Иов 37 - Коми Библия 2023

¹ Таысь менам сьӧлӧмӧй тіралӧ, чеччалӧ морӧсын.

² Кывзӧй, кывзӧй Енлысь гӧлӧс шысӧ, Сылӧн вомысь петӧ гымалӧм.

³ Гым шыыс разалӧ енэж пасьтала, чардбиыс югнитӧ му помӧдзыс.

⁴ Чардыштӧм бӧрын гораа гымыштӧ, Енмыс лэдзӧ Ассьыс ён гӧлӧссӧ, оз сувтӧд чардалӧмсӧ.

⁵ Енлӧн гымалан шыыс шензьӧдана, Сылысь ыджыд уджъяссӧ ми огӧ вермӧй гӧгӧрвоны.

⁶ Лымлы Сійӧ шуӧ: «Усь му вылас», зэрлы тшӧктӧ войтасьны, и тшӧктӧ чорыда зэрны.

⁷ Енмыс сэки падмӧдӧ йӧзлысь уджсӧ, медым быдӧн тӧдіс Енлысь уджъяссӧ.

⁸ Весиг звер пырӧ аслас пырмӧсӧ, пукалӧ аслас сайӧдчанінын.

⁹ Лунвывсянь кыпӧдчӧ бушков, войвывсянь пӧльтӧ кӧдзыд тӧв.

¹⁰ Енлӧн пӧльыштӧмысь артмӧ йи, кынмӧ ва веркӧс.

¹¹ Сійӧ тыртӧ кымӧрӧс ваӧн, Сылӧн чардбиыс сявкйӧ кымӧрсянь.

¹² Енлӧн шуӧм серти кымӧръяс кытшлалӧны му весьтті, вӧчӧны сійӧ, мый Енмыс тшӧктӧ.

¹³ Енмыс ыстӧ найӧс, медым мыждыны мусӧ, и ыстӧ, медым бурсьӧлӧмтчыны.

¹⁴ Пель саяд сюркняв тайӧс, Иов, зіль гӧгӧрвоны Енлысь шензьӧданаторъяссӧ!

¹⁵ Тэ ӧмӧй тӧдан, кыдзи Енмыс веськӧдлӧ кымӧръясӧн, кыдзи чардбиыс югнитӧ Сылӧн кымӧрсянь?

¹⁶ Тӧдан-ӧ, кыдзи ӧшалӧны кымӧръяс, гӧгӧрвоан-ӧ Ставсӧтӧдысьлысь шензьӧданаторъяссӧ?

¹⁷ Кор пӧльтӧ лун тӧв да пӧжӧ мусӧ, сэки тэнӧ пӧсьӧдӧ паськӧмыд.

¹⁸ Тэ ӧмӧй Енмыскӧд артмӧдін енэжсӧ, ыргӧн рӧмпӧштан кодь ёнӧн вӧчин енэжвевтсӧ?

¹⁹ Сідзкӧ, велӧд миянӧс, мый шуны Енмыслы, тайӧ пемыдыс вӧсна ми нинӧм огӧ вежӧртӧй.

²⁰ Коді висьталас Сылы менсьым кывъясӧс? Воас-ӧ Сыӧдз мортлӧн шуӧмыс?

²¹ Ӧні кымӧр сайсянь оз тыдав югыдыс, но тӧвру пӧльыштас и вештас кымӧръяссӧ.

²² Войвывсянь локтӧ зарни кодь югӧр, Енсӧ кытшалӧ повзьӧдана дзирдалӧм.

²³ Ми огӧ вермӧй шымыртны Ставсӧвермысьӧс, Сійӧ ён вына, веськыда мыждӧ, Сылӧн эм веськыдлун, Сійӧ некодӧс оз увтырт.

²⁴ Та вӧсна быдӧн мед вежавидзӧмӧн полас Сыысь. Сійӧ оз видзӧд на вылӧ, кодъяс лыддьӧны асьнысӧ мывкыдаӧн.