Иов 34 - Коми Библия 2023

¹ Элиху водзӧ сёрнитіс:

² – Кывзӧй менсьым висьталӧмӧс, мывкыдаяс, пельнытӧ копыртӧй мелань, вежӧртысьяс!

³ Вом тӧдмалӧ сёянлысь кӧрсӧ, пель торйӧдӧ кылӧм кывъяс.

⁴ Мӧвпалыштамӧй, мый вӧлі шуӧма веськыда, тӧдмаламӧй, мый вӧлі шуӧма бура.

⁵ Иов шуис, ме пӧ абу мыжа, но Енмыс менӧ оз веськыда мыжды,

⁶ ме пӧ збыльсӧ висьтала, но менӧ лыддьӧны пӧръясьысьӧн, менам пӧ абу мыжыс, но дойӧй менам оз бурд.

⁷ Сюрас-ӧ Иов кодь лёкӧдысь мортыс, кодлы омӧльтӧмыс ва юӧм кодь?

⁸ Сійӧ ёртасьӧ мыжаяскӧд, ветлӧ лёк вӧчысьяскӧд ӧти туйӧд.

⁹ Сійӧ шуліс, Енмыслы шогмӧмыс пӧ мортлы бурсӧ оз вай.

¹⁰ Сідзкӧ, кывзӧй менӧ, сюсь вежӧраяс! Енмыс оз вӧч лёксӧ, Ставсӧвермысьлӧн уджъясыс веськыдӧсь.

¹¹ Сійӧ мынтысьӧ мортлы сылӧн уджъясыс серти, сетӧ сылы оласногыс кузя.

¹² Дзик збыльысь Енмыс оз вӧч лёксӧ, Ставсӧвермысь мыждігас оз пӧръясь.

¹³ Коді пуктіс Сійӧс юравны муӧн? Коді сетіс муюгыдсӧ Сылӧн кипод улӧ?

¹⁴ Сійӧ кӧ Ассьыс сьӧлӧмсӧ бергӧдас Асланьыс, Ассьыс ловсӧ да ловшысӧ бӧр босьтас,

¹⁵ сэки эськӧ став ловъя олысьыс ӧти здукӧн кулас, мортыс муӧн бӧр лоас.

¹⁶ Тэнад кӧ эм вежӧр, кывзы, сюся кывзы менсьым висьталӧмӧс.

¹⁷ Енмыс кӧ мустӧмтӧ веськыдлунсӧ, вермас-ӧ Сійӧ юравны? Тэныд-ӧ мыждыны веськыд да вына Енмӧс?

¹⁸ Енмыс ӧксыӧс шуӧ шогмытӧмӧн, нималана йӧзӧс – лёк вӧчысьясӧн,

¹⁹ Сійӧ оз сулав юралысьяс дор, озырӧс оз пукты гӧль дорысь вылӧджык, ӧд ставныс найӧ – Сылӧн вӧчӧмторъяс.

²⁰ Войшӧрнас найӧ тӧдлытӧг кулӧны, войтыръяс шызьӧны-кыпӧдчӧны да бырӧны, вынаясӧс вештӧны, но оз морт киӧн.

²¹ Енмыс видзӧдӧ мортлӧн туй бӧрся, аддзӧ сылысь быд воськов.

²² Абу сэтшӧм пемыдыс, весиг сэтшӧм сап пемыдыс, кытчӧ эськӧ вермисны дзебсьыны мыж вӧчысьяс.

²³ Енмыс оз инды мортлы кадсӧ, кор сылы сувтны Енлӧн ёрд водзӧ.

²⁴ Юасьтӧг Сійӧ пасьвартӧ вынаясӧс, на пыдди пуктӧ мӧдъясӧс.

²⁵ Сійӧ бура тӧдӧ налысь уджъяссӧ, ӧти войӧн найӧс песовтӧ да бырӧдӧ.

²⁶ Лёк вӧчысьясӧс моз Енмыс мыждӧ найӧс ставныслӧн син водзын,

²⁷ мыждӧ сыысь, мый найӧ кежисны Енсьыс, эз кӧсйыны тӧдны Сылысь туйяссӧ.

²⁸ Мыждӧ найӧс, ӧд гӧльяслӧн бӧрдӧмыс воис Сыӧдз, коньӧръяслысь ойзӧмсӧ Сійӧ кыліс.

²⁹ Енмыс кӧ чӧв ланьтас, коді вермас мыжавны Сійӧс? Енмыс кӧ вевттяс чужӧмбансӧ, коді вермас аддзыны Сійӧс? Сійӧ ыджыдалӧ войтыр вылын и торъя морт вылын,

³⁰ медым Ентӧг олысь эз ыджыдав, эз ло войтырыслы налькйӧн.

³¹ Морт мед шуас Енмыслы: «Ме нуи сьӧкыдсӧ, водзӧ ог кут вӧчны мыжсӧ.

³² Ме кӧ мыйкӧ ог гӧгӧрво, велӧд менӧ, вӧчи кӧ лёксӧ, водзӧ ог кут вӧчны».

³³ Аслад пыксьӧмӧн чайтан, мый тэнад кӧсйӧм серти Енмыс мыждӧ да тырдонсӧ сетӧ? Тэныд аслыд колӧ бӧрйыны, оз меным. Висьтав, мый тэ тӧдан.

³⁴ Вежӧра йӧз шуасны меным, мывкыд морт менӧ кывзігӧн шуас,

³⁵ Иов пӧ сёрнитӧ мӧвпавтӧг, сылӧн кывъясыс пӧ вежӧртӧмӧсь.

³⁶ Иовӧс тӧдмалӧмыс мед оз помась, ӧд сылӧн сёрниыс лёк вӧчысьлӧн кодь.

³⁷ Мыж дінас сійӧ содтӧ нӧшта на Енлы паныд кыпӧдчӧм, серам туйӧ пуктӧ миянӧс да водзӧ мыжалӧ Енсӧ.