Иов 21 - Коми Библия 2023

Иов вочавидзӧ Софарлы

¹ Иов воча шуис:

² – Сюся кывзӧй, мый ме шуа, тайӧ лоӧ меным тіянсянь бурӧдӧм.

³ Терпитыштӧй менӧ, лэдзӧй висьтавны, а кор помала, верманныд серавны.

⁴ Ме ӧмӧй мортлы нярга-эляся? Меным ӧмӧй оз позь дӧзмыны?

⁵ Вомнытӧ кинаныд тупкӧй, видзӧдлӧй ме вылӧ, и ті повзянныд.

⁶ Кор ме мӧвпала мекӧд лоӧмтор йылысь, менӧ дзӧрӧм босьтӧ, став вир-яйӧй тіралӧ.

⁷ Мыйла, бара-й, лёк йӧз олӧны на? Найӧ вынаӧсь да пӧрысь кадӧдз ёнӧсь.

⁸ Найӧ аддзӧны ныв-пиыслысь быдмӧмсӧ, челядьыслӧн челядьыс син водзасӧсь.

⁹ Лёк вӧчысьлӧн гортсаяс олӧны повтӧг, Енлӧн беддьыс абу на вылын.

¹⁰ Сылӧн ӧшкыс бура тырсьӧдӧ, мӧскыс вайсьӧ, некор оз чӧвтчыв.

¹¹ Посни челядьыс баля чукӧр моз котралӧны, ныв-пияныс чеччалӧны-ризъялӧны,

¹² сьылӧны тимпан да гусли улын, гажӧдчӧны пӧлян шы улӧ.

¹³ Лёк вӧчысьлӧн олан лунъясыс шудаӧсь, сійӧ лӧня вуджӧ кулӧмаяс дінӧ.

¹⁴ Но Енмыслы лёк йӧз шуалӧны: «Вешйы миян дінысь, ми огӧ кӧсйӧй тӧдны Тэнсьыд туйястӧ!

¹⁵ Коді сійӧ Ставсӧвермысьыс, мед ми кесъялім Сылы? Мый бурсӧ ваяс миянлы Сы дінӧ шыасьӧмыс?»

¹⁶ Лёк йӧзлӧн шудыс абу асланыс киын. Лёк вӧчысьлӧн мӧвпъясыс мед ылыстчасны ме дінысь!

¹⁷ Тшӧкыда-ӧ куслӧ лёк вӧчысьлӧн биыс? Тшӧкыда-ӧ Ен скӧралӧмсянь вичмӧ сылы шогыс да сьӧкыдлуныс?

¹⁸ Сійӧ абу тӧлӧн нӧбӧдӧм идзас кодь, тӧвнырӧн шердйӧм кыд кодь.

¹⁹ Тэ шуан, Енмыс пӧ мыждас лёк вӧчысьлысь ныв-писӧ. Но Енмыс мед мыждас лёк вӧчысьӧс асьсӧ, медым сійӧ та пыр велӧдчас.

²⁰ Лёк вӧчысь мед аслас синмӧн аддзылас шогсӧ, олігас мед ачыс юас Ставсӧвермысьлысь скӧрлунсӧ.

²¹ А кулӧм бӧрас сылы веськодь, мый лоас гортсаыскӧд, ӧд олан кадыс сылӧн помасьӧма.

²² Енсӧ-ӧ велӧдны мывкыдлунас, Сійӧс, коді весиг енэжвывса олысьясӧс мыждӧ?

²³ Ӧти кулӧ, кор сійӧ вына да том на, лӧнь да шуда лунъясӧ,

²⁴ кор сылӧн яй чигыс топыд на, лыясыс ёнӧсь на.

²⁵ А мӧд кулӧ курыда шогалӧмӧн, бурсӧ тӧдлытӧг.

²⁶ Но налӧн шойыс кутас ӧтлаын куйлыны му пытшкас, кыкнаннысӧ вегыль-номыр сёяс.

²⁷ Ме тӧда, мый йылысь ті мӧвпаланныд, тӧда, мый кӧсъянныд нюкыртны менӧ.

²⁸ Ті юаланныд, кӧні ӧні нималана мортлӧн керкаыс, кӧні лёк вӧчысьяслӧн оланіныс?

²⁹ Ті ӧмӧй энӧ юасьлӧй ветлысь-мунысьяслысь, энӧ ӧмӧй гӧгӧрволӧй налысь висьталӧмсӧ,

³⁰ мый бырӧдан лунӧ лёк вӧчысь мездмас, Енлӧн скӧралан лунӧ сійӧс лоӧ вештӧма мӧдлаӧ.

³¹ Коді мыждас сійӧс олан туйсьыс, коді мынтысяс сылы лёк вӧчӧмсьыс?

³² Сійӧс колльӧдӧны-дзебӧны, дзебанін дорас видзысьясӧс сувтӧдӧны.

³³ Ыджыд йӧз чукӧр сійӧс колльӧдӧ, шой водзвылас мунысьяслы лыдыс абу. Му улын куйлігас сылы лоӧ лӧсьыд.

³⁴ Куш кывъяснад ті онӧ бурӧдӧй менӧ, тіян сёрниныд – сӧмын ылӧг.