Иов 30 - Коми Библия 2023

¹ А ӧні менӧ сералӧны меысь томджыкъяс. Налысь батьяссӧ ме матӧ эг сибӧдлы, весиг аслам ыж видзан понъяс пӧвстӧ эг лэдзлы.

² Мый меным налӧн вына киысь? Налӧн ёнлуныс кольӧма нин,

³ тшыглун да гӧльлун вӧсна найӧ шӧйтӧны ватӧм му вывті, куш да пемыд овтӧминӧд.

⁴ Лежнӧг улысь найӧ нетшкӧны турун, нянь пыдди сёйӧны быдмӧг вужъяс.

⁵ Йӧз пӧвстысь найӧс вӧтлӧны, гусясьысьяс вылӧ моз на вылӧ лёкысь горзӧны.

⁶ Найӧ олӧны ковтысса кырӧмъясын, му гуранъясын да кырта горсъясын.

⁷ Рассялӧминын ружтӧны-омлялӧны, чукӧрӧн йӧжгыльтчӧмаӧсь лежнӧг улӧ.

⁸ Налысь нимсӧ вунӧдӧма, найӧ эновтӧм йӧз, асланыс муысь вӧтлӧмаяс.

⁹ Найӧ лӧсьӧдлӧны ме йылысь сералана сьылан, гартлӧны менӧ сёрнианыс.

¹⁰ Найӧ зывӧктӧны менӧ, ӧтдортчӧны меысь, сьӧлалӧны меным чужӧмӧ.

¹¹ Енмыс личӧдіс менам ньӧввужлысь везсӧ, пегыртіс менӧ, та вӧсна найӧс нинӧм оз кут меным лёк вӧчӧмысь.

¹² Тайӧ пеж йылӧмыс кыпӧдчӧ ме вылӧ веськыдладорсянь, найӧ уськӧдӧны менӧ кок йылысь, писькӧдӧны мелань туйнысӧ, мед бырӧдны менӧ.

¹³ Менсьым туйӧс потшисны, дасьтысьӧны бырӧдны менӧ, и некод найӧс оз сувтӧд.

¹⁴ Ыджыд розьӧд моз найӧ пырӧны, гора шыӧн уськӧдчӧны ме вылӧ.

¹⁵ Полӧм кытшаліс менӧ, нималӧмӧй тӧвру моз разаліс, шудлунӧй кымӧр моз ылыстчис-вошис.

¹⁶ Менӧ шымыртісны шогӧн тырӧм лунъяс, олӧмӧй эновтӧ менӧ.

¹⁷ Войнас лыясӧй юкалӧны, дойӧй оз ланьтлы.

¹⁸ Енмыс ыджыд вынӧн нетшыштіс паськӧмӧс ме вылысь, дӧрӧм шошаӧд кыскыштіс,

¹⁹ шыбитіс менӧ сёй лятиӧ, ме лои бус да пӧим кодь.

²⁰ Ме чуксала-кора Тэнӧ, Енмӧй, но Тэ меным он вочавидз, ме сулала Тэ водзын, а Тэ сӧмын видзӧдан ме вылӧ.

²¹ Тэ чорыд лоин ме дінӧ, дзескӧдан менӧ вына кинад.

²² Тэ шыбитін менӧ тӧвнырлы, летан-швачйӧдлан менӧ.

²³ Ме тӧда: Тэ менӧ вайӧдан кулӧмас, сэтчӧ, кытчӧ чукӧртчас став ловъя олысьыс.

²⁴ Тэ вештан китӧ лы чукӧр дінысь, шог дырйиыс он кыв отсӧг корысьӧс.

²⁵ Эг ӧмӧй ме бӧрдлы сьӧкыдалысь вӧсна, эз ӧмӧй сьӧлӧмӧй шогсьывлы коньӧр вӧсна?

²⁶ Ме виччыси бурсӧ, но менӧ лёкыс суис, виччыси югыдсӧ, но локтіс пемыдыс.

²⁷ Пытшкӧсӧй сотчӧ, оз лӧнь, шог лунъяс суисны менӧ.

²⁸ Ме сьӧдӧді, но эг шондісьыс, йӧз чукӧрын ме горзӧмӧн отсӧг кора.

²⁹ Шакалъяслы ме лои вокӧн, страусъяслы – ёртӧн.

³⁰ Кучикӧй сьӧдӧдіс, лыясӧй биа висьӧмысь сотчӧны.

³¹ Менам гуслиӧй бӧрдан шы лэдзӧ, пӧлянӧй шог сьыланкыв ворсӧ.