Иов 19 - Коми Библия 2023

Иов вочавидзӧ Вилдадлы

¹ Иов воча шуис:

² – Дыр-ӧ на ті кутанныд дзескӧдны менӧ, дойдавны асланыд кывъясӧн?

³ Ті ӧтарӧ омӧльтанныд менӧ, яндысьтӧг увтыртанныд.

⁴ Ме кӧ збыльысь мыж вӧчи, менам мыжӧй ас вылам кольӧ.

⁵ Но ті кӧ янӧданныд менӧ, медым асьнытӧ кыпӧдны,

⁶ тӧдӧй, мый менӧ Енмыс йӧртіс, Сійӧ менӧ Аслас тывйӧн гартыштіс.

⁷ Ме горза: «Виӧны-дзескӧдӧны!», но менӧ некод оз кыв, ме кора отсӧг, а дорйысьыс абу.

⁸ Енмыс потшис менсьым туйӧс, водзӧ ог вермы мунны, вевттис ордымъясӧс сап пемыднас.

⁹ Сійӧ вештіс ме дінысь пыдди пуктӧмӧс, пӧрччӧдіс юр вылысь юркытшӧс.

¹⁰ Сійӧ гӧгӧрбок жуглӧ менӧ, и ме куланвыйын, менсьым лачаӧс Сійӧ пуӧс моз нетшыштіс вужнас.

¹¹ Сылӧн скӧрлуныс ыпнитіс ме вылӧ, Сійӧ лыддьӧ менӧ Аслас вӧрӧгӧн.

¹² Локтӧ Сылӧн тышкакотырыс, писькӧдӧ туйсӧ мелань, кытшалӧ менсьым чомйӧс.

¹³ Вокъясӧс Сійӧ ылыстіс ме дінысь, менам ёртъясӧй ӧтдортчисны меысь.

¹⁴ Матыссаяс эновтісны менӧ, тӧдсаяс вунӧдісны менӧ.

¹⁵ Менам керкаӧ волысьяс оз кӧсйыны тӧдны менӧ, аслам кесйӧг аньяслы ме лои бокысаӧн.

¹⁶ Ме кора кесйӧгӧс, а сійӧ оз вочавидз, меным лоӧ корӧмӧн корны сійӧс.

¹⁷ Гӧтырлы менам лолыштӧмысь зывӧк, вокъясӧй кедзовтӧны менӧ.

¹⁸ Весиг посни челядь менӧ мустӧмтӧны, сералӧны ме вылын менӧ аддзигӧн.

¹⁹ Менам ёртъясӧй зывӧктӧны менӧ, муса йӧзӧй бергӧдчисны меысь.

²⁰ Лы да кучик коли меысь, вом пытшкын сӧмын пинь анъяс колины.

²¹ Ёртъясӧй, жалитыштӧй менӧ, ӧд Енлӧн киыс инмӧдчис ме дінӧ.

²² Мыйла ті Енмыс моз дзескӧданныд менӧ, йиранныд менӧ, некыдз онӧ вермӧй пӧтны?

²³ Менсьым кывъясӧс кӧ эськӧ вӧлі гижӧма, небӧгӧ пасйӧма,

²⁴ кӧрттувйӧн из вылӧ серлӧдлӧма, нэм кежлӧ свинечӧн мавтӧма.

²⁵ Но ме тӧда, менам Мездысьӧй ловъя! Сійӧ медбӧръяыс, коді сувтас му вылӧ.

²⁶ Кор ме вылысь кучикӧс лоӧ кульыштӧма, ме аддза Енмӧс.

²⁷ Ме кута видзӧдны Сы вылӧ, аслам синмӧн аддза Сійӧс. Тайӧс виччысьӧмысь сьӧлӧмӧй нюкыртчӧма.

²⁸ Ті шуанныд, кутам пӧ дзескӧдны Иовӧс, и аддзам сы пытшкысь мыж.

²⁹ Но тӧдӧй, мый лоас мыждӧм, полӧй шыпуртысь, ӧд скӧрлун веськӧдӧма шыпуртсӧ мыжлань.