Иов 29 - Коми Библия 2023

Иовлӧн бӧръя сёрни

¹ Иов водзӧ сёрнитіс:

² – Вӧлі кӧ эськӧ менам олӧмӧй воддза кодьыс, сійӧ лунъясыс кодь, кор Енмыс видзис менӧ.

³ Сылӧн биыс ӧзъяліс ме весьтын, Сылӧн югӧр улын ме муні пемыдыс пыр.

⁴ Татшӧм бур лунъяс вӧліны менам, кор Енмыс видзис менсьым чомйӧс,

⁵ Ставсӧвермысь вӧлі мекӧд, и ныв-пиӧй вӧліны ме гӧгӧр.

⁶ Сэки менам туйясӧд визувтіс йӧв, изкыртаысь меным вияліс олив вый.

⁷ Кор ме петавлі карса дзиръя дорӧ, изэрд вылын пуксьывлі аслам пуклӧсӧ,

⁸ сэки том йӧз менӧ аддзигӧн саймовтчылісны, пӧрысьяс чеччылісны да сулалісны,

⁹ карса веськӧдлысьяс чӧв ланьтлісны, вомнысӧ кинас тупкылісны,

¹⁰ нималана йӧзлӧн гӧлӧс шыныс лӧньліс, кывйыс ляксьыліс горш бердас.

¹¹ Кывзысьяс шулісны менӧ шуда мортӧн, аддзылысьяс ошкылісны менӧ,

¹² ӧд ме мездывлі отсӧг корысь гӧль мортӧс, дорйылі батьтӧм-мамтӧмӧс, кор сылы некод эз отсав.

¹³ Куланвыйӧдз воӧм морт бурсиӧмӧн аттьӧавліс менӧ, дӧваяслысь сьӧлӧмсӧ ме гажӧдлі.

¹⁴ Веськыдлуныс вӧлі меным паськӧмӧн, веськыда мыждӧмыс – кышанӧн да юрвевттьӧдӧн.

¹⁵ Синтӧмлы ме вӧлі синмӧн, коктӧмлы – кокӧн,

¹⁶ коньӧръяслы ме вӧлі батьӧн, тӧдтӧм йӧзӧс ме дорйылі ёрд водзын,

¹⁷ лёк вӧчысьлысь ме чегъявлі черлысӧ, сылӧн пиньысь нетшыштлі мырддьӧмасӧ.

¹⁸ Ме чайті, мый ме лӧня кула аслам позйын, менам олан лунъяслӧн лыдыс лоӧ лыа чир мында,

¹⁹ менам вужъяслы век сюрас ва, менам вожъясӧ узьмӧдчас войся лысва,

²⁰ чайті, пыдди пуктӧмыс ме дінысь оз вешйыв, ньӧввужйӧй менам киын пыр лоӧ зэвтӧма.

²¹ Менсьым шуӧмӧс виччысьлісны да кывзылісны, йӧзыс чӧв олісны, кор ме найӧс туйдӧдлі.

²² Менам кывъяс бӧрын некод нинӧм эз содтыв, менам сёрниӧй ва моз войталіс на вылӧ.

²³ Зэрӧс моз найӧ виччысьлісны менсьым висьталӧмӧс, быттьӧ тувсовъя зэрӧн веськӧдісны горшнысӧ.

²⁴ Кор налӧн эз нин вӧв лачаныс, менам нюмъялӧмӧй бурӧдліс найӧс, менам чужӧмбанлӧн югыдыс ышӧдліс найӧс.

²⁵ Ме индылі налы туйсӧ, вӧлі налы юралысьӧн, олі накӧд, кыдзи тышкайӧз пӧвстын ӧксы, вӧлі бурӧдысьӧн бӧрдысьяслы.