Исай 13 - Коми Библия 2023

Вавилонӧс мыждӧм

¹ Вавилон йылысь водзвыв висьталӧм. Енмыс петкӧдліс тайӧс Амослӧн Исай пилы.

² Керӧс йылӧ кыпӧдӧй дӧрапас, кинаныд шенасьӧй, гораа чуксалӧй тышкайӧзӧс, медым найӧ пырасны юралысьяслӧн дзиръяӧд.

³ Ме тшӧкті Аслам вежаяслы чукӧртчыны, Ме чукӧсті Ассьым вына йӧзӧс, Менам вынӧн нимкодясьысьясӧс, медым найӧ збыльмӧдісны Менсьым скӧрлунӧс.

⁴ Керӧсъяс вылын кылӧ гора шы, сійӧ уна йӧзлӧн ызгысь шы кодь, кылӧ ӧтвыв чукӧртчӧм войтыръяслӧн шы. Господь Саваоф чукӧртӧ Ассьыс тышкайӧзсӧ.

⁵ Ылі муысь, енэжтас сайысь, локтӧны Господь да Сылӧн скӧрлуна вермасянторъясыс, медым пазӧдны ставнас мусӧ.

⁶ Ырзӧмӧн бӧрдӧй, ӧд Господьлӧн луныс матын нин, сійӧ локтӧ Ставсӧвермысьсянь да бырӧдӧ ставсӧ.

⁷ Став йӧзыслӧн киясыс вынтӧммасны, быдӧнлӧн сьӧлӧмыс пондас тіравны.

⁸ Найӧ ёна повзясны, кага вайысь аньӧс моз найӧс суасны сьӧкыд дойяс. Шӧйӧвошӧмӧн пондасны видзӧдны ӧта-мӧд выланыс, налӧн чужӧмныс пондас сотчыны.

⁹ Господьлӧн мыждан луныс локтӧ ыджыд лӧглунӧн да ыпъялан скӧрлунӧн, медым вӧчны мусӧ овтӧминӧн да бырӧдны му вылысь мыжаясӧс.

¹⁰ Енэжвыв кодзувъяс оз кутны дзирдавны, шондіыс петігас на пемдас, и тӧлысьыс оз сет югыдсӧ.

¹¹ Ме, Господь, мыжда муюгыдсӧ лёк вӧчӧмсьыс, мыжаясӧс – налӧн мыжсьыныс. Вылӧ кыпӧдчысьяслӧн вывтіасьӧмлы Ме пукта пом, дзескӧдысьяслысь ышнясьӧмсӧ Ме путкыльта.

¹² Ме бырӧда йӧзсӧ, и налӧн лыдыс лоас сорастӧм зарни дорысь на этшаджык, офирса зарни дорысь на этшаджык.

¹³ Енэжсӧ Ме вӧрзьӧда, и муыс вешъяс аслас местаысь. Тадзи лоӧ Господь Саваофлӧн ярлуныс вӧсна Сылӧн скӧралан лунӧ.

¹⁴ Сэки пышйысь газель моз, эновтӧм ыжъяс моз быдӧн бергӧдчас аслас войтыр дінӧ, котӧртас аслас муӧ.

¹⁵ Кодӧс суӧдасны – сійӧс бытшкасны, кодӧс вӧтӧдасны – сійӧс шыпуртӧн виасны.

¹⁶ Налысь кагаяссӧ пасьвартасны налӧн син водзын, керкаяссӧ куштасны, гӧтыръяссӧ мырдӧналасны.

¹⁷ Ме кыпӧда налы паныд Мидия войтырӧс, коді нинӧмӧ пуктӧ зарни, оз донъяв эзысь.

¹⁸ Том зонъясӧс найӧ лыйласны ньӧввужйысь, кагаясӧс найӧ оз жалитны, челядь дінӧ оз бурсьӧлӧмтчыны.

¹⁹ Вавилон – мувывса каръясысь медмичаыс, Калдея войтырлӧн ошйысянторйыс. Содомӧс да Гомораӧс моз Енмыс бырӧдас сійӧс.

²⁰ Сэтчӧ некод оз овмӧдчы, сэні некод оз кут овны нэмъяс чӧж. Сэні араб оз сувтӧд чомсӧ, ыж видзысь оз понды шойччыны ыжъясыскӧд.

²¹ Сэтчӧ овмӧдчасны овтӧминса зверъяс, керкаяс тырасны сюзьясӧн, сэні кутасны овны страусъяс, кӧзаяс кутасны чеччавны сэні.

²² Шакалъяс пондасны омлявны изкаръясын, кӧинъяс пондасны вурзавны озыръяслӧн керкаясын.