Иов 41 - Коми Библия 2023

¹ Левиафанӧс вермӧм вылӧ лачаыс ылӧдлӧ мортӧс, сійӧс аддзӧмысь нин мортыс кок йывсьыс усьӧ.

² Весиг збой морт оз кут скӧрмӧдны сійӧс. Сідзкӧ, коді нӧ вермас сулавны Менам чужӧмбан водзын?

³ Коді Меным мыйкӧ водзвыв юӧртліс, медым Меным ковмис бурӧн мынтысьны сылы? Ставыс, мый енэж улас – Менам!

⁴ Висьтала левиафанлӧн вир-яй юкӧнъяс йылысь, сылӧн вын йылысь, сылӧн лӧсьыд мыгӧр йылысь.

⁵ Коді вермас пӧрччӧдны сійӧс, лысьтас кыкпӧвста черлыас инмӧдчыны?

⁶ Коді вермас восьтны сылысь черлысӧ? Сылӧн чурвидзысь пиньясысь быдӧн повзяс.

⁷ Кӧрт кодь сайӧдъясӧн вольсалӧм мышкыс – сылӧн ошйысянтор, найӧс топыда йитлӧма,

⁸ найӧ ляскысьӧмаӧсь ӧта-мӧд бердас, весиг сынӧд оз вермы костӧдыс пырны.

⁹ Найӧ сэтшӧма йитчӧмаӧсь, мый торйӧднысӧ он вермы.

¹⁰ Сылӧн несйыштӧмысь югдылӧ, сылӧн синмыс асъя кыа кодь,

¹¹ вом пытшсьыс би чепӧсйӧ, бикиньыс сявкйӧ,

¹² нырсьыс тшын пуркйӧ пусян пӧрт улысь моз,

¹³ лолыштӧмнас ӧгыр ӧзтӧ, вомсьыс ыпъялысь би петӧ.

¹⁴ Сылӧн выныс сьыліас, водзвылас котӧртӧ повзьӧдлӧм.

¹⁵ Чиг яйыс сылӧн топыд, оз сыркъяв,

¹⁶ сьӧлӧмыс из кодь чорыд, изки кодь ён.

¹⁷ Кор сійӧ мыччысьӧ, вынаяс повзьӧны, полӧмысла шӧйӧвошӧны.

¹⁸ Шыпуртӧн сійӧс он бытшкы, ёсь шыӧн, пуртӧн да ньӧвйӧн сійӧс он босьт.

¹⁹ Кӧртыд сылы идзас кодь, ыргӧныд – сісь пу кодь.

²⁰ Ньӧвйысь сійӧ оз пышйы, лыйӧм изйыд сылы кыд кодь.

²¹ Нӧшкыд сылы идзас кодь, ёсь шылӧн шутёвтӧм вылӧ сійӧ видзӧдӧ сералӧмӧн.

²² Кынӧмув кучикыс ёсь йӧнгыльяса, вадорті кыссигӧн гӧрӧ мусӧ.

²³ Саридз пыдӧсын сы гӧгӧр ваыс пуӧ пӧртйын моз, саридзсӧ вӧчӧ варкйысь вый кодьӧн.

²⁴ Кывтігас бӧрсяньыс кольӧ югыд туйвизь, пемыд ваыс лоӧ дзормӧм рӧма.

²⁵ Левиафан кодь мӧдыс му вылас абу, сійӧ нинӧмысь оз пов,

²⁶ вынаджыкъяс вылӧ сійӧ видзӧдӧ повтӧг, зверъяслы сійӧ – ӧксы.