Иов 18 - Коми Библия 2023

Вилдад мӧдысь шыасьӧ Иов дінӧ

¹ Шуахса Вилдад воча шуис:

² – Кор нин дугданныд тадзисӧ сёрнитны? Медводз мӧвпыштӧй, сэсся пондам сёрнитны.

³ Мыйла пуктыны миянӧс пемӧс туйӧ, лыддьыны вежӧртӧмъясӧн?

⁴ Скӧралӧмнад тэ, Иов, асьтӧ йиран-косявлан! Чайтан, мый тэ вӧсна муыс кушмас, изкырта вешъяс места вывсьыс?

⁵ Лёк вӧчысьлӧн биыс кусас, бикиньыс дугдас сявкйыны.

⁶ Сылӧн керка пытшкыс пемдас, сы весьтын югъялысь биыс кусас.

⁷ Сылӧн зумыд воськовъясыс вынтӧммасны, сылӧн лёк вӧзйӧмыс сійӧс асьсӧ уськӧдас.

⁸ Сылӧн кокыс шедас налькйӧ, гартчас тывйӧ,

⁹ пысасяс дзугйӧ, сійӧ шедас кыйсьысь киӧ.

¹⁰ Му вылас сылы октӧма лэч, туй вылас сійӧс виччысьӧ нальк.

¹¹ Повзьӧданторъяс кытшаласны сійӧс, вӧтчасны сы бӧрся.

¹² Тшыглуныс сылысь вынсӧ босьтас, кулӧмыс сыкӧд орччӧн сулалӧ.

¹³ Кулана висьӧмыс сылысь кучиксӧ сёяс, лысӧ и яйсӧ вильӧдас.

¹⁴ Сійӧс лоӧ вӧтлӧма аслас керкаысь, мый вылӧ лача кутіс, лоӧ нуӧдӧма повзьӧдана ӧксы дінӧ.

¹⁵ Лёк вӧчысьлӧн керкаӧ овмӧдчасны мукӧдъяс, сылысь оланінсӧ кояласны тэгйӧн.

¹⁶ Сылӧн вужйыс косьмас улісяньыс, а вожъясыс – вылісяньыс.

¹⁷ Сы йылысь оз кутны казьтывны му вылын, сылысь нимсӧ вунӧдасны йӧз пӧвстын.

¹⁸ Сійӧс лоӧ вӧтлӧма югыдсьыс пемыдӧ, лоӧ шыбитӧма кулӧмаяс дінӧ.

¹⁹ Сылӧн оз ло пиыс, ас войтыр пӧвстын оз лоны сысянь чужысьяс, сылӧн оланінӧ некод оз коль.

²⁰ Рытыввылын весьӧпӧрасны сійӧс бырӧдӧмысь, асыввылын полӧм-тіралӧм босьтас.

²¹ Тадзи лоӧ лёк вӧчысьлӧн керкакӧд, Енсӧ тӧдтӧм мортлӧн оланінкӧд.