Иов 24 - Коми Библия 2023

¹ Мыйла Ставсӧвермысь абу индӧма мыждан кадъяссӧ, мыйла Сійӧс тӧдысьяс оз аддзыны Сылысь мыждан лунъяссӧ?

² Ентӧг олысьяс вешталӧны мудор пасъяс, йирсьӧдӧны гусялӧм ыжъясӧс.

³ Батьтӧм-мамтӧмлысь мырддьӧны осёлсӧ, дӧвалы уджйӧзӧн сетӧмысь босьтӧны сылысь ӧшсӧ.

⁴ Коньӧръясӧс найӧ тойлалӧны туй вылысь, гӧльяслы лоӧ дзебсясьны наысь.

⁵ Овтӧминса осёлъяс моз гӧльяс ветлӧны, ласта вылысь кынӧмпӧт корсьӧны, медым вердны ныв-пинысӧ.

⁶ Найӧ йӧз му вылысь вундӧны коляс няньсӧ, лёк вӧчысьлӧн йӧрысь чукӧртӧны виноград.

⁷ Найӧ узьлӧны пасьтӧгныс, налы нинӧмӧн вевттысьны кӧдзыдсьыс.

⁸ Керӧсъясын зэр улас найӧ кӧтасьӧны, саймовтчӧм могысь ляскысьӧны изкырта бердӧ.

⁹ Ентӧг олысьяс торйӧдӧны батьтӧг кольӧм кагаӧс мам морӧс бердысь, гӧльлы уджйӧзӧн сетӧмысь босьтӧны сылысь кагасӧ.

¹⁰ Гӧльяс ветлӧны пасьтӧгныс, кольтаяс новлӧдлігӧн асьныс тшыгъялӧны,

¹¹ йӧз йӧрын найӧ пычкӧны олив вый, пычкан гуын виноград талялігӧн налӧн горшныс косьмӧ.

¹² Кулысь йӧз ойзӧны карас, доймалӧмаяс отсӧг корӧны, но Енмыс лэдзӧ тадзи лоны.

¹³ Ентӧг олысьяс кыпӧдчӧны югыдыслы паныд, найӧ оз тӧдны югыдыслысь туйсӧ, оз ветлыны югыдыслӧн ордымӧд.

¹⁴ Морт виысь югдытӧдзыс на чеччӧ, виӧ гӧльӧс да коньӧрӧс, войнас ветлӧдлӧ гусясьысь моз.

¹⁵ Гӧтыр вывті ветлысь виччысьӧ рӧмдӧм, шуалӧ, менӧ пӧ некод оз аддзыв, и мунӧ чужӧмсӧ тупкӧмӧн.

¹⁶ Пемыднас гусясьысь пырӧ керкаӧ, а луннас дзебсясьӧ, сылы югыдыс мустӧм.

¹⁷ Асылыс налы сап пемыд кодь, пемыдыслысь повзьӧданторъяссӧ найӧ тӧдӧны.

¹⁸ Ентӧг олысь ва вывті кылалысь чаг кодь. Сылысь мусӧ лоӧ ёрӧма, сылӧн виноград йӧрлань мунысьыс оз ло.

¹⁹ Кыдзи шонді пӧжигӧн кос му сёйӧ лым, тадзи пыдӧстӧминыс ньылыштӧ мыж вӧчысьӧс.

²⁰ Чужтысь мамыс мед вунӧдас сійӧс, вегыль мед чӧсмасяс сыӧн. Лёк вӧчысьӧс мед оз казьтывны, косьмӧм пуӧс моз мед керыштасны сійӧс,

²¹ ӧд ныв-питӧм да сьӧктыны вермытӧм аньӧс сійӧ дзескӧдӧ, дӧвалы сійӧ оз отсав.

²² Аслас вынӧн Енмыс вештӧ вынаясӧс, найӧ оз тӧдны, колясны-ӧ ловйӧн, кор Енмыс сувтас.

²³ Енмыс видзӧ найӧс, та вӧсна налӧн эм лача, но Енмыс видзӧдӧ налӧн туй бӧрся.

²⁴ Найӧ сӧмын на кыпӧдчасны, и абуӧсь нин, став йӧзыс моз найӧ усясны да куласны, найӧс нетшкасны шептӧс моз.

²⁵ Абу-ӧ тадз? Сідзкӧ, коді вермас шуны, мый ме пӧръяся, мый менам сёрниӧй – сӧрӧм?