Иов 5 - Коми Библия 2023

¹ Тэнад корӧм вылӧ коді вочавидзас, енэжвывсаяс пӧвстысь код дінӧ тэ шыасян?

² Мывкыдтӧмӧс виӧ сылӧн скӧрлуныс, вежӧртӧмӧс – дӧзмӧмыс.

³ Ме аддзылі, мый мывкыдтӧм вужъясис, но сылӧн керка вылӧ виччысьтӧг усис ёрӧм.

⁴ Сылӧн ныв-пиыс олӧны полӧмӧн, найӧс мыждӧны карса дзиръя дорын, и дорйысьыс налы абу.

⁵ Сылысь видз-му быдтассӧ сёясны тшыгъялысьяс, чукӧртасны сійӧс весиг лежнӧг пӧвстысь, сылысь овмӧссӧ куштасны горш йӧз.

⁶ Сьӧкыдлуныс оз пет му пытшкысь, шогыс оз быдмы му вылын.

⁷ Кыдзи бикиньлы шуӧма кайны вывлань, тадзи мортлы шуӧма чужны, мед шогсьыны.

⁸ Тэ местаын ме эськӧ корси Енмӧс, шыаси Сы дінӧ,

⁹ кодлӧн ыджыд уджъясыс шымыртны вермытӧмӧсь, кодлӧн шензьӧданаторъяслы лыдыс абу.

¹⁰ Муыслы Сійӧ сетӧ зэр, видз-муяс юкталӧ ваӧн,

¹¹ увтыртӧмаӧс кыпӧдӧ, шогас вӧйӧмаӧс мездӧ.

¹² Наян йӧзлысь мӧвпъяссӧ Сійӧ дзугӧ, налӧн уджъясыс оз артмыны,

¹³ сюсьӧ пуксьысьясӧс Сійӧ тывйыштӧ асланыс наянлунӧ, ылӧдчысьяслӧн туйдӧдӧмыс бырӧ.

¹⁴ Лунъюгыднас найӧс вевттьӧ пемыдыс, луншӧрнас найӧ ветлӧны войын моз кималасӧн.

¹⁵ Коньӧрӧс Сійӧ мездӧ налӧн шыпуртысь, лёкӧдӧмысь да вына киысь.

¹⁶ Коньӧрлӧн эм лача, и лёкыс тупкӧ ассьыс вомсӧ.

¹⁷ Майбыр сійӧ, кодӧс вежӧрсьӧдӧ Ен, Ставсӧвермысьлысь чирыштӧмсӧ эн ӧтдорт.

¹⁸ Ӧд Сійӧ дойдӧ, Сійӧ и кӧрталӧ дойтӧ, Сійӧ вачкӧ, Сылӧн киыс и бурдӧдӧ.

¹⁹ Квайт шогысь Сійӧ мездас тэнӧ, сизимӧдыс оз инмӧдчыв тэ дінӧ.

²⁰ Тшыгъялігад мездас тэнӧ кулӧмысь, тышын – шыпуртысь.

²¹ Тэнӧ лоӧ сайӧдӧма лёкӧдӧмысь, локтана бырӧдӧмысь он повзьы,

²² бырӧдӧм да тшыглун вылын пондан серавны, зверъясысь он кут тіравны.

²³ Весиг изъяс тэ дор лоасны, зверъяс кутасны овны тэкӧд лӧня.

²⁴ Тэ тӧдмалан, мый верман повтӧг овны, керка-овмӧстӧ кытшовтан, а сэні нинӧм абу вошӧма.

²⁵ Тэ аддзан, мый тэсянь чужысьыс вывті уна, налӧн лыдыс – видзвыв турун мында.

²⁶ Кыдзи воӧм нянь ас кадӧ кӧртавлӧны кольтаясӧ, тадзи пӧрысь кадӧ тэ водан гортйӧ.

²⁷ Ставсӧ тайӧс ми тӧдмалім-туялім, ставыс тадзи и эм. Кывзы тайӧс да велӧдчы.