Иов 39 - Коми Библия 2023

¹ Тӧдан-ӧ тэ керӧсвыв кӧзалысь чужтысян кадсӧ, тӧждысян ӧмӧй вайсьысь лань вӧсна?

² Сямман-ӧ тэ артавны налысь нӧбасян кадсӧ, тӧдан ӧмӧй чужтан здуксӧ?

³ Вайсиганыс найӧ лажыньтчӧны, сьӧкыд нопйӧс моз йӧткыштӧны чужысьӧс.

⁴ Пияныс быдмӧны-ёнмӧны видз вылын, сэсся мунӧны мамныс дорысь да бӧрсӧ оз нин локны.

⁵ Коді лэдзис ризъявны вӧлявывса осёлӧс? Коді разис сійӧс кӧртӧдысь?

⁶ Ме овмӧді сійӧс ласта вылӧ, сеті сылы оланінсӧ солаинысь.

⁷ Сылы тешкодь йӧзӧн жуысь каръяс, сылы оз ков кывзыны уджӧдысьлысь горзӧмсӧ,

⁸ сійӧ йирсьӧ керӧсъяс вылын, корсьӧ сэтысь веж турунтор.

⁹ Кутас-ӧ уджавны тэ вылӧ вӧлявывса ӧш, узьмӧдчас-ӧ сійӧ тэнад лясни дорӧ?

¹⁰ Верман-ӧ тэ сійӧс доддявны, кутас-ӧ сійӧ гӧрны-агсавны тэнсьыд мутӧ?

¹¹ Сылӧн ыджыд выныс вылӧ ӧмӧй пондан лачатӧ кутны, сы вылӧ ӧмӧй уджъястӧ ӧшӧдан?

¹² Кутан ӧмӧй эскыны, мый сійӧ ваяс няньтӧ да тэчас гумла вылад?

¹³ Страус долыда швачкӧ бордъяснас, но аист моз сійӧ оз лэбав.

¹⁴ Страус кольӧ ассьыс колькъяссӧ му вылӧ, медым пӧжсисны пӧсь лыа вылын.

¹⁵ Сійӧ юрас оз кут, мый ветлысь вермас лямӧдны найӧс, пемӧс вермас талявны кок улас.

¹⁶ Сійӧ кын сьӧлӧма пияныс дінӧ, быттьӧ найӧ абу сылӧн, аслас мырсьӧм-вайсьӧмыс сылы веськодь,

¹⁷ ӧд Енмыс абу сетӧма сылы мывкыдлунсӧ, абу козьналӧма гӧгӧрвоӧмлунсӧ.

¹⁸ Но кор страус ӧддзӧдчӧ, вӧлӧс да сы вылын верзьӧмаӧс серамтуйӧ кольӧ.

¹⁹ Тэ ӧмӧй вӧвлы вынсӧ сетін, бурысьӧн сьылісӧ вевттин?

²⁰ Тэ ӧмӧй велӧдін сійӧс чеччавны саранча моз? Сылӧн гораа корскӧмыс повзьӧдана,

²¹ сійӧ нимкодьпырысь кок увсьыс мусӧ гудйӧ, аслас выннас тышӧ нырччӧ.

²² Сылы веськодь повзьӧдлӧмыс, сійӧ оз тірав, шыпуртысь оз пышйы.

²³ Сы вылын гольскӧ верзьӧмалӧн ньӧвпуртӧс, дзирдалӧны ёсь шыяс.

²⁴ Ыззьӧмысла котӧртігас чашнитӧ мусӧ, сійӧ оз сулав буксан шы кылігӧн.

²⁵ Буксігӧн сійӧ гораа гӧрдлӧ, ылісянь исалӧ тышлысь дуксӧ, кылӧ тыш мунӧмсӧ да веськӧдлысьяслысь горӧдӧмсӧ.

²⁶ Тэнад мывкыдлун вӧсна ӧмӧй варыш лэбалӧ, шевкнитӧ ассьыс бордъяссӧ лунвывлань?

²⁷ Тэнад шуӧмысь ӧмӧй кутш кыпӧдчӧ, джуджыд керӧс йылын позсӧ лӧсьӧдӧ?

²⁸ Сійӧ олӧ джуджыд изкырта вылын, узьлӧ сибавтӧм изъя тшупӧд вылын.

²⁹ Сэсянь сійӧ кыйӧдӧ аслыс сёян, синмыс сылӧн ылӧдз аддзӧ.

³⁰ Кӧні шой, сэтчӧ сійӧ лэбӧ, пиянсӧ вирӧн вердӧ.

³¹ Господь нӧшта шуис Иовлы:

³² – Вермас-ӧ Ставсӧвермыськӧд вензьысь велӧдны Сійӧс? Енмӧс мыжалысь мед вочавидзас Сылы.

³³ Сэки Иов воча шуис Господьлы:

³⁴ – Ме – шогмытӧм! Мый ме верма вочавидзны Тэныд? Тупка вомӧс киӧн.

³⁵ Ме шулі ӧтчыдысь, а ӧні кыв ог лэдз, шулі кыкысь, а ӧні тшӧк ланьта.