Аравим ю сайӧ.

⁸ Налӧн бӧрдӧмыс кылӧ став Моав му пасьтала, Эглаимсянь Бер-Элимӧдз.

⁹ Димонлӧн ваыс сорласис виркӧд. Но Ме дасьта Димонлы нӧшта на мӧдтор – мӧдӧда левъясӧс Моавысь пышйӧмаяс вылӧ, тшӧтш сэні ловйӧн кольӧмаяс вылӧ.