Иов 7 - Коми Библия 2023

¹ Мортлӧн олӧмыс му вылын – сьӧкыда уджалӧм, сылӧн олан лунъясыс – медалӧм мортлӧн кодьӧсь.

² Кесйӧг моз сійӧ корсьӧ пуксьывны гож сайӧ, медалӧм морт моз виччысьӧ удждон.

³ Меным вичмисны ковтӧм тӧлысьяс, индӧма сьӧкыд войяс.

⁴ Водігӧн ме виччыся нин чеччӧмсӧ, но войыс сэтшӧм кузь, югдытӧдзыс ме ӧтарӧ бергала.

⁵ Яйӧй лӧмӧсь-номырӧсь, няйтӧн вевттьысьӧма, кучикӧй потласьӧ-орзьӧ.

⁶ Лунъясӧй котӧртӧны кысян сусаысь ӧдйӧ, найӧ помасьӧны лачатӧг.

⁷ Енмӧй, эн вунӧд, мый менам олӧмӧй тӧвру кодь, менам синмӧй бурсӧ оз нин аддзыв.

⁸ Тэ он нин аддзыв менӧ, Тэ видзӧдлан ме вылӧ, а ме ог нин ло.

⁹ Кыдзи кымӧр вешйӧ да бырӧ, тадзи кулӧмаяслӧн оланінӧ мунысь бӧрсӧ оз нин лок.

¹⁰ Аслас керкаӧ сійӧ бӧрсӧ оз бергӧдчы, сылӧн мувыв оланіныс оз нин тӧд сійӧс.

¹¹ Ӧні ме ог кут чӧв овны. Ме кута сёрнитны, ӧд дзескыд менам ловлы, кута норасьны, ӧд курыд шог меным.

¹² Енмӧй, мыйла Тэ потшӧсалін менӧ, ме ӧмӧй саридз али саридзса гундыр?

¹³ Ме мӧвпала, мый вольпасьӧй менӧ бурӧдас, унмӧй шогӧс вештас,

¹⁴ но Тэ вӧтъясӧн менӧ повзьӧдлан, аддзылӧмъясӧн весьӧпӧртан.

¹⁵ Бурджык, менам ловшыӧй кӧ чӧв ланьтас, сьӧкыдалӧм дорысь кӧ ме кулышта.

¹⁶ Зывӧк лои меным олӧмыс, менам нэмӧй дженьыд. Эновт менӧ! Менам олан лунъясӧй тӧвру пӧльыштӧм кодьӧсь.

¹⁷ Мыйла мортыс Тэныд дона, мыйла видзӧдан сы бӧрся?

¹⁸ Быд асыв Тэ волан сійӧс видлыны, быд здукӧ тӧдмалан.

¹⁹ Мыйла Тэ он эновт менӧ, он вешйы ме дінысь, медым верми кӧть дулльӧс ньылыштны?

²⁰ Ме кӧ мыж вӧчи, Тэныд ӧмӧй паныд вӧчи, морт бӧрся Видзӧдысьӧй? Ме ачым аслым лои сьӧктӧдӧн, а Тэ нӧшта пуктін менӧ Аслыд лыйсян пас пыдди. Мыйла?

²¹ Мыйла Тэ он прӧстит менсьым мыжӧс, мыйла он вешты менсьым мыжмӧмӧс? Ӧні ме кыз му улӧ вода, Тэ кутан корсьны менӧ, а ме ог нин ло.