Иов 6 - Коми Библия 2023

Иов вочавидзӧ Элифазлы

¹ Иов воча шуис:

² – Веситны кӧ менсьым шогӧс, пуктыны кӧ вески вылӧ сьӧкыдалӧмӧс,

³ сійӧ эськӧ саридздор лыаысь на сьӧкыдджык лои. Та вӧсна менам сёрниӧй йӧй мортлӧн кодь.

⁴ Ставсӧвермысьлӧн ньӧвъясыс сатшисны меным, менам лолӧй пагалӧ налӧн ядысь, Енмыс мӧдӧдіс меным повзьӧданторъяс.

⁵ Осёл ӧмӧй горзӧ йирсигас, ӧш ӧмӧй баксӧ турун сёйигас?

⁶ Дуб сёянтӧ ӧмӧй сёйлӧны совтӧг, чипан кольклӧн еджыдас ӧмӧй эм кӧр?

⁷ Мый дінӧ весиг инмӧдчывны эг кӧсйы, сійӧ лои меным зывӧк сёянӧн.

⁸ Кор бара-й инас менам кӧсйӧмӧй, кор бара-й Енмыс збыльмӧдас менсьым корӧмӧс?

⁹ Енмыс кӧ эськӧ виис менӧ, кисӧ нюжӧдіс да олӧмӧс орӧдіс!

¹⁰ Тайӧ эськӧ вӧлі меным бурӧдӧмӧн, верми эськӧ нимкодясьны дойяс дырйи, ӧд ме эг ӧтдорт вежа Енлысь шуӧмсӧ.

¹¹ Кытысь меным вынсӧ босьтны, медым овны лачаӧн, кутшӧм пом виччысьӧ менӧ, медым водзӧ овны?

¹² Менам вынӧй ӧмӧй излӧн выныс кодь, менам вир-яйӧй ӧмӧй ыргӧнысь?

¹³ Ме ог вермы отсавны аслым, менам нинӧм оз артмы.

¹⁴ Мортыс кӧ полӧ Ставсӧвермысь Енмысь, сійӧ оз эновт сьӧкыдалысь ёртсӧ.

¹⁵ Но менам ёртъяслы оз позь эскыны, найӧ визув ю кодьӧсь, котӧртысь шор кодьӧсь.

¹⁶ Йи кылалігӧн найӧ гудырмылӧны, лым сылігӧн – ойдӧны.

¹⁷ Кор шондӧдӧ, найӧ ямӧны, ёна пӧжигӧн – дзикӧдз косьмӧны.

¹⁸ Найӧ вежлалӧны ассьыныс визувтан туйвизьсӧ, кежӧны овтӧминӧ да бырӧны.

¹⁹ Темаса караванъяс корсьӧны шоръяс, саваса ветлысь-мунысьяс лача кутӧны ва вылӧ.

²⁰ Но налӧн лачаыс весьшӧрӧ, найӧ воӧны косьмӧм шор дорӧ да шогӧ усьӧны.

²¹ Ӧні ті татшӧм шорыс кодьӧсь – аддзинныд менсьым сьӧкыдалӧмӧс да повзинныд.

²² Ме ӧмӧй шулі тіянлы: «Вайӧй меным», корлі ӧмӧй мынтысьны ме вӧсна?

²³ Корлі ӧмӧй мездыны менӧ дзескӧдысьясысь, ньӧбны менӧ лёк вӧчысьлӧн киысь?

²⁴ Вежӧрсьӧдӧй менӧ, и ме чӧв ланьта, висьталӧй, мыйын ме мыжа.

²⁵ Веськыд кывъясыд вынаӧсь, но тіян мыжалӧмыд оз туйдӧд.

²⁶ Ті лӧсьӧдланныд, медым мыжавны, а сьӧкыдалысьлӧн кывъясыс тіянлы тӧвру кодьӧсь.

²⁷ Ті усьласянныд батьтӧм-мамтӧм вылӧ, асланыд ёртлы гу кодъянныд.

²⁸ Бергӧдчӧй мелань, ме ог ылӧдчы.

²⁹ Мӧвпыштӧй да лёксӧ энӧ вӧчӧй, тӧдӧй – ме абу мыжа!

³⁰ Менам кывйӧй оз ылӧдчы, менам вомысь оз петны бырӧдан кывъяс.