Иов 8 - Коми Библия 2023

Вилдад шыасьӧ Иов дінӧ

¹ Шуахса Вилдад воча шуис:

² – Дыр-ӧ на тэ кутан тадзисӧ сёрнитны? Тэнад кывъясыд бушков кодьӧсь!

³ Енмыс ӧмӧй оз веськыда мыжды, Ставсӧвермысь ӧмӧй вежас збыльсӧ?

⁴ Тэнад пияныд кӧ мыж вӧчисны Сылы паныд, Сійӧ мынтысис налы мыжныс серти.

⁵ Но тэ кӧ корсян Енсӧ, кевмысян Ставсӧвермысьлы,

⁶ тэ кӧ сӧстӧм да веськыд, Сійӧ бергӧдас чужӧмбансӧ тэлань да веськыдлуныд серти сетас тэныд овны.

⁷ Водзынсӧ кӧ тэнад вӧлі этша, бӧрыннас тэнад лоӧ вывті уна.

⁸ Юав воддза олысьяслысь, тӧдмав, мый батьясныс висьтавлісны.

⁹ Ми ӧд тӧрытъя чужысьяс, нинӧм огӧ тӧдӧй, му вылас миян олан лунъясным вуджӧр кодьӧсь.

¹⁰ Батьяс велӧдасны тэнӧ, висьталасны, мый эм сьӧлӧманыс.

¹¹ Петас-ӧ юсьпӧлян ватӧминӧ, быдмас-ӧ эжӧр ватӧг?

¹² Петігас на сійӧ нярмӧ, ытшкан кадӧдз оз быдмы, мукӧд турунсьыс водз сійӧ косьмӧ.

¹³ Татшӧм туйыс быдӧнлӧн, коді вунӧдӧ Енсӧ, Ентӧг олысьлӧн лачаыс вошас.

¹⁴ Шатовтчӧ ставыс, мый вылӧ лача кутӧ, сійӧ кутчысьӧ быттьӧ черань везйӧ.

¹⁵ Сійӧ мыджсьӧ аслас овмӧс вылӧ, но овмӧсыс киссьӧ, кутчысьӧ озырлунас, но озырлуныс ылӧдлӧ.

¹⁶ Сійӧ вежӧдӧ шонді улын, вожъясыс шевкнитчӧмаӧсь сад йӧрын,

¹⁷ вужйыс гартчӧма изъяс гӧгӧр, пырӧма изъяс костӧ.

¹⁸ Но кор сійӧс нетшыштасны, сэки муыс ӧтдортчас сыысь, шуас, мый оз тӧд сійӧс.

¹⁹ Муысь петасны-быдмасны мукӧдъяс – татшӧм гажсӧ сылы вайӧ олӧмыс.

²⁰ Енмыс мыжтӧмӧс оз ӧтдорт, лёк вӧчысь дор оз сувт.

²¹ Сійӧ тыртас на тэнӧ серамӧн, вомсьыд петас на гораа нимкодясьӧм.

²² Тэнӧ мустӧмтысьясӧс вевттяс яналӧм, лёк йӧзлӧн оланіныс бырас.