Иов 33 - Коми Библия 2023

¹ Кывзы менӧ, Иов, быд кыв сюркняв пель саяд.

² Со, ме восьті вомӧс, кывйӧй вомам чепсасьӧ нин.

³ Менам кывъясӧй петӧны веськыд сьӧлӧмысь, менам вомӧй висьталӧ збыльсӧ – сійӧ, мый ме тӧда.

⁴ Енлӧн Лов вӧчис менӧ, Ставсӧвермысь пӧльыштіс ме пытшкӧ олӧмсӧ.

⁵ Верман кӧ, вочавидз меным, сувт ме водзӧ да дорйысь.

⁶ Ен водзын ме – тэ кодь жӧ, миянӧс тэкӧд ӧти сёйысь вӧчӧма,

⁷ та вӧсна эн пов меысь, Иов, ме тэнӧ ог сьӧктӧд.

⁸ Аслам пельӧн ме кывлі тэнсьыд сёрнитӧ, кывлі, мый тэ висьталін. Тэ шуин:

⁹ «Ме сӧстӧм, лёксӧ эг вӧчлы, ме абу мыжа, и мыжсӧ эг вӧчлы.

¹⁰ Но Енмыс аддзис, мыйысь мыжавны менӧ, Сійӧ лыддьӧ менӧ Аслас вӧрӧгӧн.

¹¹ Сійӧ сюйис кокӧс тшемилӧ костӧ, кыйӧдӧ менсьым быд воськов».

¹² Ме шуа: тайӧ абу тадз. Енмыс ӧд мортсьыс ёна ыджыд.

¹³ Мыйла тэ вензян Сыкӧд, шуан, мортлы пӧ Сійӧ оз вочавидз?

¹⁴ Енмыс висьталӧ ӧтчыд, висьталӧ мӧдысь, но мортыс оз казяв тайӧс.

¹⁵ Вӧтын, войся петкӧдчылӧмын, кор мортсӧ унмыс личкӧма нин, кор сійӧ вугыртӧма нин вольпасяс,

¹⁶ Енмыс восьтӧ мортлысь пельсӧ, вынсьӧдӧ Ассьыс ӧлӧдӧмсӧ,

¹⁷ медым ылыстны мортсӧ лёк вӧчӧмысь, мездыны вылӧ кыпӧдчӧмысь,

¹⁸ видзны сійӧс кулӧмысь, сылысь олӧмсӧ – шыпуртысь.

¹⁹ Вольпасьын куйлысьӧс Енмыс чирыштӧ висьӧм пыр, кор сьӧкыд дойыс песлӧдлӧ лыяссӧ.

²⁰ Сэки сылы вомас нянь оз пыр, весиг чӧскыд сёян сылы оз ков.

²¹ Сылӧн вир-яйыс син водзас сылӧ, тыдавтӧм лыясыс пондӧны чурвидзны.

²² Кок пӧвнас сійӧ гуын нин, сылӧн олӧмыс матыстчӧ кулӧмлань.

²³ Но сюрас кӧ андел, сюрс пытшкысь ӧти, коді сувтас висьысь дор да индас сылы веськыд туй,

²⁴ сэки Енмыс бурсьӧлӧмтчас висьысь дінӧ, тшӧктас анделлы мездыны висьысьӧс кулӧмсьыс, ӧд сыысь вештысьӧма нин.

²⁵ Сэки сылӧн вир-яйыс выльмас, томлуныс сылы бӧр бергӧдчас.

²⁶ Сійӧ пондас кевмысьны Енлы, и Енмыс бурсьӧлӧмтчас сы дінӧ, сійӧ нимкодясьӧмӧн кутас видзӧдны Енлӧн чужӧмбан вылӧ, и Енмыс бара сетас сылы веськыда овны.

²⁷ Сьылӧмӧн сійӧ кутас юӧртны йӧзыслы: «Ме мыж вӧчи, эг вӧв веськыд, но Енмыс эз мынтысь меным уджъясӧй серти.

²⁸ Сійӧ мездіс менӧ гортйӧ водӧмысь, сетіс меным аддзыны югыдсӧ!»

²⁹ Енмыс тадзи вӧчӧ мортыскӧд кыкысь-куимысь,

³⁰ медым видзны сійӧс кулӧмысь, югдӧдны сійӧс олӧмыслӧн югыднас.

³¹ Сюся кывзы менӧ, Иов, чӧв ов, а ме кута висьтавны.

³² Эм кӧ мыйкӧ шуны, шу, ме кӧсъя, мед тэ колин веськыдӧн.

³³ А шунытӧ кӧ нинӧм, сідзкӧ, кывзы менӧ, ме велӧда тэнӧ мывкыдлунас, а тэ чӧв ов.