Иов 4 - Коми Библия 2023

Элифаз шыасьӧ Иов дінӧ

¹ Теманса Элифаз воча шуис:

² – Ме кӧ мыйкӧ шуа тэныд, гашкӧ, тайӧ дойдас тэнӧ. Но коді вермас чӧв овны?

³ Тэ ачыд унаӧс велӧдлін, вынтӧмлысь кисӧ ёнмӧдлін,

⁴ тэнад кывйыд усьӧмаӧс кыпӧдліс, лигышмунӧмаӧс тэ вынсьӧдлін.

⁵ А ӧні тэнӧ суис сьӧкыдыс, и тэ нюкыртчин, шогыс инмӧдчис тэӧ, и тэ ловнад усин.

⁶ Енмысь полӧмыд – тэнад зумыд подулыд, сӧстӧм олӧмыд сетӧ тэныд лача.

⁷ Висьтав, вӧлі-ӧ виӧма мыжтӧмӧс, вӧлі-ӧ бырӧдӧма веськыда олысьӧс.

⁸ Ме аддзылі, мый лёксӧ гӧрысьяс да шогсӧ кӧдзысьяс асьныс вундӧны лёксӧ да шогсӧ.

⁹ Енлӧн лолыштӧмысь найӧ кулӧны, Сылӧн скӧрлуна пӧльыштӧмысь бырӧны.

¹⁰ Левлӧн равзӧмыс да эргӧмыс ланьтӧ, том левъяслӧн пиньыс чегъясьӧ.

¹¹ Кыйдӧстӧг лев кулӧ, левпиян пышйӧны-разалӧны.

¹² Гусьӧникӧн локтіс меным кыв, сылӧн вашкӧдӧмыс воис менам пельӧдз.

¹³ Кывйыс локтіс, кор ме мӧвпалі войся аддзылӧм йылысь йӧзыслӧн чорыда узигӧн.

¹⁴ Сэки менӧ полӧм-дзӧрӧм босьтіс, став менам лыясӧй тіралісны.

¹⁵ Тӧв пӧльыштіс чужӧмам, и менам ловгӧнӧй сувтіс.

¹⁶ Ме водзын кодкӧ сулаліс, но ме сійӧс эг тӧд, меным тыдаліс сӧмын мыгӧрыс. Гӧгӧр лӧнис, и ме кылі гӧлӧс шы:

¹⁷ – Морт ӧмӧй вермас лоны Енмысь веськыдджыкӧн, аслас Вӧчысьысь сӧстӧмджыкӧн?

¹⁸ Енмыс весиг Аслас кесйӧгъяслы оз эскы, Аслас анделъяслысь Сійӧ аддзӧ тырмытӧмторъяс.

¹⁹ Нӧшта этшаджыка на Сійӧ эскӧ муысь вӧчӧм мортлы, сёйысь вӧчӧм чомйын олысьлы, кодӧс позьӧ бырӧдны возйӧс моз.

²⁰ Асывнас на мортыс вӧлі, а рытнас абу нин, он и казявлы сылысь бырӧмсӧ.

²¹ Мывкыдлун шедӧдтӧг сійӧ кулӧ, сылысь олӧмсӧ лоӧ босьтӧма.