Иов 2 - Коми Библия 2023

Сӧтана дойдӧ Иовӧс

¹ Енлӧн пиян бара локтісны да сувтісны Господь водзӧ. Накӧд тшӧтш локтіс сӧтана да сувтіс Господь водзӧ.

² Господь юаліс сӧтаналысь: «Кытысь тэ локтін?» Сӧтана вочавидзис: «Ме ветлӧдлі му вывті да кытшовті сійӧс».

³ «Казялін-ӧ Менсьым Иов кесйӧгӧс? – юаліс Господь. – Му вылас ӧд сы кодь мӧдыс абу. Сійӧ сӧстӧм сьӧлӧма веськыд морт, полӧ Енсьыс да ӧтдортчӧ лёксьыс. Тэ ыззьӧдін Менӧ, медым Ме нинӧм абусьыс бырӧді сійӧс, но сійӧ важ мозыс зумыда кутчысьӧ сӧстӧмлунас».

⁴ Сӧтана воча шуис Господьлы: «Аслас вир-яй вӧсна мортыд сетас ставсӧ, мый сылӧн эм.

⁵ Сӧмын нюжӧд китӧ да инмӧдчыв сылӧн лыӧ да вир-яйӧ, сэки сійӧ омӧльтас Тэнӧ».

⁶ Господь шуис сӧтаналы: «Сета сійӧс тэнад киӧ, сӧмын олӧмсӧ сылысь эн босьт».

⁷ Сӧтана муніс Господь водзысь да чорыда дойдіс Иовӧс висьӧмӧн. Сылӧн юр пыдӧссяньыс кок чунь йылӧдзыс петалісны орзьӧм мыльяс.

⁸ Иов босьтіс гырничтор, медым гирскыны асьсӧ, да пуксис [кар сайӧ] пӧим пытшкӧ.

⁹ Гӧтырыс шуис сылы: «Тэ век на кутчысян аслад сӧстӧмлунӧ? Омӧльт Енсӧ и кув».

¹⁰ Иов вочавидзис: «Вежӧртӧм ань моз тэ сёрнитан. Сӧмын бурсӧ ӧмӧй сибӧдам Енсяньыс, а лёксӧ огӧ?» Та дырйи Иов эз мыжмы аслас кывъясӧн.

Иовлӧн куим ёрт

¹¹ Иовлӧн куим ёрт – Теманысь Элифаз, Шуахысь Вилдад да Наамаысь Софар – кывлісны сылӧн ыджыд шог йылысь. Найӧ мӧдӧдчисны быдӧн аслас оланінысь, медым паныдасьны да ӧтлаын мунны Иов дінӧ, юкны сыкӧд шогсӧ да бурӧдны сійӧс.

¹² Найӧ ылісянь на аддзисны Иовӧс, но эз тӧдны сійӧс. Сэки найӧ пондісны ырзӧмӧн бӧрдны, косялісны паськӧмнысӧ да юр весьтаныс коялісны му енэжланьыс.

¹³ Сизим лун да сизим вой найӧ пукалісны Иовкӧд му вылын. Найӧ кыв эз шуны Иовлы, ӧд аддзисны, кутшӧм ёна сійӧ сьӧкыдалӧ.