Иов 23 - Коми Библия 2023

Иов вочавидзӧ Элифазлы

¹ Иов воча шуис:

² – Менам норасьӧмӧй и талун курыд, сьӧкыдалӧмӧй ойзӧм дорысь ыджыд.

³ Тӧді кӧ, кытысь аддзыны Енсӧ, кутшӧм туйӧд мунны Сылӧн оланінӧ,

⁴ ме эськӧ вайи Сы водзӧ ассьым могӧс, висьталі ставсӧ, медым дорйыны ачымӧс,

⁵ тӧдмалі эськӧ Сылысь вочавидзӧмсӧ, гӧгӧрвои Сылысь шуӧмсӧ.

⁶ Ыджыд вына Енмыс ӧмӧй кутас вензьыны мекӧд? Оз! Но кутас кывзыны менӧ.

⁷ Сэки эськӧ веськыда олысь вермис дорйысьны Сы водзын, ме эськӧ пыр кежлӧ мездми менӧ Мыждысьлӧн киысь.

⁸ Муна кӧ асыввылӧ, сэні Сійӧ абу, муна кӧ рытыввылӧ, и сэтысь Сійӧс ог аддзы,

⁹ войвывладорын кӧ Сійӧ мыйкӧ вӧчӧ, ме ог казяв тайӧс, лунвывладорын кӧ дзебсясьӧ, ог аддзы Сійӧс.

¹⁰ Но Сійӧ тӧдӧ менсьым туйӧс, зарниӧс моз Сійӧ тӧдмалӧ менӧ биӧн.

¹¹ Ме восьлала Сылӧн кок туйӧд, Сылӧн туйысь ог кеж.

¹² Сылӧн тшӧктӧмъясысь ме ог ӧтдортчы, Сылысь кывъяссӧ сьӧлӧм бердын видза, аслам кӧсйӧм дорысь вылӧджык на пукта.

¹³ Енмыслӧн шуӧмыс вына, некод сійӧс оз веж. Сійӧ вӧчӧ, мый кӧсйӧ.

¹⁴ Сійӧ збыльмӧдас, мый шуӧма лоны меным, и татшӧм шуӧмыс Сылӧн уна.

¹⁵ Та вӧсна ме пола-тірала Сыысь, Сы йылысь мӧвпалігӧн менӧ полӧм босьтӧ.

¹⁶ Енмыс жебмӧдіс менсьым лолӧс, Ставсӧвермысь повзьӧдлӧ менӧ.

¹⁷ Мыйла Сійӧ эз бырӧд менӧ став тайӧ пемыдсьыс водзджык, мыйла Сійӧ оз вешты сап пемыдсӧ менам чужӧмбан водзысь?