Иов 35 - Коми Библия 2023

¹ Элиху водзӧ сёрнитіс:

² – Тэ асьтӧ шуан Ен дорысь веськыдӧн. Чайтан, мый тайӧ веськыд?

³ Тэ шуин: «Мый бурыс меным, ме кӧ ӧтдортча мыжсьыс?»

⁴ Ме вочавидза тэныд, тшӧтш тэнад ёртъяслы.

⁵ Лэпты синтӧ енэжланьыс да видзӧдлы, аддзан, кымӧръясыс тэысь ёна вылынӧсь.

⁶ Тэ кӧ мыж вӧчан, тайӧн ӧмӧй тэ Енмыслы паныд вӧчан? Весиг тэнад уна лёк вӧчӧмыд оз вай Сылы лёксӧ.

⁷ Тэ кӧ веськыда олан, мый Сылы тайӧн сетан, мый Сійӧ тэнад кисянь босьтӧ?

⁸ Тэнад мыж вӧчӧмыд инмӧ мортлы, тэнад веськыда олӧмыд – мувывса олысьлы.

⁹ Йӧзыс ойзӧны дзескӧдӧмысь, горзӧны вынаяслӧн нартитӧмысь.

¹⁰ Но некод оз шу: «Кӧні Енмыс, менӧ Вӧчысьыс? Кӧні Сійӧ, коді войся кадӧ сетӧ сьывны,

¹¹ коді пемӧслы дорысь миянлы унджык сетӧ гӧгӧрвоӧмлунсӧ, енэжвыв лэбачӧс дорысь миянӧс ёнджыка вежӧрсьӧдӧ».

¹² Йӧзыс горзӧмӧн отсӧг корӧны, но налӧн вылӧ кыпӧдчӧм да лёклун вӧсна Енмыс налы оз вочавидз.

¹³ Енмыс збыльысь оз кыв налысь ковтӧм кывъяссӧ, Ставсӧвермысь оз видзӧдлы на вылӧ.

¹⁴ Тэ шуан, мый тэ Енсӧ он аддзы, но виччысь Сійӧс, ӧд тэнсьыд могтӧ Сійӧ кутас видлавны.

¹⁵ Енмыс кӧ Аслас скӧрлунӧн оз мыжды, Сылы кӧ веськодь мортлӧн мыжыс,

¹⁶ сідзкӧ, Иов весьшӧрӧ вомсӧ восьтіс, шыбласис мӧвпышттӧм кывъяснас.