Иов 22 - Коми Библия 2023

Элифаз коймӧдысь шыасьӧ Иов дінӧ

¹ Теманса Элифаз воча шуис:

² – Вайӧ-ӧ бурсӧ мортыс Енмыслы? Сюсь мывкыда морт сӧмын аслыс вайӧ бурсӧ.

³ Веськыда олӧмнад ваян-ӧ нимкодьлун Ставсӧвермысьлы? Мый бурыс Сылы, тэнад кӧ сӧстӧмӧсь олан туйясыд?

⁴ Енмысь полӧмыд да вежавидзӧмыд вӧсна Сійӧ ӧмӧй чирыштӧ тэнӧ, сувтӧ тэкӧд ёрд водзӧ?

⁵ Оз ӧмӧй тэнад ыджыд лёклуныд вӧсна, оз ӧмӧй тэнад помтӧм мыжъясыд вӧсна?

⁶ Вокъяслы уджйӧзӧн сетӧмсьыд тэ босьтлін налысь коланаторсӧ, гӧльяслысь пӧрччӧдлін бӧръя паськӧмсӧ.

⁷ Кодлӧн горшыс косьмис, сійӧс ваӧн эн юктӧдлы, тшыгъялысьлы няньтор эн сетлы.

⁸ Вынаяс моз тэ ыджыдалін аслад му вылын, вылӧ кыпӧдчӧмӧн олін сэні.

⁹ Дӧваясӧс тэ ыстылін куш киӧн, батьтӧм-мамтӧмъясӧс кольлін нинӧмтӧг.

¹⁰ Та вӧсна тэ гӧгӧр октӧма лэчьяс, виччысьтӧг тэнӧ полӧм-тіралӧм босьтіс.

¹¹ Тэ гӧгӧр сап пемыд, тэ нинӧм он аддзы, ыджыд ваыс вевттис тэнӧ.

¹² Енмыс ӧмӧй абу енэжсьыс на вылын? Видзӧдлы кодзувъяс вылӧ, кутшӧм найӧ ылынӧсь.

¹³ А тэ шуан, мый Енмыс оз тӧд, оз аддзы, оз вермы мыждыны сап пемыд пырыс,

¹⁴ шуан, мый кымӧръяс сайӧдӧны Сійӧс, оз сетны аддзыны, и мый Сійӧ ветлӧ енэж кытшолӧд.

¹⁵ Тэ ӧмӧй водзӧ кутан талявны важ туйсӧ, кыті ветлісны лёк вӧчысьяс.

¹⁶ Кадысь водз найӧс вӧлі бырӧдӧма, налысь керкаяссӧ ыджыд ва кылӧдіс.

¹⁷ Найӧ шуавлісны Енмыслы: «Вешйы миян дінысь! Мый миянкӧд вермас вӧчны Ставсӧвермысь?»

¹⁸ А Енмыс озырмӧдіс налысь керкаяссӧ быд бурнас. Лёк вӧчысьлӧн мӧвпъясыс мед ылыстчасны ме дінысь!

¹⁹ Веськыда олысьяс видзӧдӧны да нимкодясьӧны, сӧстӧм сьӧлӧмаяс сералӧны лёк вӧчысьяс вылын,

²⁰ шуалӧны: «Миянлы паныд сувтысьясӧс бырӧдӧма, налысь эмбурсӧ би ньылыштӧма».

²¹ Раммӧдчы Ен водзын, Иов, та пыр тэныд локтас быд бурыс.

²² Сибӧд Енмыслысь туйдӧдӧмсӧ, пукты Сылысь кывъяссӧ сьӧлӧмад.

²³ Бергӧдчан кӧ Ставсӧвермысь дінӧ, вештан кӧ лёксӧ аслад керка дінысь, сэки Сійӧ бара кыпӧдас тэнӧ.

²⁴ Тэ кӧ зарнитӧ кутан лыддьыны бусӧн, Офирысь вайӧм зарнитӧ – ковтысса изъясӧн,

²⁵ но зарнинас да дзирдалысь эзысьнас кӧ тэныд лоӧ Ставсӧвермысь,

²⁶ сэки пондан нимкодясьны Ставсӧвермысьӧн, верман синтӧ лэптыны Енлань.

²⁷ Кевмысян Сылы, и Сійӧ кылас тэнӧ, и тэ вӧчан, мый кӧсйысьлін.

²⁸ Мый шуан вӧчны, сійӧ артмас, туй вылад кутас ӧзйыны югыд би.

²⁹ Улӧ лэдзӧмаяслы тэ шуан: «Кыпӧдчӧй», Енмыс мездас рамъясӧс.

³⁰ Тэнад сӧстӧмлун вӧсна Сійӧ мездас весиг мыжаӧс.