Иов 17 - Коми Библия 2023

¹ Менам лолӧй нюкыртчӧма, олан лунъясӧй чинӧны, кок пӧлӧн ме гортйын нин.

² Лёкӧдысьяс кытшалісны менӧ, меным лоӧ видзӧдны налӧн лӧгалӧм вылӧ.

³ Енмӧй, кывкут ме вӧсна. Тэысь ӧтдор коді тайӧс вӧчас?

⁴ Тэ тупкин налысь сьӧлӧмсӧ, и найӧ оз гӧгӧрвоны, Тэ он сет налы вермыны менӧ.

⁵ Коді ылӧдлӧ ёртсӧ аслыс мыйкӧ босьтӧм могысь, сылӧн челядьыслӧн синныс бердас.

⁶ Ме лои войтыръяслы лёкӧданторйӧн, найӧ сьӧлалӧны меным чужӧмӧ.

⁷ Шогсьӧмӧйла менам синмӧй пемдіс, вир-яйӧй лои вуджӧр кодь.

⁸ Таысь веськыда олысьӧс шемӧс босьтас, Ентӧг олысь шызьӧдас мыжтӧмӧс.

⁹ Но веськыда олысь оз кеж аслас туй вылысь, сӧстӧм киа морт вынсялас-зумыдмас.

¹⁰ Локтӧй ставныд, матыстчӧй, но тіян пӧвстысь ме ог аддзы мывкыдаӧс.

¹¹ Менам олан лунъясӧй помасисны, сьӧлӧмпытшса кӧсйӧмъясӧй киссисны.

¹² Войсӧ ті вӧчанныд лунӧн, пемыднас шуанныд, мый югыд нин.

¹³ Ме виччыся вуджны кулӧмаяслӧн оланінӧ, пемыдінас вольсала вольпасьӧс,

¹⁴ гортйӧс шуа аслам батьӧн, номыръясӧс – мамӧн да чойӧн.

¹⁵ Кӧні сэки лоӧ менам лачаӧй? Коді тӧдӧ тайӧс?

¹⁶ Сійӧ мекӧд тшӧтш лэччас кулӧмаяс дінӧ, мекӧд ӧтлаын водас му пытшкӧ.