Иов 36 - Коми Библия 2023

¹ Элиху водзӧ сёрнитіс:

² – Кывзышт на менӧ, Иов, менам эм на мый тэныд Енсянь висьтавны.

³ Менам тӧдӧмлунӧй пыдісянь, ме петкӧдла, мый менӧ Вӧчысьӧй веськыд.

⁴ Дзик збыльысь менам кывъясын ылӧгыс абу, тэ водзын – ыджыд тӧдӧмлуна морт.

⁵ Енмыс некодӧс оз увтырт, Сійӧ мывкыд да ыджыд вына.

⁶ Лёк вӧчысьӧс Сійӧ оз коль ловйӧн, коньӧрлы веськыдлун серти вӧчӧ.

⁷ Веськыда олысьяс вылысь Сійӧ синсӧ оз вештыв, пуксьӧдӧ найӧс юравны ӧксыяскӧд, вылӧ кыпӧдӧ найӧс пыр кежлӧ.

⁸ Чептӧн дорӧмаяслы, сьӧкыдас йӧрмӧмаяслы

⁹ Енмыс петкӧдлӧ налысь уджъяссӧ – лёк вӧчӧмсӧ да ыкшаасьӧмсӧ.

¹⁰ Енмыс восьтӧ налысь пельсӧ да ӧлӧдӧ найӧс, тшӧктӧ ылыстчыны лёксьыс.

¹¹ Кывзасны кӧ да пондасны кесъявны Сылы, сэки олан лунъясыс налӧн лоӧны шудаӧсь, олан нэмыс тырас нимкодьлунӧн.

¹² Оз кӧ кывзыны, шыпуртысь моз куласны, тӧдӧмлунтӧг вуджасны мӧдаръюгыдас.

¹³ Ентӧг олысьяслӧн сьӧлӧмыс скӧрлунӧн тырӧма, найӧ оз шыасьны Енмыс дінӧ весиг сэки, кор Сійӧ чепъясӧн найӧс дорӧ.

¹⁴ Налӧн олӧмыс помасьӧ том кадӧ, найӧс кулӧмыс виччысьӧ кырсалысьясӧс моз.

¹⁵ Но коньӧрӧс Енмыс мездӧ шог пыр, восьтӧ сылысь пельсӧ сьӧкыдалӧм пыр.

¹⁶ Сійӧ эськӧ тшӧтш тэнӧ петкӧдіс дзескыдінсьыд паськыдінӧ, кӧні топӧдӧмыс абу, и тэнад пызаныд эськӧ тыр вӧлі чӧскыд сёянӧн.

¹⁷ Но тэнӧ суис мыждӧм лёк вӧчӧмсьыд, и тэнӧ лоӧ веськыда мыждӧма.

¹⁸ Видзчысь, мед Енлӧн скӧрлуныс эз бырӧд тэнӧ! Ыджыд дон мынтӧмыд тэнӧ оз мезды.

¹⁹ Мездас-ӧ тэнӧ отсӧг йылысь горзӧмыд, отсалас-ӧ тэныд мый вынсьыд уджалӧмыд?

²⁰ Эн виччысь сійӧ войсӧ, кор войтыръясӧс суас бырӧдӧм.

²¹ Видзчысь лёкас сетчӧмысь, сьӧкыдалӧм пыдди эн бӧрйы лёксӧ.

²² Видзӧд, кутшӧм ыджыд Енлӧн выныс! Сюрас-ӧ Сы кодь велӧдысьыс?

²³ Коді индас Сылы туйсӧ? Коді вермас шуны, мый Сійӧ оз веськыда вӧч?

²⁴ Эн вунӧд ошкыны Сылысь уджъяссӧ, мый йылысь йӧзыс сьылӧны.

²⁵ Став йӧзыс аддзӧны, но сӧмын ылісянь видзӧдӧны Сылӧн уджъясыс вылӧ.

²⁶ Енмыс сэтшӧм ыджыд, ми огӧ вермӧй тӧдмавны Сійӧс, огӧ вермӧй артавны Сылысь вояссӧ.

²⁷ Сійӧ чукӧртӧ ва войтъяс, сэсся зэрӧн кисьтӧ,

²⁸ найӧ войталӧны кымӧрсянь, сувтса зэрӧн киссьӧны йӧз вылӧ.

²⁹ Коді вермас гӧгӧрвоны, кыдзи Сійӧ ӧшлӧ кымӧръяссӧ? Коді вермас гӧгӧрвоны Енлӧн оланінсянь гымыштӧмсӧ?

³⁰ Енэж пасьтала Сійӧ койыштӧ чардбисӧ, саридз пыдӧссӧ Сійӧ пӧдлалӧ.

³¹ Зэр кисьтӧмӧн Сійӧ мыждӧ войтыръясӧс, зэр отсӧгӧн сетӧ налы тырмымӧн нянь.

³² Сылӧн киын чардбиыс, тшӧктӧ лыйны, кытчӧ колӧ.

³³ Гымыштӧмыс юӧртӧ Сы йылысь, весиг пемӧсъяс тайӧс гӧгӧрвоӧны.