Иов 42 - Коми Библия 2023

Иов вочавидзӧ Господьлы

¹ Иов воча шуис Господьлы:

² – Ме тӧда, мый Тэ ставсӧ верман, Тэнӧ некод оз вермы кутны Аслад шуӧм серти вӧчӧмысь.

³ Тэ шуин: «Коді тэ сэтшӧмыс, мый Менсьым мывкыдлунӧс аслад вежӧртӧм сёрниӧн вевттян?» Ме татшӧмыс, сёрниті гӧгӧрвотӧг, висьталі тӧдтӧг сы йылысь, мый оз вермы тӧрны менам вежӧрӧ.

⁴ Тэ шуин: «Кывзы, мый Ме висьтала, Ме кута юасьны, а тэ Меным вочавидз».

⁵ Енмӧй, таӧдз ме сӧмын пель йылӧн Тэ йылысь кывлі, а ӧні аддза Тэнӧ.

⁶ Та вӧсна шуӧм кывъясӧс ме бӧр босьта, бус да пӧим пытшкын пукалӧмӧн каитча.

Бӧръя шуӧм

⁷ Иовкӧд сёрнитӧм бӧрын Господь шуис теманса Элифазлы: «Менам скӧрлунӧй ыпъялӧ тэ вылӧ да тэнад кык ёрт вылӧ, ӧд ті энӧ висьталӧй збыльсӧ Ме йылысь, кыдзи вӧчис Менам Иов кесйӧгӧй.

⁸ Та вӧсна босьтӧй сизим ӧшкӧс, сизим межӧс да мунӧй Менам Иов кесйӧг дінӧ. Вайӧй ас вӧснаныд сотан вись, а Менам Иов кесйӧгӧй кевмысяс тіян вӧсна. Ме сибӧда сылысь кевмысьӧмсӧ – тадзи тіянӧс ог янӧд сыысь, мый ті энӧ висьталӧй збыльсӧ Ме йылысь, кыдзи вӧчис Менам Иов кесйӧгӧй».

⁹ Теманса Элифаз, шуахса Вилдад да наамаса Софар мунісны да вӧчисны, кыдзи тшӧктіс налы Господь. Господь сибӧдіс Иовлысь кевмысьӧмсӧ

¹⁰ сылӧн ёртъясыс вӧсна. Та бӧрын Господь сетіс Иовлы ставсӧ кык пӧв унджык, мый сылӧн вӧлі водзынсӧ.

¹¹ Иов дінӧ локтісны сылӧн чой-вокыс да важ тӧдсаясыс. Найӧ ӧтлаын сёйисны-юисны Иов ордын, бурӧдісны-ышӧдісны сійӧс став сьӧкыд нуӧмсьыс, мый сылы вӧлі ыстӧма Господь. Быдӧн козьналіс Иовлы зарни чунькытш да эзысь.

¹² Господь бурсиис Иовлысь бӧръя лунъяссӧ воддза дорсьыс ёнджыка на. Сылӧн вӧлі дас нёль сюрс ыж-кӧза, квайт сюрс верблюд, кык сюрс доддялан ӧш да сюрс энь осёл.

¹³ Сылӧн чужис сизим пи да куим ныв.

¹⁴ Ӧти нылыслы сійӧ сетіс Емима ним, мӧдыслы – Кассия, коймӧдыслы – Керен-Хаппук.

¹⁵ Став му пасьталаыс Иовлӧн нывъяс дорысь мичаджыкъясыс эз вӧвны. Вокъясныслы моз батьныс сетіс налы быдӧнлы аслас овмӧс-эмбурысь юкӧн.

¹⁶ Сьӧкыд нуӧм бӧрын Иов оліс нӧшта на сё нелямын во. Сійӧ аддзыліс аслас челядьлысь да налӧн челядьлысь олӧмсӧ нёльӧд чужанвужйӧдз.

¹⁷ Иов куліс пӧрысь кадӧ олӧмнас пӧтӧмаӧн.