Иов 32 - Коми Библия 2023

Элиху шыасьӧ Иов да сылӧн куим ёртыс дінӧ

¹ Та бӧрын куимнан ёртыс дугдісны вензьыны Иовкӧд, ӧд сійӧ лыддис асьсӧ веськыдӧн.

² Сэки Рам рӧдысь Буз чужанвужйысь Баракеллӧн Элиху пиыс ёна скӧрмис Иов вылӧ сыысь, мый Иов лыддис веськыдӧн асьсӧ, а эз Енсӧ.

³ Скӧрмис тшӧтш Иовлӧн куим ёртыс вылӧ, ӧд найӧ эз сяммыны вочавидзны Иовлы, а мыждісны сійӧс.

⁴ Элиху виччысис, медым панны сёрни, ӧд мукӧдыс арлыднас вӧліны сыысь ыджыдджыкӧсь.

⁵ Но кор аддзис, мый Иовлӧн куим ёртыс оз вермыны вочавидзны Иовлы, пузис ас пытшкас.

⁶ Элиху, Буз чужанвужйысь Баракеллӧн пиыс, шыасис: – Ме том на, а ті ыджыд арлыдаӧсь нин, та вӧсна ме полі, эг лысьт висьтавны сійӧ, мый ме тӧда.

⁷ Ме шуи аслым: мед пӧрысьяс сёрнитасны, мед дыр олысьяс велӧдасны мывкыдлунас.

⁸ Но ӧд морт пытшкас эм лов, Ставсӧвермысьлӧн лолыштӧмыс сетӧ сылы мывкыдлунсӧ.

⁹ Абу сӧмын дыр олысьяс мывкыдаӧсь, оз сӧмын пӧрысьяс гӧгӧрвоны збыльсӧ.

¹⁰ Та вӧсна кывзыштӧй менӧ, а ме висьтала сійӧс, мый тӧда.

¹¹ Ме виччыси, мый ті шуанныд, сюся кывзі тіянлысь гӧгӧрвоӧдӧмнытӧ, кор ті корсинныд колана кывъяс.

¹² Ме зіли гӧгӧрвоны тіянӧс, но аддза, тіян пиысь некод оз вермы чирыштны Иовӧс, оз вермы воча шуны сылы.

¹³ Энӧ шуӧй, мый ті аддзинныд мывкыдлунсӧ. Иовӧс Енмыс чирыштас, а оз морт.

¹⁴ Сійӧ кӧ мекӧд сёрнитіс тіянкӧд моз, менам вочавидзӧмӧй эськӧ эз вӧв тіян кодь.

¹⁵ Тайӧ куим мортыс повзисны, тшӧк ланьтісны, вочакыв оз сетны.

¹⁶ Ме ог кут виччысьны, найӧ кӧ нинӧм оз висьтавны, сулалӧны кӧ да чӧв олӧны.

¹⁷ Сідзкӧ, ӧні ме кута сёрнитны, висьтала сійӧ, мый ме тӧда.

¹⁸ Ме тырӧма сёрниӧн, ловлы дзескыд пытшкӧсам.

¹⁹ Ме восьттӧм вина доз кодь, выль кучик доз моз дась косясьны.

²⁰ Висьтала кӧ, меным кокньӧдас, сідзкӧ, восьта вомӧс да вочавидза.

²¹ Мортлӧн чужӧм вылӧ видзӧдны ог кут, некодлы шогмыны ог зіль,

²² ӧд ме ог куж пӧръясьны. Татшӧмторсӧ кӧ вӧча, менӧ Вӧчысьӧй бырӧдас менӧ.