Иов 16 - Коми Библия 2023

Иов вочавидзӧ Элифазлы

¹ Иов воча шуис:

² – Татшӧм сёрнисӧ ме унаысь нин кывлі, ті ставныд – туйтӧм бурӧдысьяс.

³ Эм-ӧ помыс тӧвйыв лэдзӧм сёрнилы? Мый тэнӧ ышӧдіс тадзи сёрнитны?

⁴ Ті кӧ сьӧкыдалінныд ме моз, ме эськӧ тіян моз жӧ сёрниті, дасьті сёрниӧс тіянлы паныд, шуаси юрӧс довкйӧдлӧмӧн,

⁵ ёнмӧді эськӧ тіянӧс аслам кывъясӧн, вомдорӧс нюмрӧдлӧмӧн бурӧді тіянӧс.

⁶ Сёрнитӧмысь менам дойӧй оз ланьт, дугда кӧ, весиг сэки оз вешйы ме дінысь.

⁷ Тэ дзикӧдз мудзтӧдін менӧ, Енмӧй, Тэ бырӧдін менсьым став гортсаӧс.

⁸ Тэ вевттин менсьым кучикӧс чукыръясӧн, тадзи петкӧдлін, мый ме мыжа. Менам омӧльтчӧмӧй кыпӧдчӧ меным паныд да мыжалӧ менӧ.

⁹ Енлӧн скӧрлуныс косявлӧ менӧ, усьласьӧ ме вылӧ, пиньсӧ йирӧ ме вылӧ, менӧ мустӧмтысь синсӧ сувтӧдӧма ме вылӧ.

¹⁰ Йӧзыс жергӧдісны ме вылӧ пиньнысӧ, лёкӧдӧмӧн кучкалӧны меным чужӧмбанӧ, ставныс ӧтувтчисны меным паныд.

¹¹ Енмыс шыбитіс менӧ лёк йӧзлы, сетіс менӧ Ентӧг олысьяс киӧ.

¹² Ме олі лӧня, но Сійӧ пыркнитіс менӧ, кватитіс сьыліӧд да песлӧдліс, сувтӧдіс менӧ Аслыс лыйсян пас пыдди.

¹³ Сійӧ лыйис ньӧвъяссӧ менам вир-яйӧ, жалиттӧг сатшкис менам гыркйӧ, кисьтіс му вылас сӧптӧс,

¹⁴ бытшйӧдліс менсьым вир-яйӧс, тышкаморт моз уськӧдчис ме вылӧ.

¹⁵ Ме вури аслым шогалан паськӧм, чужӧмбанӧн ляскыси му бердас.

¹⁶ Бӧрдӧмӧйла чужӧмӧй доналіс, синмӧс вевттис сап пемыд.

¹⁷ Но менам кевмӧмӧй сӧстӧм, менам киӧй некодӧс эз вилы да эз дзескӧдлы.

¹⁸ Муӧй, эн дзеб менсьым вирӧс, ырзӧм-бӧрдӧмӧй мед кылас на.

¹⁹ Енэжас эм ме дор Сулалысьыс, медвыліас эм менӧ Дорйысьыс.

²⁰ Менам ёртъясӧй лёкӧдӧны менӧ, но ме Ен водзын кисьта синваӧс.

²¹ Вермис кӧ эськӧ мортыс дорйысьны Ен водзын морт водзын моз.

²² Менам олан воясӧй лыдаӧсь, ме муна сэтчӧ, кытысь бӧрсӧ ог нин бергӧдчы.