Иов 31 - Коми Библия 2023

¹ Ме кӧрталі йитӧд аслам синкӧд, мый ог кут кыйявны аньяс вылӧ.

² Медвылысса Енсянь мый меным виччысьны? Енэжвывса Ставсӧвермысьсянь мый меным вичмас?

³ Бырӧдӧмыс ӧмӧй оз вичмы мыж вӧчысьлы, шогыс – лёк вӧчысьлы?

⁴ Менсьым туйясӧс ӧмӧй Енмыс оз аддзы, менсьым воськовъясӧс ӧмӧй оз лыддьы?

⁵ Но ме кӧ олі ылӧдчӧмӧн, менам кокӧй кӧ тэрмасис пӧръясьны,

⁶ сідзкӧ, Енмыс мед пуктас менӧ веськыдлуныслӧн вески вылӧ, сэки Сійӧ аддзас, мый ме абу мыжа.

⁷ Менам воськовъясӧй кӧ кежисны веськыд туйысь, сьӧлӧмӧй кӧ син бӧрся вӧтчис, ки пыдӧсӧ кӧ пежыс ляксис,

⁸ сэки менсьым кӧдзӧмасӧ мед мукӧдъяс сёясны, менсьым став петассӧ мед вужнас нетшкасны.

⁹ Менам сьӧлӧмӧй кӧ ыштыліс ань вылӧ, ме кӧ кыйӧдлі матыссалысь гӧтырсӧ сылӧн ӧдзӧс дорас,

¹⁰ сэки гӧтырӧй мед мукӧдлы нянь изас, сыкӧд мед мукӧдъяс узьласны.

¹¹ Татшӧм пеж вӧчӧмыс – мыж, мыйысь колӧ мыждыны.

¹² Татшӧм мыжыс эськӧ кушӧдз нетшкис менсьым быдмӧм няньӧс, би моз эськӧ ньылыштіс да бырӧдіс ставсӧ.

¹³ Ме кӧ эг вӧв веськыдӧн кесйӧгъяс дінӧ, кор найӧ норасьлісны меным,

¹⁴ сэки мый меным вӧчны, кор Енмыс сувтас мыждыны, мый ме вочавидза Сылы?

¹⁵ Ӧд Сійӧ, коді артмӧдіс менӧ мам кынӧмын, артмӧдіс тшӧтш менсьым кесйӧгъясӧс. Ми – ӧти Енлӧн вӧчӧмторъяс.

¹⁶ Ме ӧмӧй эг отсавлы гӧльяслы, ме ӧмӧй мӧдӧдлі дӧваӧс бӧрдан синмӧн?

¹⁷ Ӧтнам ӧмӧй сёйлі ассьым няньӧс, эг ӧмӧй юксьывлы сыӧн батьтӧм-мамтӧмъяскӧд?

¹⁸ Том кадсянь ме вӧлі батьтӧм-мамтӧмъяслы бать кодьӧн, став олӧм чӧж тӧждыси дӧваяс вӧсна.

¹⁹ Ме кӧ аддзывлі кынмысьӧс, коді вӧлі куланвыйын, коньӧрӧс, кодлӧн эз вӧв мыйӧн вевттьысьны,

²⁰ сэки менам ыж вурунӧй шонтыліс сійӧс, и сійӧ аттьӧавліс менӧ.

²¹ Ме кӧ кыпӧдлі киӧс батьтӧм-мамтӧм вылӧ, тӧдӧмӧн, мый менам эмӧсь дорйысьяс карса дзиръя дорын,

²² сэки менам сойӧй мед орас пельпомысь, менам киӧй мед чегас гырддзаӧд.

²³ Енлӧн ыджыдалан выныс водзын ме эськӧ эг вермы сулавны, но ме пола Сылӧн мыждӧмысь.

²⁴ Ме ӧмӧй лача куті зарни вылӧ, шулі ӧмӧй зарнилы, тэ пӧ менӧ видзысьыс?

²⁵ Ме ӧмӧй нимкодясьлі, мый менам уна озырлун, мый сы мындасӧ ме аслам киӧн шедӧді?

²⁶ Шонділысь дзирдалӧмсӧ, тӧлысьлысь пӧртмасьӧмсӧ аддзигӧн

²⁷ менам сьӧлӧмӧй кӧ гусьӧн копрасис налы, ме кӧ ыстылі налы ки пыдӧсын окыштӧмӧс,

²⁸ тайӧ эськӧ тшӧтш вӧлі мыжӧн, мыйысь колӧ мыждыны, тайӧ эськӧ вӧлі Медвылысса Енмысь соссьӧм.

²⁹ Ме ӧмӧй нимкодясьлі менӧ мустӧмтысьлӧн шог понда, меным ӧмӧй долыд вӧлі, кор сійӧс лёктор суліс?

³⁰ Ме эг лэдзлы аслам вомлы вӧчны мыжсӧ, ёрны мустӧмтысьлысь олӧмсӧ.

³¹ Менам керкаын олысьяслӧн эз вӧв помка шуасьны, мый ме эг лэдз налы пӧттӧдз яй сёйны.

³² Йӧз муысь локтысьӧс эг кольлы ывлаӧ, менам ӧдзӧсӧй пыр вӧлі восьса.

³³ Мукӧдыс моз кӧ ме вевтти лёк вӧчӧмӧс, питшӧгӧ дзеби мыжӧс,

³⁴ сэки эськӧ ме тіралі йӧз чукӧрын, полі ас войтырлӧн увтыртӧмысь, ме эськӧ чӧв олі да керкаысь эг петавлы.

³⁵ Кывзіс кӧ эськӧ кодкӧ менӧ! Аслам кывъяс улӧ ме кырмася. Ставсӧвермысь мед вочавидзас меным, менӧ Мыжалысь мед гижас мыжалӧмсӧ.

³⁶ Ме эськӧ новлӧдлі тайӧ гижӧдсӧ пельпом вылын, юркытшӧс моз пукті сійӧс юр вылӧ,

³⁷ висьталі эськӧ Енлы аслам быд воськов йылысь, ӧксы моз эськӧ матыстчи Сы дінӧ.

³⁸ Аслам видз-муӧй кӧ менӧ мыжалӧ, гӧрӧм муӧй кӧ ме вылӧ элясьӧ,

³⁹ ме кӧ эг тӧждысь муӧй вӧсна, кытысь сёйлі быдтассӧ, ме кӧ увтыртлі сэні уджалысьясӧс,

⁴⁰ сэки шобді пыдди мед петас йӧн, ид пыдди – ёг турун. Тайӧ кывъяснас Иовлӧн сёрниыс помасис.