Иов 27 - Коми Библия 2023

¹ Иов водзӧ сёрнитіс:

² – Ловъя Ен водзын, коді эз веськыда мыжды менӧ, Ставсӧвермысь водзын, коді шогнас тыртіс олӧмӧс, ме шуа:

³ кытчӧдз менам ловшыӧй шедӧ на, кытчӧдз Енлӧн лолалӧмыс ме пытшкын,

⁴ оз пет менам вомысь ылӧгыс, оз пӧръяв менам кывйӧй.

⁵ Ме некор ог шу, мый ті веськыдӧсь. Кытчӧдз ме ловъя, ме кута дорйыны ассьым сӧстӧмлунӧс.

⁶ Ме кутчыся аслам веськыдлунӧ, ог лэдзчысь сыысь. Сьӧлӧмӧй оз мыжав менӧ нинӧмысь.

⁷ Менӧ мустӧмтысьлы мед лоас лёк вӧчысьлы моз, меным паныд кыпӧдчысьлы – Индӧд торкысьлы моз.

⁸ Кор Ентӧг олысьлы воас пом, кор Енмыс босьтас сылысь олӧмсӧ, сэки мый вылӧ сійӧ лачасӧ кутас?

⁹ Сійӧс шогыс суас, но Енмыс оз кыв сылысь бӧрдӧмсӧ.

¹⁰ Сійӧ оз кут нимкодясьны Ставсӧвермысьӧн, оз шыась Енмыс дінӧ.

¹¹ Ме висьтала тіянлы Енмыслӧн выныс йылысь, ог дзеб, мый вӧчӧ Ставсӧвермысь.

¹² Ті асьныд ставсӧ аддзылінныд, сідзкӧ, мыйла нинӧм абусӧ сёрнитанныд?

¹³ Со мый дасьтӧма Енмыс лёк вӧчысьлы, со мый вичмас дзескӧдысьлы Ставсӧвермысьсянь:

¹⁴ мед кӧ сылӧн пияныс уна, найӧ шыпурт улӧ веськаласны, сысянь чужысьяслы оз ло пӧтмӧн няньыс.

¹⁵ Ловйӧн кольӧмаясӧс кулана висьӧм гортйӧ водтӧдас, налӧн дӧваясыс весиг оз вермыны бӧрдны-шогсьыны.

¹⁶ Лёк вӧчысьлӧн кӧ эзысьыс лоӧ лыа мында, паськӧмыс – ёг турун мында,

¹⁷ сылысь паськӧмсӧ веськыда олысь пасьталас, эзысьыс мыжтӧмлы вичмас.

¹⁸ Керкаыс, мый сійӧ лэптӧ, ӧдйӧ киссяс, сылӧн керкаыс видз-му бӧрся видзӧдысьлӧн чом кодь.

¹⁹ Сійӧ водас озыр мортӧн, но татшӧмнас оз чеччы, восьтас синсӧ, а сылӧн нинӧм абу.

²⁰ Ойдігӧн моз сійӧс полӧм босьтас, войнас сійӧс бушков суас.

^21-22 Сійӧ кутас зільны пышйыны, но асыв тӧв кыпӧдас сійӧс, ыджыд ӧдӧн нӧбӧдас да нем жалиттӧг шыбитас мӧдлаӧ.

²³ Тайӧс аддзылысь шлопнитас кинас, пондас сы вылын шутьлялӧмӧн серавны.