Иов 28 - Коми Библия 2023

Мывкыдлун ошкӧм

¹ Эзысьлӧн эм куйланін, кытысь перйӧны сійӧс, и зарнилӧн эм сывданін, кӧні весалӧны сійӧс.

² Кӧрт перйӧны муысь, ыргӧн сывдӧны изйысь.

³ Морт вермӧ пемыдсӧ, лэччӧ медся джуджыдінӧ, сэні сап пемыдас сійӧ корсьӧ из.

⁴ Кытчӧ мортлӧн кокыс эз на тувччыв, сэні кодйӧны из перъян джуджыд гу, гез кузя лэччӧны сэтчӧ, кӧні ловъя морт абу.

⁵ Му вылын быдмӧ нянь, а пытшкӧссяньыс мусӧ быттьӧ би кодйӧма.

⁶ Изъяс пытшкысь сапфир сюрласьӧ, лыа пытшкысь – зарни чиръяс.

⁷ Кырныш оз тӧд му пытшкӧ туйсӧ, варышлӧн синмыс оз аддзы сійӧс,

⁸ звер сэті оз ветлы, лев оз тувччыв сэтчӧ.

⁹ Морт кералӧ изкырта, путкыльтӧ керӧссӧ подулӧдзыс,

¹⁰ писькӧдӧ туйяс изкырта пытшкын, и аддзӧ сэтысь озырлун.

¹¹ Сійӧ потшӧ ва визувъяс, некор аддзывлытӧмторсӧ вайӧ югыдас.

¹² Но кытысь аддзыны мывкыдлунсӧ? Кӧні олӧ сюсь вежӧрыс?

¹³ Сылысь донсӧ морт оз тӧд, тайӧ муюгыдсьыс сійӧс он аддзы.

¹⁴ Пыдӧстӧм йир шуӧ: «Сійӧ ме пытшкын абу», и саридз шуӧ: «Ме дорын абу».

¹⁵ Сійӧс он ньӧб зарни вылӧ, сылысь донсӧ он артав эзысьӧн,

¹⁶ сыысь он мынтысь офирса зарниӧн, сапфирӧн да дона оникс изъясӧн,

¹⁷ зарни да дона стеклӧ он ӧткодяв сыкӧд, весалӧм зарниысь вӧчӧм дозлӧн доныс оз лӧсяв сылы.

¹⁸ Коралл да крусталь йылысь и сёрнитнысӧ нинӧм, мывкыдлунсӧ шедӧдӧмыд дона изъясысь на бурджык.

¹⁹ Сыкӧд он ӧткодяв эфиопияса топаз, сыысь он мынтысь весалӧм зарниӧн.

²⁰ Кытысь локтӧ мывкыдлуныс? Кӧні олӧ сюсь вежӧрыс?

²¹ Сійӧс дзебӧма став ловъя олысьыслӧн синмысь, сайӧдӧма енэжвыв лэбачьясысь.

²² Пыдӧстӧминыс да кулӧмыс шуӧны: «Ми сӧмын пель йылӧн кывлім сы йылысь».

²³ Сӧмын Енмыс тӧдӧ мывкыдлун дорӧ туйсӧ, тӧдӧ сылысь оланінсӧ.

²⁴ Сылы тыдалӧ муыс помсянь помӧдзыс, Сійӧ аддзӧ ставсӧ енэж увсьыс.

²⁵ Кор Енмыс тӧврулы сетіс вын, кымӧръяслы мурталіс ва,

²⁶ зэрлы сетіс индӧдъяс, чард-гымлы урчитіс туй,

²⁷ сэки Сійӧ аддзис мывкыдлунсӧ да донъяліс сійӧс, тӧдмаліс мывкыдлунсӧ да вынсьӧдіс сійӧс.

²⁸ Мортлы Енмыс шуис: «Господьысь полӧм эм мывкыдлун, лёксьыс ылыстчӧм эм сюсь вежӧр».