Иов 26 - Коми Библия 2023

Иов вочавидзӧ Вилдадлы

¹ Иов воча шуис:

² – Кутшӧма жӧ тэ отсалін вынтӧмлы, ёнмӧдін сылысь жебмӧм кисӧ!

³ Кутшӧма жӧ тэ туйдӧдін мывкыдтӧмӧс, тырвыйӧ гӧгӧрвоӧдін ставсӧ!

⁴ Кодлы эськӧ тэ тайӧ кывъяссӧ висьталін, кутшӧм ловсянь тэ сёрнитін?

⁵ Кулӧмаяслӧн вуджӧръясыс тіралӧны пыдӧстӧм йирыскӧд да сэні олысьяскӧд.

⁶ Кулӧмаяслӧн оланіныс Ен водзын восьса, пыдӧстӧминлӧн абу вевттьӧдыс.

⁷ Енмыс шевкнитіс войвывсӧ нинӧм весьтас, ӧшӧдіс мусӧ абутӧмас.

⁸ Аслас кымӧръяс пытшкӧ Сійӧ йӧршитӧ ва, валӧн сьӧктаысь кымӧръяс оз нёйдны.

⁹ Сійӧ вевттьӧма Ассьыс юралан пуклӧссӧ, шлапнитӧма сы вылӧ Ассьыс кымӧрсӧ.

¹⁰ Ва веркӧсті Сійӧ нуӧдіс визь, торйӧдіс югыдсӧ пемыдысь.

¹¹ Енэжсӧ пыкысь сюръяяс дзӧрӧны, Енлӧн горӧдӧмысь найӧс полӧм босьтӧ.

¹² Аслас вынӧн Енмыс гызьӧдӧ саридз, Аслас мывкыдлунӧн пасьвартӧ Рахавӧс.

¹³ Енлӧн пӧльыштӧмысь енэжыс мичаммӧ, Сылӧн киыс бытшкӧ ӧдйӧ пышйысь змейӧс.

¹⁴ Сылӧн уджъяс пиысь ставыс тайӧ сӧмын этшаниктор, Сы йылысь ми кылам сӧмын вашкӧдӧмсӧ. Коді вермас гӧгӧрвоны Сылысь гымалана вынсӧ?