Иов 3 - Коми Библия 2023

Иов ёрӧ ассьыс чужан лунсӧ

¹ Сэсся Иов ёрис ассьыс чужан лунсӧ.

² Сійӧ шуис:

³ – Мед бырас сійӧ луныс, кор ме чужи, мед бырас сійӧ войыс, кор пиӧн сьӧктаммис ань.

⁴ Сійӧ луныс мед лоӧ сап пемыдӧн, Енмыс мед оз казьтышт сы йылысь енэжас, асъя югыдыс мед оз мыччысь сылы.

⁵ Мед шымыртас сійӧс пемыдыс, лэччас сы вылӧ сап пемыдыс, мед вевттяс сійӧс сьӧд кымӧрыс, мед повзьӧдас сійӧс шонділӧн кусӧмыс.

⁶ Сійӧ войсӧ мед ньылыштас пемыдыс, сійӧ лунсӧ мед лоӧ вуштӧма воыслӧн лунъяс лыдысь, ни ӧти тӧлысьӧ мед оз ло пыртӧма.

⁷ Сійӧ войыс мед оз сет сьӧктаммыны, мед оз тӧд нимкодясьӧмсӧ.

⁸ Мед ёрасны сійӧс нимкыв лыддьысьяс, кодъяс вермӧны садьмӧдны весиг левиафанӧс.

⁹ Асъя кодзувъяс мед кусасны югдытӧдзыс на, сійӧ войыс мед весьшӧрӧ виччысяс югдӧмсӧ, мед оз аддзыв кыа петӧмсӧ,

¹⁰ ӧд мамлысь чужтан ӧдзӧссӧ эз тупкы, менам синмысь шогсӧ эз дзеб.

¹¹ Мыйла ме эг чуж шойӧн, мыйла эг кув мам кынӧмысь петігӧн?

¹² Мыйла аслас пиӧн шуис менӧ батьӧй, мыйла морӧснас нёньӧдіс менӧ мамӧй?

¹³ Ме эськӧ ӧні лӧня куйлі, шойччи-узи

¹⁴ ӧксыяскӧд да налӧн туйдӧдысьяскӧд, кодъяслӧн керкаясыс ӧні киссьӧмаӧсь,

¹⁵ юралысьяскӧд, кодъяслӧн вӧлі зарни, кодъяс тыртісны керканысӧ эзысьӧн.

¹⁶ Менӧ эськӧ гуалісны чӧвтчӧм кагаӧс моз, пузчужӧмаӧс моз, коді югыдсӧ эз аддзыв.

¹⁷ Сэні лёк вӧчысьяс дугдӧны повзьӧдлыны, вынсьыс усьӧмаяс шойччӧны,

¹⁸ дзескыдінӧ йӧртлӧмаяс повтӧг олӧны, найӧ оз нин кывны уджӧдысьлысь горзӧмсӧ.

¹⁹ Ичӧт и ыджыд сэні ӧткодьӧсь, кесйӧг абу нин ыджыдыслӧн кипод улын.

²⁰ Сьӧкыдалысьлы мыйла сетӧма югыдсӧ, ловнас усьӧмалы – олӧмсӧ?

²¹ Найӧ виччысьӧны кулӧмсӧ, а сійӧ оз лок, корсьӧны сійӧс дзебӧм озырлунӧс моз.

²² Кор воӧ кад водны гортйӧ, найӧ тырӧны ыджыд нимкодьлунӧн.

²³ Мыйла югыдсӧ сетӧма сылы, кодлысь туйсӧ Енмыс потшӧсалӧма, коді мунан туйсӧ оз аддзы.

²⁴ Менам ойзӧмӧй лои быдлунъя няньӧн, менам бӧрдӧмӧй – визувтысь ваӧн.

²⁵ Мыйысь ме полі, сійӧ и лоис, мыйысь ме тіралі, сійӧ и суис менӧ.

²⁶ Лӧньлуныс да шойччӧгыс менам абу, ӧтторъя шог воӧ.