Иов 9 - Коми Библия 2023

Иов вочавидзӧ Вилдадлы

¹ Иов воча шуис:

² – Ме тӧда, мый ставыс тайӧ тадз. Мортыс оз вермы лоны Ен водзын веськыдӧн.

³ Кутас кӧ мортыс вензьыны Енмыскӧд, сійӧ оз вермы вочавидзны весиг ӧти юалӧм вылӧ.

⁴ Енмыс – ыджыд мывкыдлуна, вынасьыс-вына, Сылы паныд кыпӧдчӧмысь мортлы бурыс оз ло.

⁵ Виччысьтӧг Сійӧ вештӧ керӧсъяс, Аслас скӧрлунӧн путкыльтӧ найӧс.

⁶ Сійӧ вӧрзьӧдӧ мусӧ, и подулыс пондӧ вӧрны.

⁷ Сійӧ вевттьӧ кодзувъяс, ӧлӧдӧ шондісӧ, и шонді оз пет.

⁸ Сійӧ ӧтнас шевкнитіс енэжсӧ, Сійӧ ветлӧ саридзса гыяс вывті.

⁹ Сійӧ вӧчис-артмӧдіс Сизима, Куима да Корӧся кодзув чукӧръяс, тшӧтш лунвыв кодзувъяс.

¹⁰ Сылӧн уджъясыс ыджыдӧсь, вежӧрӧ тӧрӧдтӧмӧсь, Сылӧн шензьӧданаторъяслы лыдыс абу.

¹¹ Сійӧ мунӧ ме водзті, а ме ог аддзы Сійӧс, Сійӧ ветлӧ ме дінті, а ме ог казяв Сійӧс.

¹² Коді сувтӧдас Сійӧс мыйкӧ босьтӧмысь, коді шуас Сылы: «Мый Тэ вӧчан?»

¹³ Енмыс скӧралӧ, оз ланьт, Рахавлы отсасьысьяс кымынь уськӧдчасны Ен водзӧ.

¹⁴ Мый ме верма воча шуны Енмыслы, кытысь босьтны кывъяс Сылы паныд?

¹⁵ Ме кӧ вӧлі мыжтӧм, весиг сэки эг вермы вочавидзны Сылы, ме верми сӧмын корны Ёрдысьӧс лоны бур сьӧлӧмаӧн ме дінӧ.

¹⁶ Ме кӧ шыаси, и Сійӧ кӧ вочавидзис меным, весиг сэки эг эскы, мый Сійӧ кылӧ менӧ.

¹⁷ Тӧвныр моз Сійӧ уськӧдчӧ ме вылӧ, нинӧм абусьыс дойясӧс содтӧ,

¹⁸ оз сет лолыштны меным, ӧтарӧ топӧдӧ менӧ курыд шогӧн.

¹⁹ Вермасьны кӧ Сыкӧд – Сійӧ медвынаыс, сувта кӧ ёрд водзӧ, коді Сійӧс вайӧдас сэтчӧ?

²⁰ Ме мыжтӧм, но менӧ мыждас менам кывйӧй, ме абу мыжа, но Енмыс шуас менӧ мыжаӧн.

²¹ Ме абу мыжа, но меным ставыс веськодь, меным мустӧм аслам олӧмӧй.

²² Енмыс ӧтмоза бырӧдӧ мыжтӧмӧс и мыжаӧс, та вӧсна ме шуа, мый ставыс веськодь.

²³ Виччысьтӧм бырӧдӧм дырйи Сійӧ сералӧ мыжтӧмлӧн шог вылын.

²⁴ Мусӧ сетӧма лёк йӧзлӧн киӧ, а Сійӧ тупкӧ ёрдысьяслысь синсӧ. Коді тайӧс вӧчӧ, оз-ӧ Енмыс?

²⁵ Менам олан лунъясӧй юӧр нуысь моз котӧртӧны, лэбӧны, бурсӧ оз аддзыны,

²⁶ тӧвзьӧны кокньыд пыж моз, кыйдӧс вылӧ уськӧдчысь кутш моз.

²⁷ Ме верма шуны, мый дугда няргыны, вунӧда ассьым шогӧс да понда нюмъявны,

²⁸ но шогысь полӧмыс оз эновт менӧ, ӧд ме тӧда: Тэ менӧ мыжтӧмӧн он шу.

²⁹ Менӧ кӧ мыждӧма нин, мыйла меным весьшӧрӧ дорйысьнысӧ?

³⁰ Весиг кӧ лымваӧн мысся, кунваӧн киӧс мыськала,

³¹ Тэ менӧ йӧткыштан няйт гуранӧ, мый весиг паськӧмӧй зывӧктас менӧ.

³² Енмыс абу морт, абу ме кодь, медым ме Сылы мыйкӧ воча шуи, сувті Сыкӧд ёрд водзӧ.

³³ Миян абу ёрдысьыс, коді эськӧ кыкнанным вылын вӧлі ыджыдыс.

³⁴ Енмыс мед вештас ме вылысь Ассьыс бедьсӧ, дугдас повзьӧдлыны менӧ,

³⁵ сэки ме повтӧг кута сёрнитны Сыкӧд. А ӧні ог вермы, ӧд ме ӧтнам.